ورق
ورق
ورق
أفكار ورق
أشعار ورق
شعارات ورق
ثوار ورق
أحلام ورق
حكام ورق
ورق ورق ورق ورق
آه يا وطن عالورق
الحلم فيك
على لورق
خدعني فيك صوت الورق
و سافرت فيك عالورق
و حلمت بيك بره الورق
بستان ظليل
و قلة للعطشان سبيل
و ناس ونيل
و مشربية و حمام هديل
وبنت حلوة
و واد جميل
هجموا التتار
كلاب ورق
قتلوا الرسوم عالورق
و قالوا حلمك مستحيل
و حتى لو كان على الورق
وكفنوني
بالورق
و ضيعوني
في الورق
ورق ورق
ورق ورق
مقهور و ماشي في الورق
غرقان غرق
حلمي انسرق
شايل على قلبي الهوى
من غير دوا
الا الورق
و فجأتن
لمع .... برق
و قابلتها فوق الورق
مع انها
مش في الورق
ولا عمرها كتبت ورق
ورق ورق ورق ورق
شفت العروسة ع الورق
الشمس ؟ لأ
البدر ؟ لأ
النجمة ؟ لأ
البحر ؟ لأ
الشعر ؟ لأ
السحر ؟ لأ
لأ دي الحقيقة المرعبة
قاسية و بسيطة وطيبة
زيك و زيي
و زي بنت باحبها
زي الوجود والحب
و الناس كلها
كده الربيع
كده الجنى
كده المسائل تنحسب
كده الكلام
كده الغنا
كده القصيدة تنكتب
آه يا سناء الجرح يا بنت الألم
كل الرايات اتكسرت
وانتي العلم
ورق
ورق
ورق
ورق
آه يا وطن غرقان ورق
و عملت أنا مركب ورق
و سندباد ملاح ورق
وسبحت فيك بحر ورق
و صارعت فيك حيتان ورق
و عشقت فيك لحظة عرق
كشفت كنوزك يا وطن
تحت الزبالة و الورق
ورق ورق ورق ورق
يادي الربيع لاخضر
وسط الخريف طالع
يا نبعة الصحرا
قلبي حزين والع
اسقيني يا شابة يمكن تطفيني
و ان جفت المية
ريقك يكفيني
آه يا سناء القهر يا بنت الأنين
يا ضربة الناس الغلابة المظلومين
يام العيون المغرمين
أبصر يمين
يا هل ترى بعد الوطن بتحبي مين ؟
ردي على الأحباب يا زهرة العناب
ان كان دعاكي الهوى
و ان كان فتحتي الباب
آه يا سناء الرعد يا بنت الحسوم
يا نجمة يا متحيرة
بين الغيوم
بأسال و انا من كسفتي في نص الهدوم
قلبك صغير ع الهموم
و ازاي قدرتي تعشقي
وطن فسيح
مطعون جريح
الدنيا طلعت للقمر
و هو متكتف كسيح
يا هلترى قلبك محيط
و لا انتي يا بنت المسيح ؟
آه يا سناء الورد يا بنت الربيع
يا أغلى زهرة اتفتحت هذا الربيع
ورق ورق ورق ورق
و قعدت ألون في الورق
عصافير ورق
أشجار ورق
أزهار ورق
أنهار ورق
قصر الكلام جبت الربيع
و نقشت منه ع الورق
طرزت بالياسمين
طرحة وعشر فساتين
و لضممت عقد الفل
لجلك يا ست الكل
و فردت غصن البان
على قدك الفتان
وفتحت الحنة
شباك على الجنة
طليت من الشباك
قابلوني ألف ملك
رافعين علة الأعناق
علم الشهيدة سناء<!-- stamps hack --><!-- / stamps hack --><!-- / message -->