آخِر الزَّمان ... بقلم الشاعر : محمدامام

مجلة عشـــاق الشعـــر الإلكترونية (ممدوح حنفي)

آخِر الزَّمان
ـــــــــــــــ
الشاي زمانُه جاي
اشرب معايا الشاي
اشرب واحْكيلي ياصاحبي
تِرجع أيامنا ازاي
فاكِر شاي العَصاري
والصُّحبه الطيبه
كانت قلوبنا صافيه
والضحكه قُريِّبه
.................
دلوقت ليه ياصاحبي
لعبت بينا الهموم
وبقينا ليه بنحلم
نِرجع للماضي يوم
إيه اللي اتغير فينا
إحنا وللا الزمان
بيني وبينك ياصاحبي
احنا ف اخرالزمان
....................
جمَعنا الوِّد صُحْبه
ع الفِكْر وع المعاني
وبقينا نقول يا رب
ف الجنه اجمعنا تاني
أتاري نفوسنا غابه
والوِّد كان ياما كان
بيني وبينك ياصاحبي
احنا ف اخر الزمان
.....................
عشناها حلوَّه ومُرَّه
عشناها ف كل حال
وكنَّا ف كل مره
بنْغنِّي الوفا موَّال
أتاري الدنيا خاينه
والناس ملهاش أمان
بيني وبينك ياصاحبي
احنا ف اخر الزمان
.....................
فِينُه العهد فِينُه
جَرالُه إيه وليه
والصحبه الحلوه مالها
مبقتش حلوه ليه
هيَّ النفوس بتغير
العهد ياناس كمان ؟
بيني وبينك يا صاحبي
احنا ف اخر الزمان
....................
أنا بسأل بس ليه
الغالي يهون رخيص
يمكن علشان الدنيا
معَتْش فيها غالي؟
صحيح أنا بسأل ليه
إيه غالي وإيه رخيص
مخلاص بقينا ف دنيا
صُحْبتها يا ناس تسالي
داحنا ف أيام يا صاحبي
الصَّادق فيها تعبان
بيني وبينك ياصاحبي
احنا ف اخر الزمان
.....................
اسمع منِّي ياصاحبي
خِلاصةْ الحكايه
احنا بقينا نفوس
ملهاش ف الشر نهايه
نفوس مريضه وعايزه
تصلحْ قال الزمان .. !
بينى و بينك يا صاحبى
احنا ف اخر الزمان
....................
مصلحتك أولاً
وايَّاك تعمل خير
لَحْسَنْ يجيلك شرّ
يخدك معاه ويطير
دا لِسان حال أيَّامنا
أيَّام ملهاش عنوانْ
ألف سلام يا صاحبي
وسلِّملي علِّي كان
على إيدك أنا سلِّمت
احنا ف آخر الزمان
احنا ف آخر الزماااان
،،،،،،،،،،،،،،،،،،،،،،،،
محمدامام