((**أحلمى**)) بقلم الدكتور / صبرى إسماعيل

مجلة عشاق الشعر الإلكترونية. .ممدوح حنفي 

إحلمى وارسمى فى القلب بسمة

تنتهى بيها شجونك

واغزلى دنيا الأمل

خلى حِلمِك بين عيونك

إوعى نار الدمع تجرى فوق خدودك

إوعى همس الحُزن يطفى لون جفونك

أو يكون الحِلم ذكرى

بالأمل هنروح لبكره

تبقى جنة خيرها أحلى

واحلمى—إحلمى
*******
إحلمى يانور صبايا
إحلمى زى الصبايا
وابنى أحلامك بحلمى جوّه بستانك معايا
تلقى نور الفجر طالع
والندى بالفرح يروى كل نبته بالمزارع
والزهور ترقص بخفّة
فى الجناين والشوارع
والنسيم ينده عليكى
لاجل برضه ماتحلمى---إحلمى
*******
إحلمى واغزلى بالحرف كلمة
يبقى نورها جوّه قلبك
تلقى ليل الغيم يولّى
والنعيم يسكن فى دربك
واعزفى أجمل نشيد
نور وهالل من جديد
وافرحى يانور عيونى
وبحنانك تسلمى---إحلمى

أعجبنيتعليق