(البوم صور)

لما شمس اول يوم فى شوال أشرقت
لما صحيت م النوم وعينيا فتحت
ولقيتنى واقف عند باب بيتنا القديم
بيت عفي رغم الزمن وصاغ سليم
بصيت على سقفه الجريد بصيت على الحيطان الطين
سمعت صوت جاى من بعيد بيقوللى مين
لما دخلت لقيت ابويا ضهره مسنود ع الجدار
قدامه شاليه من فخار وعليها نار
وامى تقوله اصبر شويه على الفطار
وطيت ابوس ايدين ابويا••• شدها منى
قال شوف بقالك كام سنه ما سألت عنى
واللى باقى من حياتى مبقاش يتحمل انتظار
سمعت صوت البكا طالع مغمس باﻷنين
ولمحت شﻻل من دموع جوه العنين
وامى تنادى بالقوى بصوتها الحزين
ماتسامحه يا راجل بقى
عايش سنينه فى الشقى
وكوم عيال على الكتاف متعلقه
رفع عينيه وبص لى قاللى يا قاسى
هى وانا جبناك هنا وللا انت ناسى
رفع ايديه شدنى حضنى قوى
نزلت دموعه من عينيه تحرق قوى
ومد ايده وراح مطلع كام جنيه
قاللى مصروفك ياواد وللا انت بيه؟
ضحكت ونزلت انا لجل انى ابوس رجليه
ووقفت أدور فى الحيطان ع الذكريات
والمح بعينى عمر عدى منى وفات
ودخلت أوضه من زماااااااااااان مادخلتهاش
وفتحت ضلفه من الدوﻻب من سنين مفتحتهاش
طرت ساعتها من الفرح وبقيت سعيد
لما لمحت فى الدوﻻب هدوم العيد
حسيت ساعتها انى صغرت كام سنه وانى عيل من جديد
ولقيت مراتى جايبه حبايتين صداع وفنجان قهوتى
وسمعتها بتصرخ تقول يا لهوتى
سرحان فى مين يابو العيال بدرى كدا
وليه فى يوم العيد تكون بالشكل دا
قلتلها بقرى كتاب تاريخ مليان عبر
قاللى ان قلبى ع الحبايب كان حجر
قالتلى ﻷ دا مش كتاب
انت من بعد الصﻻه بتفر البوم الصور
♥♥♥♥♥♥♥♥♥♥♥♥♥♥
محمود ناصر