مجلة عشاق الشعر الالكترونيه .. ممدوح حنفي
وإنت ماشى فـ الشارع .. بين الإشارات
تلاقى شخص ضايع .. بين العربيات
وبياع حاير .. من أنــــواع السجاير
وفوطه صفره .. وعربيه حمره
وتانيه من غير نمره .. وشحات بيعرج بالآهات
ودخان قهوه .. وشيشه حاميه
وناس بتتكلم فى الجنيهات
يقف فى الإشاره .. كارو بحماره
وأبو عربيه حمره .. إبن الأمره
ودخان سيجارته طاير أشتات
يعمى الشحاتات .. تشم منه ريحة الألوفات
وعلى الناصيه بياع نايم
يشخر ويحلم بأحلام المليونيرات
يصحى يبيع الندم وهو هايم
ويبيع نفسه على حسب التسعيرات
إيده للجنيه مشتاقه ..
مشتاقه خالص مشتاقه
يحلم ويفكر .. إمتى وياه يتلاقى
يصحى على صوت الكلاكسات
يفوق يبص على القهوه والكفرانين
خدودهم صفره حزينه متعكننين
غلبهم طالع فى الدوسه والحوسه
والكراسى منطوره فى كل الاتجاهات
وعليها أغلب ناس أموات ..
فى بؤهم أحلى شيشات
وجيوبهم يادوب تشخشخ بشوية فكات
نرجع لزحمة الشوارع وأزمة المواصلات
وبلطجية الميكروباسات وزعيق الكلاكسات
تلاقى أخينا واقف .. لا فاهم ولا عارف
على تاكسى فايت .. ريقة ناشف
عينه فى راسه .. وصوته بقى صيحات
أعبر وعدى الإشارات .. وأدخل فى المدينه
تلاقى أفراح وزينه .. وبردو القلوب حزينه
رغم فرقعة الزغرودات
دا المديون بيجوز بنته
اللى عريسها ماشا الله عليه
سيما طلعته و قصته
وجيوبه أنظف من إيديه
آه يانارى وياعينى عليه
ومع كل ده عادى خالص تشرب الشربات
والعواجيز قاعدين يتشدقوا
على العروسه .. وكل البنات
والدايخين واخدين ركن
ونازلين ظبط فى الطاسات
والمزيكا والرقص على ودنه
وعلى حسب المزاجات .. تلاتات تلاتات
وعريسنا مزنوق فى البدله
وعروسته .. حطه وداهنه كل الأحمرات
والظيطه والهيصه من أول الشارع والإشارات
لحد ماتوصل لأصغر الحارات وأفقر الطبقات
هى دى البلد .. وهمه دول الناس
موالد وحمصات .. افراح وشرباتات
أحزان وقهوات .. عرسان وعروسات
هى دى بلد التحف والأنتيكات
بلد الفهلوه .. وخد وهات
بلد مافيش فايده
من أيام الخواجات والبشاوات
ودلوقتى إنزل الشارع
وإتفرج وإنعم بالحوارات
حتلاقى أحلى فرجه .. واصعب دمعه
وأطيب ضحكه .. وأغرب الحكايات
من أول الشحاتات والأسطوات
لحد الأفنديات ومعاهم البهاوات
حاسبوا .. إصحوا .. فوقوا .. يا أشتات
................................................
........((ممـــدوحـــيات))........
كلمـــات : ممـــدوح حـــنفي
.......................................
ساحة النقاش