مجلة عشـــاق الشعـــر الإلكترونية (ممدوح حنفي)
صـَبـــــــاح لـيــكــى أنتِ
...........................
صباحك معطـَّر بطعم الزهور
وهمس القوافى وصوت البحور
صباحك يا ست الملاح
أحلى فرحة
بتبعت فى قلب الربيع
ألف نور
صباحك بلون النسيم والحليب
صباحك بصوت عندليب الطيور
صباحك منعنع بطعم الريحان
يكسر فى قلبى الحزين
ألف سور
صباح الجمال
يا ست الصبايا و رمز الكمال
يا بكرة المفتـَّح بشمس الحياة
يا لمــِّة عيلتنا وطوق النجاة
صباحـِك بيفرد فى قلبى البراح
يعلم ..يسلم يمــدّ الجناح
يفكر سنينى اللى جاية بهواكى
ويغزل بتوبك عباية دلال
صباح التهانى يا أجمل بـِـنـَـيـَّة
يا شمسة وضِلـَّـة وقـُلـَّـة ومـيـَّة
صباحك سألنى
وجالى وشغلنى
فقلت الحبيبة
ولا تكون غريبة
ويكفى انها بنت مصر
الأبيـَّـة
صباحك بيكمل
بكلمة صباحك
يا عصفورة طايرة
وشايل جناحك
صباح السرور
تغنى وقلبك يساع الحبايب
ويسعد صباحك
يجيب اللى غايب
وقلبين يبوسو الأمل
فى اللقا
يا عصفورة تهوى
هوا الزقزقة
صباحك بيمحى الجراح
والشقا
صباح القوافى
وأجمل سطورى
صباح المعانى بخط القلم
صباح غالى رفرف
على أعلى صارى
صباح التلامذة يحيوا العلم
وقهوة بطعمـِك فى ساعة العصارى
يا مالكة لقلبى وروحى ودار ى
صباح من عطرك النادى
يعطر كل أيامى
وييجى لعندى بالضحكة
وأنواره اللى بتلالى
صباح لونه أخضر بلون الغيطان
وساقية وتوتة
وكل العيدان
تسبـَّح إله الشروق والغروب
صباح الأمانى و نـُبــل المعانى
فى أيام سنين الزمان والمكان
صباح ليكى أنتِ
وأنت الحياة
ومهما اتوجعتى
ما بتقولى آاااه
صباحك يخلى الزمان ينحنى
وتبقى العزيزة ورافعة الجباه
..............
بــقــلــــــم ا لــــشـــــــا عـــــــــــر
أ بــــــو عــــمـــــــــا ر ا لـــمـــصـــــــــــــر ى
ساحة النقاش