مجلة عشـــاق الشعـــر الإلكترونية (ممدوح حنفي)
كلام أعرج
؛...................
بصوباعين محشي أوبيضة
فيه ناس كاتبة كلام أعرج
ودايرة تنشره ع الفيس
يقولوا شعر وقصيدة
ووسط الشعرا تتفرج
تلاقي القرع والتهجيص
فيه ناس فاهمة إنها بتزجل
وناس بتحيي وتطبل
وناس تبعت تقول تسلم
علي دا الفن والإبداع
وناس بترص وبتملا
وناس غلطانة في الإملا
وناس علي بعض بتأفلم
وضاع الشعر ياولاد ضاع
فيه ناس بتدش وبتلمع
تروح دار نشر وبتدفع
وتديلها كلام اقرع
فتطبع ما يسمي ديوان
يحطوا ع الديوان صورة
يسموه كلمة محشورة
وكام شخصية مشهورة
يلمعوا هيئة الفنان
ويحضروا حفلة التوقيع
ويدعونا احنا ياشعرا
عشان نشهد لصاحبنا
بإنه عند حرف بديع
وضيع يا شعر أكتر ضيع
ماهو احنا اللي رضينا نهون
بكانزاية وواحد شاي وكرواسون
وإحنا اللي رضينا نتوه
قصاد علبة عصير وجاتوه
وتوهنا أصول وفنون
وجبنا الأخ بروزناه
ولمعناه
وفوق روسنا وطلعناه
فصار له رأي يتكلم
وناس تسمعله وتبلم
لاهو اللي الأخ بيقوله
تسموه شعر ؟
ماهو انتو اللي وافقتوله
يقول الشعر
يا واقعة سودا مش بيضة
دا بيقول إنها قصيدة
مادا اللي كان زمان شغال
بيكتب شكوي وعريضة
بصباعين محشي أو بيضة
هشام الدشناوى
ساحة النقاش