بكرة تتهنى الحدوتة .. أشعار ورباعيات : اسامة حسنى

الشتا انواره بتتعاجب 
على شط النيل وسط قوارب 
الصارى فى مركب يتلاعب 
الريح بيهفهف يتجاذب 
اشواق الليل والليل بارد 
وكفوف على شط النيل دايبة 
حلمانة بعشة ومش هايبة 
إكمن العيشة بقت خايبة 
لا كبير بيفتش احوالهم 
وطاحونة بتطحن بلا فايدة 
وكفوف عالناصية أهى ممدودة 
بتلم قروش وأهى سبوبة 
وعجوز وايديها المجلودة
وكفوفها الراقية المشدودة 
صابحة من النوم فى الفجرية 
بين قدرة فول او درة نية 
وتعدى الليلة أهى مستورة 
وف عز الليل وف حضن النيل 
بتشق الشارع مرسيدس 
وسيجار ممدودة بتتفاكس 
والهانم جنبه بتتعاكس 
كام شاب عيونهم راح تطلع 
على حسرة جيبهم الخاسس 
وإشارة ماتدرى إن كات حمرا 
واشارجى ولايص فى الزحمة 
والبيه سواق المرسيدس 
يحدف بسيجاره الابليس 
يلسع كمسارى فى الاتوبيس 
الراجل يهرش فى قفاه 
لسعه المفترى صرخ الآه 
وحرامى أهو ظايط فى الزحمة 
خبط المحفظة من غير رحمة 
ومرتب أخونا الفرحان 
لطشه الملقاط التعبان 
والحاج حسين الشقيان 
راجع م الشغل وسرحان 
جنب الشباك كفه منام 
آه يا مصر يا أم الصابرين 
يا ام الاهرام يا ام النيل 
يا صبية شعورك مفرودة 
خضرة ونخيلك ممدودة 
عاشقك بمشاكلك وترابك 
من بحرى الدلتا للنوبة 
ربك يعدلها..... توتة توتة 
بكرة تتهنى الحدوتة 
أشعار ورباعيات اسامة حسنى