**قولى كان فين ضميرك ؟**بقلم الشاعر يوسف الحمله**

مجلة عشـــاق الشعـــر الإلكترونية (ممدوح حنفي)

قولى كان فين ضميرك ؟

*************

## قولى كان فين ضميرك ؟

لحظة ماجنيت عليا

والدموع جرحت عينيا

لحظة ماغدرت بيا

وبإيدك قتلتنى

وأنا بترجىَ فيك

وببكى قدام عينيك

لا صعبت يومها عليك

ولا يوما رحمتنى

## وقولى كان فين ضميرك ؟

يوم ماعينى بتطفى الشمع

وقلبى بينزف جرح ودمع

لما إخترت طريق ضياع

لما قلبك خان وباع

لما عيشت أحبك وإنت

وإنت بترسم فى الخداع

لما حاولت أرجعك

وعن فراقنا أمنعك

وأنا مش قادر أودعك

وإنت قدرت على الوداع

ولحد كده كتر خيرك

## وقولى كان فين ضميرك ؟

وإنت بتجرح فيا وناسى

إن بجرحك هفضل أأسى

وإن عشانك دوقت مرار

وإتحملت بدون أعذار

ورغم ألامى ليل ونهار

مش هحب أبداً غيرك

## وقولى كان فين ضميرك ؟

وإنت ماشى وناسى وعودك

ظالم خاين كل عهودك

بايع حب وشوق وحنين

بايع عشره بقالها سنين

فايت قلبى لوحده حزين

بعد ماعاش العمر أسيرك

## وقولى كان فين ضميرك ؟

فى يوم الوداع والفرقه

كانت معاك مش فارقه

وقت ماكنت بقولك سامح

فضلت دايماً أسى وجارح

وأنا من كتر عذابى معاك

هنسىَ الماضى وحتى إمبارح

هنسىَ ملامحك هنسىَ كلامك

ومش هضعف تانى قدامك

ولا هتألم يوم لألامك

مهما يكون فى عيونك واضح

ومهما يكون الحزن مصيرك

## ومهما هيصحىَ حتى ضميرك

## عزة نفسى حاجه قوية

## متبت فيها ٠٠ متبته فيا

## مش معقوله هغالط نفسى

## علشان يرتاح مره ضميرك

****************

قولى كان فين ضميرك ؟

بقلم الشاعر يوسف الحمله

23/4/2015