((==كشف حساب==))بقلم الشاعر / أبو عمار المصري

مجلة عشاق الشعر الإلكترونية. .ممدوح حنفي

تيجى نتصارح

هافرض ان الحلم دة ممكن

يبقى حقيقة

واحسـِن ظنـّى

واقول ان انتِ جـدّ بريئة

وان ال حاصل غصـبـِن عنك

شئ فوق طاقتـِك

وانى كمان أوقات من عـُمرى

شايف إنك

خاطية ف حقـِّك
لما توافقى بقتل ولادك
وانا ميت خاطـى
لما قبـِلت بإنى أطاطى واعـَدّى الريح
واخرس صوتى
شـُفتى ازاى انا حد صريح؟
كدة نتصالح
إكشـِفى ورقـِك
واكشـِف ورقـى
بس انا غيرك
خايف دايماً
خـايف جداً
مش على نفسى
برضو عليكى
خايف اقول فين حقك وانتِ
هان الدم وشايفة عنيكى
يا ما صـَرخت ف عزّ الضلمة
ياما ناديتك
تحت البرد حلمت بضمـَّة
يا ما سـَكـَنت ف قلب الخندق
رافع رايتـِك
ورضيت جوعى وذلى وقهرى
واستنيت لو حتى إشارة تطمن قلبى
إنك راجعة
إنك ناوية
إنك حتى تراجعى حسابـِك
صدقتى الكداب فى كلامـُه
وفتحتى ميت باب لكلابـِك
وقفلتى ف وشـّى بترابيس
وانا لا انا عنتر ولا عتريس
ولا فاتح...... ولا مينا
هاوحـَّد مليون قطر
دة انا واحد باتعشى مرار
مـِتعـَرّى باغـطِّـيكى بلحمى
رافض للذل وللعار
وانت بضعـفـِك وهوان نفسك
برضو ما هنتيش مرة علىَّ
كنت باقول وباصبـَّر روحى
والحس وجعى
وادارى جروحى
بس تعبت بجد كفاية
لما تكـَفـَّرى راكـِع ساجـِد
وتصلى هناك ورا إبـلـيــس
طول عمرى على حافة ظنـّى
شايف إنك فىَّ ومنـِّى
وانت لا شايفة الصورة معدولة
ولا كاشفة جروحى المـَبلولة
بصديد نوحى
ردى علىَّ وقولى خلاص
قولى انا شايفة وسامعة وحاسـَّة
قولى هلملم كل سنينى
وهاضخ الدم ف شرايينى
قولى استنـَّى.... وانا هاستَـنـَّى
لو حتى بوجـَعـــك ترمينى
أنا اشيل وجـَعـِك
والحس بلسانى سنين دمعـِك
واعمل قلبى مداس وتخطـِّى
واعمل روحى جسورللخطوة
خطـّى علىَّ ...عدى وروحى
لـِمـّى التايـِه
لـِمـّى الضايـِع
إفتحى كشف جديد لحسابك
تلقى الكل هناك على بابك
وانا اولهم مادد إيدى
مادد شريانى مع وريدى
مستنيكى تقولى انا راجعة
يلا قولـيـهــــا

...........