مجلة عشـــاق الشعـــر الإلكترونية (ممدوح حنفي)
ســـو بــيـــــــا
()()()()()()()
واقف على راس الحارة
وينادى يخبّط بصاجاته
بيغنّى على موال ليلُه
أو يِمكن على ليل موالُه
وبصوت
ولا كروان الليل
يلا الـســــــــــــو بـيـــــا
قشطة يا بيــضا
رابِط قِدرة كبيرة ف وسطه
تِـقسِـم ....وِسطه
وبيضحك برضه وبينادى
يلا يا كل ولاد الحتّـة
مين راح يشرَب .....؟
مين قال سوبيا
بقـرشين صاغ........؟
قِشطة يا سوبيا
حَـليب ربانى
ويخبّط بصاجاته من تانى
كل عيال الحتـّة يروحوا
يعملوا دايرة كبيرة حواليه
بِت يا نِعمة
إدّى لاخوكى شويّة سوبيا
لأ....و انا مالى
جاب بفلوسه كلها نداغة
ما ادانى واحدة
بس ادّيله ...علشان خاطرى
قامِت سـَمرا ...البِنت السمرا
خُـد يا سلامة ...إشرب حبة
لأ مِش عايز
ما انت اديتنى امبارح برضه
قِصة حُب ..وكِبرت بينهم
حبّـة بحبّـة ...بحبّـة سوبيا
طِعمة يا سوبيا
الراجل أبو عيون سودا وعِـمّـتُـُه بيضا
قال .هـَدّيله يا سمرا يا غالية
خد من إيدى حبة سوبيا
إشرَب يا سلامة
كان بيبيع خمسين كباية
ياخُـد بس تَـمَن عشرين
يدّى اللى معاه والــ مش لاقى
ما يفَكّرشى يعشّى ولاده بايه ومنين
ربَك يرزُق
وام إمام فى الشّباك واقفة
شايفة الجارة بنُصّ العين
مادة يا دوب كدة نُص دراعها
خايفة لا ييجى عَم أمين
ماهى عيبة الشارع يلمَحها
ديل جلابيتها ...دة عار لو بان
هات كباية يا عم حسين
هو الصوت اللى يمّيزها
شباك بيتها ف أول دور
خُدى يا سمارة ...إدّى لخالتِك
دى على حسابى يا ام إمام
لأ يا نداشة أمين يِِدبَحنى
إوعاك يِعرَف ...يِخرِب بيتى
يودّينى لامى
هُبّ وطَب الحاج أمين
جريوا ولاد الحِتة عليه
عملوا له زيطة
واتأخّـر ....هُـمّا دقيقتين
كانت دَخلِت ورا شباكها
إدّارِت وف غمضة عين
حِلوة يا سوبيا
عسل الفُقرا ....خُد كبّاية يا عَم أمين
تُشكَر ...تِسلم ايدك. يا ابو عرباوى
سوبيا ف طَعم حارِتنا تمام
ألفين هنا والشفا ويّاهم
غالى وأخ يا حاج أمين
يا بو عرباوى ...يا عِشرة يا غالية
قلبك أبيض زى السوبيا..ألف سلامة
جـَـــــــبـَرِت
رَوّح يِـقلَع تُـقـل همومه
فـَك القِـدرة وفَضّى هدومه
قروش فَـضيّة ...خُـدى يا سَنيّـة
فلوس السكر والسَبـّوبة
والباقى ليكى ...حَريَّح نوبة
واطلع ..أسرَح
كل عيال الحتة بتفرَح
لما بيسمعوا رَنّ صاجاتى
واغنّى يوماتى ....قـِشطة يا سوبيا
طِعمة يا سوبيا ....عسل ربّـانى
....................
بــقـــلـــــــم ا لـــشــــــا عــــــــــر
أ بـــــو عـــمــــــــا ر ا لــمـــصــــــــــــر ى
ساحة النقاش