بقينا نخاف
احمد صبري
خلاص بقينا نخاف
رجعنا لاْصلنا يعني
اهلا وعاش من شاف
اللي خاني واللي باعني
واللي كنت بتحسبه
جامد وزي الاسد
الخوف قدر يغلبه
او كش من الحسد
ماجمع إلا ما وفق
وكل واحد قبيح
متشيك ومتزوق
في مكانه الصحيح
صحيح اصحاب مكان
دلوقتي ومن زمان
تموت او تتسجن
او هتعيش جبان
عقيم وجاب احزان
مجنون خرم الخزان
فضاها جاب قضاها
ولسه بيقول كمان
والحق مش عليه
احنا اللي نستاهل
عشان بنطاطي ليه
ساكتين و بنتساهل
نشوف بعنينا خراب
وبنموت على إيده
نصنا صبح ارهاب
والنص التاني عبيده
بحر الحياه غدار
هيغرق اللي ثار
يرجع كله لمكانه
كلب وقطة وحمار
سلامات على الجزار
حرب ودمار و نار
المطلوب واللي ماشي
رقص وطبل ومزمار
ويموت حلم البردان
ينسى يشوف اللحاف
ويبوس إيده الغلبان
لو طال اللقمة حاف
