دنيا قطار .. بقلم : مدحت سلام

دنيا قطار ... كل واحد مكانه محجوز ... محطات وكل لحظة يتعدل المسار ... طفل شاب راجل عجوز
ناس تنزل وناس تاخد مكانها ... وناس مكانها يفضل فاضي ... ناس مش عاجبها اماكنها ... واللي بمكانه راضي ... اماكن وفيها سكانها ... جلاد وقاضي
درجات وحكايات ... قرب وبعاد ... واحد اتولد وواحد مات ... حكمة من رب العباد 
طبول وافراح ... عزاء وجراح ... خصام وسماح ... قطار ومش بيستنى حد عمر وراح 
بداية ... قصة ورواية ... وسيلة وغاية ... ناس ارتاحت وناس املها في المحطة الجاية ... وكل بداية وليها نهاية
الحياة الدنيا ... مهما طالت بردو فانية
العمر لحظة وبيعدي في ثانية 
(( مدحت سلام ))