صرخ تراب سوريا
صرخ تراب سوريا وقال أنجدونى ...
ليه يا عرب كده نستونى ...
بتبصولى وكأنكم يا عرب ما تعرفونى ...
يا عرب ده النوم خاصم جفونى ...
أتحركوا ومن العذاب أرحمونى ..
ده أحنا عملنا لينا يا عرب جامعه ..
وظيفتها تشيل من عيونا كل دمعه ..
صرخ ترابك يا سوريا وقال أنقذونى أنا وأولادى ..
ولادى أتشردوا فى كل حى ووادى ...
وعلشانهم بكى يا عرب فؤادى ...
دا أنا تراب سوريا الحريه الأبيه ...
أنا سوريا أخت لكل البلاد العربيه ...
ليه أخواتى تنام وأنا ما تنام عنيه ...
ليه هونت عليكم وأنتم ما هونتوا عليه ..
يا ناس دا أنا سوريا وبنتمى للامه العربيه ..
صرخ ترابها وليه يا عالم مش سامعين ...
قولولى اللى بيحصل ده موجود فى أى دين ؟...
ليه التراب بأقدام الغدر ينداس ...
وكل حر فيها ليه يطاطى الراس ..
وأعداء الأمه ليه أديهم تنباس ....
ليه يا سوريا فيكى بقت خاويه البيوت ...
ليه أولادك سبوكى وعشش عليكى العنكبوت ...
ليه الاحرار فيكى يكون نصيبهم الموت ...
يا عالم كلكم عايشين وشايفين معايا ...
ليه السكوت وبنات العرب تتاخد سبايا ...
حد يقولى ليه السكوت وايه هى الحكايه ...
يا سوريا ليكى الله ...
اللى مافيش حق يضيع معاه ...
رحماك بيهم يا الله ...
صرخ تراب سوريا ...
بقـــلم : عـــــادل الشــــــهــابى