مجلة عشـــاق الشعـــر الإلكترونية (ممدوح حنفي)
حوار مع شاب
-ايه يا بنى علاقتك بربنا عاملة ايه الأيام دى؟
-اسكت يا صاحبى ،صعبة خالص الصراحة
-ليه كده
- الله المستعان مش عارف ايه الخيبة اللى انا فيها دى
طب دا احنا ف ايام مفترجة رجب وداخل شعبان وبعده رمضان
ماتستغل الفرصة دى بقه
وتظبط حالك شوية
-والله يا صاحبى انا خايف اقولك انا يئست من نفسى من كتر ما بحاول وافشل
- يا جدع حرام عليك اليأس كفر
إن الله لا يمل حتى تملوا
- طب يعنى أعمل ايه بس
-حاول وماتستسلمش لليأس
يا معلم أن الآخرة لهى الحيوان
والآخرة خير وأبقى
سيبك من الهم اللى عايشينه ده دى مش حياة ،دى ايام ما يعلم بيها الا ربنا
-يا جدع دا أنت لو عرفت أنا بعمل إيه هتقرف تكلمنى
-ياعم مش عايز أعرف كل ابن آدم خطاء وخير الخطائين التوابون
-يا باشا دا أنا اتعميت أفلام إباحية
والسجاير حلفت ست الاف مرة انى ابطلها ومش ببطلها
وعلاقتى بالناس بايظة
أبوى وأمى وصحابى وجيرانى دايما مشاكل ، خلقى بقه ضيق
وعلطول قافل عليا أوضتى عشان أريح دماغى م الناس
ولا صلاة بانتظام ولا صيام ولا قرآن ،والمصحف يمكن مفتحتهوش من رمضان اللى فات
و....من الآخر مابعملش حاجة صح خالص
-مش انا قلتلك ماتقولش
المجاهرة بالذنب مش صح
وكمان عايزك تتاكد انك مش لوحدك
دى ذنوب معظم شباب جيلك
لكن عيش بالرجاء والخوف
ترجو رحمة ربنا الواسعة عشان ماتيأسش
وتخاف عذابه وبطشه بالناس اللى بتعصيه وتخالف اوامره
عشان مش تتمادى ومايتختملكش بخاتمة سوء لاقدر الله
كل اما تقع اقف وابدأصفحة جديدة
اعتبر ان معاك كتاب للتوبة فيه صفحات بعدد ايام عمرك وزيادة
استهدى بالله كده وقوم اتوضى وصلى وخللى الحاجة تدعيلك
وأنت ساجد كده قول يارب عنى على نفسى وعلى شيطاني
قول
ياحى ياقيوم برحمتك استغيث
اصلح لى شانى كله ولا تكلنى الى نفسى طرفة عين
وكل ماتفتكر استغفر وصلى على سيدك النبى وبالنسبة للقرآن كل لما تفتكر اقرأ سورة صغيرة حتى
ان شاء الله قل هو الله أحد
ووالله ثقة بالله هتفرج وتتعدل وتبقى زى الفل وهتفتكرنى وتدعيلى
دا ربك قال من تقرب الى شبرا تقربت اليه ذراعا
قوم ياللا مستنى ايه؟
اتوكل على الله
أحمد مرعى
ساحة النقاش