شلبية وفتحية قاعدين على المصطبة مع كوباية شاى وشوية فاصوليا بيقطعوا فيها
شلبية: عايزة عريسك يكون شكله ايه يافتحتح؟
..فتحية: عايزاه.. كدة يكون واد فى 22 عشان يبقى صغنوتوت كدة وحلو
شلبية: يهدك عايزاه لما الناس تشوفه يقول اكبر منك..
فتحية: لا يابنتى ماهو انا اصغر منه بتلات سنين..
شلبية: ياعبيطة دول مايبانش عليهم سن !!
فتحية: طب عايزاه يكون واد روش كدة مش معقد وينكدها عليا..
شلبية: انتى يابت اتهبلتى فى مخك عايزاه لما كل واحدة تشوفه تقول مين الواد الروش الامور دة !!
فتحية: اه طب يكون عينيه خضرة وشيك كدة وواد انتيكة..
شلبية: انتى يابت هتيجى لى الضغط بدرى عايزة لما الناس تشوفه يقولوا دة جوزها احلى منها مش عارفة بصلها على ايه..!!
فتحية: طب اقولك احسن حاجة اتجوز واحد يكون مبهدل كدة بلاش المحرتف دة
شلبية: ولما الناس تشوفه معاكى يقولوا عليه ايه متجوزة بياع ترمس دى ولا ايه !!
شلبية: يابت ياخايبة مش عايزاه يكون له كلمة عليك ولا تهشيه كدة يقوم يقولك طيب ياحبيبتى !!
فتحية: طب نخليه سى السيد
شلبية: عايزاه يمشى كلمته عليك ومايبقاش لكى كلمة فى البيت وتبقى زى الفرخة قاعدة تهشى وتنشى ويجيبك شمال ويمين !!
فتحية: سيبك من دة كله طب خليه يكون كدة واد مثقف وبيعرف يتكلم
شلبية: يادى النيلة عليك عايزة تتجوزى واحد يقعد طول النهار يتفلسف عليك بالكلام اللى بيقراه فى الكتب ويقولك دة انتى مابتفهمييييش الا فى الطبيخ..!!
فتحية: خلاص اكون انا مثقفة عنه..
شلبية: عايزة الناس تقول عليك ايه متجوزة واحد عبيط ومش دريان بعيشته
فتحية : خلالالالالالالالالالالالالالاص مش عايزة اتجوز
ساحة النقاش