جزء من قصيدتى بحور الشعر
............................................................
أيامى كانت تتشكل
على حسب الطقس اللي يرتل
أوراد الحب المكتوبة لمحيط أنفاسك
كنتى حبيبتى وكنت أنا ناسك
أتوضا بِريقك... يخطفنى بَريقك
أستنا شويه لحد ما أفوق
ما أعرفش إن كان ده غروب الشمس
الرايقة جوه عنيكى ولا شروق
النبض الواقف متمرد على دقة قلبى
بيواسى نفسى المسكونة دايماً بالقهر
والحلم أهو حالف يتسرسب
من جوه حشايا وهيكتب شعر
كنت بقول الشعر زمان
زى كمنجة بتعزف لحن جوه براح
كنت بقول الشعر عشان ارتاح
كنت بحب زى مناضل
عاشق لتراب الحرية
كنت حياتى وحلمى المتحوش
للأيام الجاية
وقصيدتى كانت تتشاقى
وتمد حبال الشوق
على كل حروف الضاد
وتقيم أوتاد
الحب جوه معانى كل بحور الشعر
من أول بحر الكامل
وتمر بسرعة عالوافر
تاخد تعسيلة
فترد الشطرة على التفعيلة
بحروف وجُمل
يحتج الرّمل
مش كل كلام الشعر الهادر
ممكن يتقال
أنا عايز الكلمة زى جبال
ولا تحنى راسها فى وش الريح
وفى صف الحق وقولها صريح
نبراس الشعرا للأجيال
يا يموت الشعر اللى ينافق
فى سطور وورق
ولا رقوة لحافظ هتفيده
وده قول المولى سبحانه
وفى سورة الفلق
وهتلقى كل بحور الشعر
شايفاها عيونك آخرتها غرق
............................................................
شعر / ماهر أبوالمعاطى