حبيت حبيبتي
حبة حبة
وكل يوم
أزيد محبة
شفايفها بمبي
وخدودها ورد
وعيونها فيها...
... فيها كل ود
كل أما أشوفها
والمح عينيها
ألاقي نفسي
بتشد ليها
ياما نفسي ابقى
راجل صريح
واروح عليها
واقول جريح
هاقول حرام
هاقول كفاية
انا قلبي داب
فين الهداية؟؟
هاقول يا بنتي
أيه كل دا؟؟
دا ربي خلقك
ساعة صفا
أبدع في خلقك
صور في حسنك
وبعتني ليكي
عشان أحبك
أحب عينك
واحب خدك
واحب رمشك
وأحب قدك
أحطك في قلبي
واقفل عليكي
تحسي نبضي
بينادي بيكي
عايزك معايا
في كل يوم
شابكين ايدينا
مفيش اي لوم
أخدك في حضني
وأحتويكي
أبوس عينيكي
أخاف عليكي
عايزك معايا
وجوه بيتي
واجري وراكي
وأقرصك
وتجري مني
وأحصلك
وتفلتي
وأمسكك
وتضربيني
وتزغديني
اقعد أمثل
إني اتوجعت
تجيلي تاني
وترجعيلي
تقوليلي مالك؟
وأعكشك
وأحط راسك
ما بين كفوفي
وأبوس جبينك
وهاقعد أشكر
في اللي خلفك
ويوم ولادتك
تلاقيني جنبك
حاسس بألمك
وبعذابك
حاطط إيديا
من بين سنانك
تعضي فيهم
وأصرخ بدالك
ولما ييجي
ابن اللذين
هاقوللو ليه
توجع حبيبتي
انا هامسكه
وهاضربه
تقوليلي سيبه
ابن حبنا
ولما يكبر...!
.!!.. ولما يكبر
ها.....!!!!!
!!!!...؟؟؟؟
خلاص... خلاص
بلاش خيال
دا كونها ليا
شيء محال
أنا اصلي فقري
وعمري يابني
ما هابقى زوج
أو ابو العيال
أجيب منين
حبة فلوس
دا اللي في جيبي
ما يجيب فانوس
أنا مش لوحدي
في الحالة ديه
دا كل شاب
عايش القضية
يقعد ويحلم
يخطط ويرسم
إزاي هيبقى
الواد المعلم
ودا كله ليه
عشان بلدنا
عايش في خيرها
باشا وبيه
واكلينها والعة
عايشينها سمعة
قاعدين يحبوا
ويقيدوا شمعة
لكن احنا يابني
ضاربينها صارمة
شادين حزامها
على بطوننا
اسمع يا صاحبي
مفيش حلول
غيرك تكون
عفريت وغول
طب ولا أقولك
خد مني دول
حبة حبوب
مالهاش مفعول
حبة شجاعة
حبة جراءة
حبة رجولة
حبة كفاءة
إفرد في طولك
شد في كتافك
طرقع رقبتك
حمر عينيك
واخرج معايا
بره الشوارع
أصرخ معايا
ردد ورايا
حراااام عليكم
كفاية فقر
نبوووووس إيديكم
كفاية شر
سيبونا نخرج
بره البلد دي
سيبونا نطفش
سيبونا نهرب
يإما تيجوا
وتدبحونا
وتنفخونا
وتسلخونا
ممكن ساعتها
تلاقوا لحمة
تأكلوها
لأهالينا
بس انتو ظلمة
هتحوشوها
وتخزنوها
وعمركم
ما هتبيعوها
حرام عليكم
ما ترحمونا
طب اسخطونا
أو ادهسونا
طب اسحلونا
طب اردمونا
طب في فرن واسع
وادلقونا
سايبينا ليه
للكلاب ينهشونا
وللبنات يهيجونا
وفي القهاوي تعيشونا
حرام عليكم
ما تسمعونا
ما تفهمونا
ما تريحونا
قايمين بثورة
عشان نطالب
بحق شعب
مالوش مطالب
ثورتنا ثورة
غير أي ثورة
دي ثورة سهلة
مفيهاش مناورة
ثورتنا تزعق
بأعلى صوت
خنقتمونا
طهقتمونا
اقتلونا اقتلونا
الشعب مش طالب
إنه يعيش
دا الشعب طالب
إنه يموت
آدي الفقر
وآدي علته
وآدي الحب
وآدي ثورته
عدد زيارات الموقع
173,968
ساحة النقاش