مجلة عشـــاق الشعـــر الإلكترونية (ممدوح حنفي)
اللـيــسـتـــــة
............
______________
خليك ساكت
إوعاك تنطق
وابلع خوفك
إسمك هينور
فى الليستة
مش راح تفرق
أول ...آخر
جاى لك دور
ما هى دايرة
ع الكل تدور
إياك فاكر ..خوفك راحة
والدنيا هتمشى وبالراحة
ولا عيونك بكرة تدمع
بدموع فرحة
أيام طارحة
خير وأمان
كدبة كبيرة
عايشين بيها
إمتى هتفهمها يا غلبان ؟
سم ف عسل الكلمة
دواك
دة شطان لابس
وش ملاك
وبيرقص على لحن الموت
وانت ما زلت بتبلع صوتك
رجلك مع خطاويك
بتدبدب
فاكر دورك يوم هيفوت
لأ...هتموت
إقتل نفسك
تنقذ روحك
عبى مواجعك
جوة تابوت
زلزل خوفك
قبل ما تهلك
كدة هتموت
وكدة هتموت
بس الميت ..واقف
..حـَــّى
والمتكـَعـبـِل جوة هدومه
ميت موتة بطعم الذل
حتى ان كان قدامك حى
آكل ..شارب
عايش قعلاً
رايح ...جاى
شمس الدنيا منورة فوقـُه
لكن عينه ما شافت
ضـَــىّ
شوف حواليك
الناس شقيانة
وجع الهم معـَشـِّش فيهم
عين برصاصة راحت
مش راجعة
والتانية جنبها سهرانة
عمرها ما بتقبل بالظلم
إصحى يا عم
حـُطّ لنفسك مبدأ واضح
مهما هتكدب وتعيش كدبك
لازم جاى لك يوم تتصارح
شوف أرقام الليستة لفين ؟
واختار رقمك واحفظ شكله
يومك جاى
إسمك هينور فى الليستة
خوفى تبيع نفسك
فى هدومك
ولا يفضل منك غير إسمك
مع كام دودة ف شكل شطانك
عاملين مـَسـكـَن
جوة الجتة
........
بــقـــلــــــم ا لـــشــــــا عــــــــر
أ بـــــو عـــمـــــــا ر ا لــــمـــصـــــــرى
ساحة النقاش