((مدد مدد))بقلم الشاعر / محمود ناصر

مجلة عشاق الشعر الإلكترونية. .ممدوح حنفي

مدد مدد مدد مدد

مفطور القلب على بلد

فيها اللئام عايشين تمام

وابن الكرام بينجلد

مدد مدد مدد مدد

كل العجب فى دى بلد

فيها الرعاع عاملين سباع
واﻻرنب قال انا اسد
مدد مدد مدد مدد
الحق تايه فى البلد
فيها العمم من غير زمم
حتى الهمم ما تتوجد
مدد مدد مدد مدد
العدل هاجر م البلد
فيها الغنى يفضل غنى
والكوم يزيد من غير عدد
مدد مدد مدد مدد
عينى عليك يابن البلد
فيها الغلبان عايش تعبان
والجوع بيهرى فى الكبد
مدد مدد مدد مدد
ضاعت الكرامه فى بلد
الرقاصين فيها عايشين
والعلم سايبها وشرد
مدد مدد مدد مدد
ازاى راح تنهض دى بلد
وكتير علوم وكل يوم
ايدين بتسعى فى الهدد
مدد مدد مدد مدد
العيبه سكنت فى بلد
موظفين جيبهم فاتحين
حتى الضمير للنوم خلد
مدد مدد مدد مدد
ميت الف آه على بلد
فيها الشريف مكسور ضعيف
من غير ﻻ ضهر وﻻ سند
مدد مدد مدد مدد
ودى عينه ودى بينه
والكل عليها شهد

مدد مدد مدد مدد