مذكرات وغراميات دجاجة (زجل حلمنتيشى ساخر للدكتور عبدالله منصور)

مجلة عشاق الشعر الإلكترونية. .ممدوح حنفي

تتحدث فيه فرخة بلدى عن تجربتها العاطفية ، فتقول للديك :

نفسى تعرف ياحبيبى

قد ايه قلبى شاريك

حبك لبّد فى قلبى

نفسى بالحب اعديك 

نفسى أعمل لك عزومة

وبمنقارى اغذيك

واقصقص ريش جناحى

يبقى سرير ريش ليك
نفسى..
نفسى عشة تضمنا
نملاها شعير وفريك
نفسى كوشة تلمنا
مع زفة بالمزازيك ،
ومايقولوليش يا فرخة
،يقولولى يا (مسز)ديك
منايا…
منايا اكون ضحكتك
ترسمنى على شفتيك
منايا اكون ديلك..
ومعاك منين ما لاقيك
تنده اقول : لبيك،
دبلة ف صباع رجليك
…وارش مية ،وانش
،ولو عطشت اسقيك ،
وافرش ف العش قش
واهننك ،واداديك
تصغر لى اسكت ..واكش،
مش زى فراخ عاديك،
تكاكى وصوتها يعلى..تأ،
دا بأوطى صوت الاغيك
،واستأذن قبل ماخرج 
واراعى ربنا فيك
تادن وتشجينى
وابقى فخورة بيك..
،اصحى أفتح عينى
على عرف احمروشيك
..على طول تلاقيينى
منضفة المطرح ومنفضة الشبابيك
،وابيض وارقد ع البيض
يفقس كتاكيت حواليك،
كميلة تشبه لك..،
يامز….ياأحلى ديك. ..
______________________
وتحققت احلام الدجاجة…
وبعد شهرين تأكدت أنها كانت فى غاية السذاجة
فقد اكتشفت بعد الزواج،ان هذا الديك مزواج
،وخلبوص وبصباص،ومالوش فى الاستقامة والاخلاص،
فاشتد غضبها وعلا صوتها ،وقالت له :
بقى كل الحب دا
،وتخون؟!...الله يجازيك
مفيش ف الديكة مخلص
يرعى العيش والفريك!!،
ياواطى يابوعين زايغة،
روح ربنا يعميك
بقى فيه ف الدنيا زييى؟
ياللى ما يطمرشى فيك !
الهى.. اشوفك فى حلة..
..مسلوق….يتغدوا بيك
او بتلف ف شواية
..عريان مفضوح ياديك