مجلة عشـــاق الشعـــر الإلكترونية (ممدوح حنفي)
مرايا وحكايه
-----------
صحيت م النوم
من بدايه اليوم
ابتدت الحكايه
بصيت فى المرايه
حققت ف ملامحى
لونى الابيض بقى امحى
واترسمت خطوط ايامى
كل خط علامه
ضاع فيها حلم من احلامى
لقيت ف شعرى خيوط فضه
بتتكلم وتقول
زمن الشباب عدى
زمن راح وزمن جى
بس لسه جوايا قلب حى
عايشه شبابه واحلامه
الناس عليه بيعيبه
وينصحونى اقضى وخلاص
باقى ايامه
طيب ليه
هو عشان عديت الاربعين
ادفن جوايا قلبى المسكين
عيب اعيش واحب واكون
يعنى اعيش باقى عمرى
ف سكون
بيلوموا عليه لو قلت
كلمه حب
عيب لو سمعوا دقه قلب
اسأل
يا ناس طيب ليه
الى جوايا اداريه؟
ده انا انسانه
بالحياه والاحلام مليانه
يقولولى
عيب انتى ست كباره
زى الاثار والمناره
مش لازم تكشفى حبك
يادى العيبه
لازم يموت قلبك
ويبقالك هيبه
وتحترمى سنك
وتحترمى الشيبه
قلتلهم خلاص
لحد ما اعدى الخمسين
ادفن نفسى
اوعدكم
انزل برجلى قبرى
#شاعرةالأحلام منال السويفى
ساحة النقاش