كروش لحرام
نبدا ب الصلا والسلام
على سيدنا محمد خير الانام
خوتي الزجالة الكرام
بغيت نوصل لكم هدرة وكلام
الابداع ماشي تصاورك ف الفايس
ماشي يناقشوك ف الاعلام
ماشي مهرجان فيه الراجل ولمدام
ماشي ماكلت الزرود ها لمرقة ها الطعام
سلاحكم افكار وقلام
فرق بين لحلال ولحرام
نبغيك ف الرجولة صدام
لاتخاف تخزن راسك ف التراب كيف النعام
انصر خوك ضالم ولا مضلوم هادي وصية الاسلام
نبغيكم كيف سربة الخيل قايدها علام
الزجال الراقي من الناس العظام
ما تربيت على حقد ولا على خصام
مانا مبدع ما نا زجال
هي حروف صاحبتني عايشين ف انسجام
شعارنا السلم والسلام
ما نحب نكتب قصص الحب ولغرام
اليوم نتكلم على كروش لحرام
شفارة نهبوا المال العام
فقرونا ضربونا تحت لحزام
طفاو شمعة مسقبلنا عايشونا ف الضلام
حكمونا حكام سدوا الفام
كرش لحرام
قلوبهم قسح من لحجر
ما يعرفوا لاصلا لا صيام
من الصفر وصلوا لمقام
كان بحالي فقير
جاري سكن ف البراكة
داق الجوع والتخمام
اليوم الفيلا ب الرخام
لابسين والطاوس ولحمام
شوف المجدام ولد المجدام
استغل الفرصة زاد خطوة القدام
بان ف الصحافة والاعلام
مسكين عايش ف الاوهام
نسى الموت ونسى الجنة وجهنم
الله يهدي كروش لحرام
نعيشوا اخوان
محكومين وحكام
شعارنا الاخوة والسلام..................................................
زجال الغرب
حسن البرارحي
سيدي يحي الغرب
