ما نا فاسي ما نا مكناسي
ما متحزب ولا سياسي
السياسة عندها ناسها السي
الله يرحم بوعبيد وعلال الفاسي
ما طامع ف مناصب ولا كراسي
زجال راكبني شلا هبال مع حروفي نقاسي
عييت نكتب ضرني راسي
حظي منحوس ف الهم نخمم طار نعاسي
قهرني الزمان كبرت ضاحوا ضراسي
ف الموقف نهار كامل واقف
نخدم نخلص الما والضو نوفر لباسي
لابس عايش على قد قياسي
قالوا ناس زمان
حفر الساس ب لقياس
ماتعرف لك ولا الناس
تمنيت نكون برلماني
ندافع على حقوق الشعب
ب كل احساس
ف الحوار نحط البيضة ف الطاس
كلامي قرطاس
مرة مرة ندوز ف الاداعة حوار خاص
بحال شباط بنشماس
حتى انا عارف الهدرة تهراس الراس
السياسة جبهة ولباس
ف البرلمان الشخير والنعاس
السكنى فيلا عليها عساس
ما عندي زهر خو يا انس
حياتي كيف الفاس
عييت نخدم باش نجمع الدرهم
صبري فات القياس
هدا حالي ما كاين باس
الدنيا ناس وناس
هدا زمان الكحط
والفتو والفني صاحبي الزلط
من الزمان ولمرا واكل الشحط
ضحكت تفكرت لعب الصغر
كنا نقولوا على الزهر
يا مسعود يا ضراب العود
الدنيا حظوظ
ماشي كل غني مرضي
ماشي كل فقير مسخوط
رزقي ورزقك مكتوب ف اللوح المحفوظ
الدنيا عند الله ما تساوي جناح باعوظ
لو كان عندها قيمة
ما يعطيها النصارى وليهود................................
زجال الغرب
حسن البرارحي
سيدي يحي الغرب