((**دم أخويا**))بقلم / الشاعر طه إبراهيم

مجلة عشاق الشعر الإلكترونية. .ممدوح حنفي

دم أخويا

*** شعر عاميه

دم أخويا زي دمي

هو أخويا وابن عمي

هو أخويا حِته مني

همّ أخويا هو همّي

اسأل امك واسأل امّي

لما كنا صغيرين

كنا جوه الحاره نلعب
والبراءه ع الجبين
لما نزعل أو نخاصم
تيجي أمّك و لا أمّي
كلنا نحلف يمين
والضعيف يلقي الحنان
لما يلقي عتاب ولين
ثانيه نبقي زي نسمه
تشرح القلب الحزين
هو ده كان شعب مصر
اللي شفته من سنين
كنت عرفه زي نفسي
زي ظلّي والقرين
لما أسافر غصب عني
كنت أشعر بالحنين
كل واحد راح ف حته
المهم اختارله سكه
سكة الزمن المهين
المهم يفضل معاند
والخصام يفضل سنين
ليه يا عمي ليه يا اخويا
هو ده من شرع مين
الدماء منصوص عليها
ف الشريعه وأي دين
ليه نفرق ف الدماء
ليه نقول ده دم غالي
ودم تاني زي ماء
فوء يا عمي فوء يا اخويا
حرمة الدَّمين سواء
ليه نفرق ليه نشرق
ليه نبالغ ف العداء
دينّا واحد زي بعض
صوتنا واحد ف الدعاء
لو نحكم فينا عقل
لو نخطط للبناء
يبقي لينا دور وشكل
قلب واحد ف الولاء
مصر أكبر من الجميع
لو نفكر ف الفناء
كله ماشي كله راحل

ليه نحارب ع البقاء