مجلة عشـــاق الشعـــر الإلكترونية (ممدوح حنفي)
بنحلــــــــم
بنحلم وده الشىء الوحيد اللى من حقنا ....
بنحلم ويا ريت محدش فى حلمنا يزلنا ....
بنحلم تكون إنسانيتنا ملكنا ....
بنحلم محدش ييجى يهدنا ...
بنحلم يا ناس واحلامنا جوانا ....
بنحلم وليه الدنيا فى الحقيقه معكسانا ....
ماشيه دايما عكسنا وعمرها ما جت على هوانا ...
أمتى حلمنا هيصدق فى يوم معانا ....
بحلم فى بلدى أتعامل على إنى إنسان ....
واللى يكلمنى يكون معايا عفيف اللسان ....
بحلم بكرامتى محفوظه وفى يوم عمرى ما تهان ...
بحلم بعادات سيئه تروح طى النسيان .....
بحلم بدنيا فيها الشرف ينصان ....
بحلم بدنيا ميفرقوش فيها بين فلان وأبن فولان ..
بحلم بساعه يصحى فيها ويرجع لربه الغفلان ...
بحلم أن الدنيا ترجع تانى زى ما هى ...
دنيا تكون كل أيامها ورديه ...
دنيا الناس فيها لبعض تكون وافيه ..
يكون بينهم حُب والفه وحنيه ...
دنيا تكون حقيقه مش دنيا خياليه ...
كل ما أعوز شىء أغمض عنيا وأحلم بيه ...
أعيشه فى الخيال مدام فى الحقيقه مش لاقيه ....
لو موجود فى الدنيا أتعب أنا وأدور عليه ....
بحلم بوطنى يكون أبوالأوطان ....
وطن الناس الطيبه الجدعان ....
بحلم بطفل يطلع يلاقى الأمان ....
يكون من حقه يحلم ويحقق حلمه كمان ...
بحلم فى حياتنا مايكونش روتين ....
وكرامتنا ماتكونش سلعه فى بطاقه التموين ...
بحلم بيوم يرجع التعليم تانى تعليم ....
بحلملك يا مصر أنا زى العاده ...
بحلملك يالى للرجال دايما ولاده ....
بحلملك تكونى دايما فى زياده ....
وفى إديكى دايما تكون الرياده ....
بحلم ما يكونشى فيكى مشاكل ....
وعلى رغيف العيش ناسك مع بعضها تتشاكل ...
بحلم بالفقير فيكى يقدر يعيش ...
ولو مد إيده ليكى فى يوم أوعى تقولى مفيش ...
بحلم بكل طلبتنا فيكى تكون مُجابه ...
أحنا مش طالبين طياره ولا دبابه ...
ولا طالبين أسد تجبيه من غابه ...
أحنا طالبين حياه كريمه للغلابه ...
يا ترى حلمنا ده مشروع ...
ولا فى خانه الممنوع موضوع ....
بنحلم بصحتنا تكون سليمه ...
وفى مستشفياتنا نتعامل معامله كريمه ...
بنحلم بعلاجنا يكون موجود ...
وبنا وبين أولى الأمر مفيش حدود ..
بنحلم بحاجات كتير ....
وأهمها يكون موجود الضمير ...
بنحلم وده الشىء الوحيد اللى من حقنا ...
بنحلم ويا ريت محدش فى حلمنا يزلنا ...
بقلــــــــم: عــــــادل الشــــــــهــابى
ساحة النقاش