**مش انسان** بقلم محمدامام**

مجلة عشـــاق الشعـــر الإلكترونية (ممدوح حنفي)

مش انسان
ـــــــــــــــــ

مش انسان

اللى يهون عليه الدم

دا مش انسان

اللى بيزرع فتْنه وهم

اللى ميرحم لوعةْ أم

اللى ميعرف معنى الحِلم

ملعون ف السنه وف القرآن

ومش انسان

اللى تاه فى احساسه معنى الوطن

اللى مات جواه ضميره و قلبه الكفَن

اللى دانْ دينه وبَدَرُه فُرْقَه ومِحَن

دا كيان ممسوخ ملهوش عنوان

ومش انسان

جوَّاك ايه مكان القلب قولِّى

مستحيل يكون دا قلب

ليه غشيم كظيم تملِّى

انت ديب ولا انت كلب

انت ديل ذليل وحجر صوَّان

ومش انسان

ظلمتوا الدين وفتنتوا الحق

و ضمير الحق منكو فى توهه

ليه شايفين ان انتوا أحق

و ياما حقوق انتوا اغْتلتوها

داللى يشوف الباطل حق يبقى شيطان

و مش انسان

آه يا مرارة قلب النخوه

غدر و خسَّه باسم الدين

شِرْعِة طه بلوها بْبَلوه

مين كان قال الجهل دا دين

داالغادرخاين كلب جبان

و مش انسان

آه يا حبيب مبعوث بالرحمه

كنت طبيب لخشاش الارض

رفعوا شعارك يفطه فى زحمه

و كرَّهوا فيهم طوب الارض

صاحب دعوه و بالطغيان!

دا مش انسان

العقل بيسأل انتوا مين

انتوا دنيا و لَّا دين

انتوا فتنه ما بين الاتنين

سوِّدتوها دنيا ودين

و اللى يتاجر بقيم دينه

لابد نهايته تكون خزلان

و مش انسان

و اللى تهون عليه اوطانه

لابد تنبذه الاوطان

و مش انسان
،،،،،،،،،،،،،،،،،

محمدامام
ـــــــــــــــ

https://www.facebook.com/pages/%D8%A7%D9%84%D8%B4%D8%A7%D8%B9%D8%B1%D9%85%D8%AD%D9%85%D8%AF%D8%A7%D9%85%D8%A7%D9%85/184579044929270?ref=bookmarks

الشاعر/محمدامام

كاتب · ‏2,677‏ إعجابًا