((من صغرنا دارسين عن رقة الإسلام ))بقلم أ / عبدالله الغلبان

مجلة عشاق الشعر الإلكترونية. .ممدوح حنفي

من صُغْرِنا دارسين

عن رِقِّة الإسْلام

وانُّه لا يُمْكِن يوم

بالسيف فَتَح بِلْدان

وانّ المَغازِىِ كات

لجْل انّ فيه مَظاليم

بيعانوا من ظالمين

واكلِيِن حُقوق الناس

يَعْنِىِ الدِما والمال

والسَبْى للنِسوان

ماكانوش ف يوم أهْداف

لصِحابِة العَدْنان
والحال فَضَل هِوَّاه
فِ مَدارِس العُرْبان
ديننا العَظيم بيْصُوُن
آدامِيِّة الإنْسان
والرِفْق فيه مَطْلوب
حتَّى مع الحَيوان
ذَبْحُة بِدُوُن مايشوف
سِكِّينِة الجَزَّار
وايَّاك تِشِيِر بسلاح
حتَّى ولو ب هِزار
فى وِشّ بَنِىِ أدمين
عُزَّل ولو كُفَّار
لكِنْ ظَهَر ف الجِيِل
مَجموعَه مِ المَلاعين
بيقولوا قال عاوزين
يهْدُوا البَشَر للدِيِن
والدَعْوَه دِىِ هاتكُوُن
بالذَبْح بالسِكِّين
ولمين ؟؟ ياريت للطير
والبَطّ والخِرْفان
دا الذَبْح ده هايكُوُن
عَ الشاشَه للإنْسان
ويجيبوا قال أحاديث
وآيات من القُرْآن
تأويلها مايقولهُوُشْ
حتَّى اللى لابسُه الجان
فيه إيه ؟؟ جَرالكم إيه
فين حِسِّكُم يا اخْوان ؟؟
جِوَّا الضُلوع دى قلوب
وللا حَجَر صَوَّان ؟؟
وعيونكوا دى بتْشوف
الرُعْب فِ المذْبوح
ساعِة طُلوع الروح 
وللا انتوا مِ العِمْيان ؟؟
طَبّ لَمَّا ييجِىِ الليل
بِتْناموا ؟؟ طَبْ وازَّاى
قادرين على أشْباح
الناس دى ف الأحْلام ؟؟
دا .. انا .. اهه .. بدون ما باشوف
تَصاوير ولا أفْلام
ساعِة مَ حَدّ يقول
وَصْف الصُوَر بكَلام
لا عيونى تِهْنا بنُوُم
من قَسْوِة الأحْلام
ولا بُقِّى يهْنا بِ زاد
من قَرْفِة اللِّى اتْقال
يااااااااااارب من دِىِ الناس
ارْحَمنا يا رَحْمَن
واهْلِك جُنود إبْليس
أعْداء بَنِىِ الإنْسان
واللى يقول إسْلام
يوم انْتَشَر بالسيف
خَلِّيه يذُوُق السيف

والذَبْح طَعْمُه ازَّاى