جارى التحميل
استخدم زر ESC أو رجوع للعودة
مجلة عشـــاق الشعـــر الإلكترونية (ممدوح حنفي)
(((عربيه يا فلسطين))) من ديوانى الاخير
....................................... ..........
مع كل دمعه بتتولد
فى صوت حزين
مع كل شمعه بتتحرق
بتفوت سنين
نهرب فى حضن الانتظار
نسهر ندور ليل نهار
على كل ايد
حاولت تعيد
القلب جوه الجسم
تانى من جديد
احنا اللى ضعنا ف بعضنا
لأ دا اللى تاه
من ايد عيالنا حضننا
قبله وأدان ياما شقوا
جوه ضلام ليالى فجرنا
لفى يا آه ودورى
على كل ايد
حاولت تعيد
القلب جوه الجسم
تانى من جديد
آدى ايد صبيه وحلمها
معقود ضفيره ف شعرها
اللى اتقتل مش قلبها
اللى اتسرق مش عمرها
دم ويا ناس ما هو هدر
لفى يا آه ودورى
على كل ايد
حاولت تعيد
القلب جوه الجسم
تانى من جديد
آدى ايد عجوز تحت الشجر
حاضنه تراب جذر الشجر
حلفت ما خافت يوم خطر
حاربت بارود بسلاح حجر
عشقت ترابها وأرضها
لفى يا آه ودورى
على كل ايد
حاولت تعيد
القلب جوه الجسم
تانى من جديد
حنى يا آه ..حنى يا آه
على أم فقدت ابنها
على بنت هجرت عرسها
على شاب قام يكتب لها
اتحررى......حنى يا آه
هيعود صلاح الدين
ويوحد الملايين
وهتبقى تانى القدس
عربيه يا فلسطين
عربيه يا فلسطين
والقلب جوه الجسم
يصرخ يقول آمين
قولوا يا مسلمين
قولوا يا مسيحيين
قولوا معاه آمين
آميييييييييييييييين
................................................
شاعر الروائع / أشرف فؤاد السمادونى
المصدر: مجلة عشـــاق الشعـــر الإلكترونية (مرفت طاهر)
(مجلة عشاق الشعر)(1)(ممدوح حنفي)
ساحة النقاش