كُنْت زَىّ اليوم بافَكَّر
بيت قَصايدى هايقول ايه
فيكى والأوْزان هاتُرْقُص
بالقَوافِىِ ب لَحْن إيه
واللِّىِ تِقْرا تقول يابَخْتِك
عَ الغَرام اللِّىِ انتى فيه
يحْسِدوكِىِ لجْل جوزِك 
داب ف حُبِّك وانتى فيه
دايبَه والثانيَه اللِّىِ بينكُم
أغْلَىَ من عُمْر الجَميع
والجَميع دُوُل اللِّىِ أصْبَح
ليهُم الشأن الرَفِيِع
والكَلام انْ قالوا هُوَّا
المُفْتَرَض جوزِك يطِيِع
قابلُه ... أو ... مُشْ قابلُه ... لازِم
يبْلَعُه بأسْرَع سَريع
وانتى شايفَه ف عينُه هَمُّه
وراضيَه ... لأ ... وبتِقْنِعِيه
إنّ ب فراقكُم هاينْقِذ
حالكوا م السُوء اللِّى فيه
يلَّلا سافِر .... يالَّلا عافِر
يلَّلا هات لينا الرِيال
دا احنا مُش لاقيين نجيب
الهِدْمَه للارْبَع عِيال
بُصّ لاختَك ... بُصّ لاخْتِىِ
وشوف فُلانَه ... وشوف فُلان
كلّ دُوُل بالنِسْبَيه لِيَّا
(ف حُسْنِىِ) صِفْر على الشِمال
بَسّ بَخْت الحِلْوَه مايل
والسَبَب زينِة الرِجال
جيبُه فاضِىِ ب فَقْرُه راضِىِ
وبَسّ عاوِز ليل جَميل
عَقْلُه بين رِجْلِيِه وناسِىِ
انّ الطَريق صَعْب وطَوِيل
والعِيال عاوزين مَطالِب
وانتا ليه عَصْيان تِشِيل
هَمّ بُكْرا وبُكْرا جايلَك
مَهْما تِهْرَب هاتْلاقيه
بَسّ لو جالَك وحالَك
هِوَّا حالَك مُسْتَحيل
حَدّ هايجَهِّز بَناتَك
أو يجَوِّز لَك جَميل
لمّا يِكْبَر سامى أبْنَك
راح يقول عَنَّك عَويل
لجْل صاحبُه فلان مِعاه
ايْباد وعايش ف النَعيم
وامَّا ساميَه تخُشّ جامعَه
وراضوَه هايجيلها العَريس
يومها قول لى منين تِعَلِّم
أو تِشَوَّر بِنْت جِيِل
جاى يا عالِم إيه هايُطْلُب
مِ العروسَه ومِ العَريس
طَبْ محمد قول صُغَيَّر
وانتا لُه مُش راح تِعيش
بَسّ بَرْدَك سيب لُه شيئ
يغْنِيِه بِدال م يمِدّ إيد
كلّ دا مرات الأنانِىِ
ف وِدْن أُمُّه نهار و ليل
دايرَه تُصْرُخ بَسّ هُوَّا
ودانُه لاتنين مَسْدودين