مجلة عشـاق الشعـر الإلكترونية .. ممـدوح حـنفي
إيه يا دموعى
فين هربانة ؟
جـَفـّيـتــى .ولا عصيانة ؟
إبن ايامى وفرحة عمرى
خلاص راح منى
أبكى عليه ؟
ولا ابكى عليكى أنتِ يا بلدى ؟
ما هو راح فيكى
أهه راح ليكى
كان فاكر إنه بيفديكى
شال أيامه ..فات أحلامه
وبعمره ينور لياليكى
حالف لا يرجـَّع غناويكى
راح ما رجعشى
وانت التايهة
لا لقيتك .. ولا هو رجع لى
قلبى يا ضايع منـَّك نبضـّك
فين شريان العمر وفرحه
كل آهاتى ماتنفع جرحه
آاااه يا ضنايا
كنت معايا
فهمتـَك ..أرضك دى أمانة
وبروحك يابنى هتفديها
إوعاك تبخـَل
إيه عـلـِّمتك ؟
جايز إنى بإيدى قـتـَلتـَك
خايف أندم
بس انا عارف جـَدّ شهامتك
آخر كلمة .. رصاصة ف قلبى
إدعى لى ......يا با
قلبى دعا لك ..لكن خايف
قلبى النازف من غير دمع
وراك بيتـا بـعـَـك
ما تخيلتش ..ولا صدقتش
يوم ما لقيتك جاى ملفوف
فى كفوف وجعك
آااااه من وجعـَك
آاااه من وجعى
قوم يا ضنايا
قـَطـَّع منـّى ورقـَّـع جـَرحك
خد من عينى يا ضـَـىّ عيونى
واغسل دمـَّك
ولا بلاش ..دمك طاهر
خد قلبى الوالع طفـِّيه
خـبِّـى جراحه فى جيوب كفنك
بس أمانة عليك تسامحنى
إنى بإيدى بنفسى بعتـَّك
تأِرفع رايتك
وبإيدى اللى بقيت باكرهها
عــايز اقطعـها
فى ترابها وفى احضانها دفنتك
لأ مش نادم..إنى سجـَنتـَك
سـِجنـَـك أرحـَم
والموت فيها ..أحـَنّ وأرحـَـم
الموت لجل عيونها
حـيـــاة
نام يا ضنايا
واحضـُـن شـَمسـَك
نام يا ضنايا وسيب لى الآااااه
.................
بــقـــلـــــم ا لــشــــــا عــــــر
أ بـــــو عـــمــــــا ر ا لـــمـــصــــــر ى
ساحة النقاش