** نشر هذا الموضوع في التاريخ الموضح ادناه **

*

*

** خبطتين في الرأس ... تفرح !!

كان المثل زمان بيقول :

خبطتين في الراس "توجع"

اه خبطة واحدة بتوجع ! انما لما يكونوا خبطتين

بتبقى الصدمة تقيلة شوية

ومحتاجة فحل بصل وكباية لـموناتا ،،

طبيعي ان الصدمات من نوعية ( الخبطة )

بتبقى درجات على حساب مقدرة استحمال ( المخبوط ) !!

يعني لو موظف كحيتي ابن حلال بيجري على كوم لحم

حصله "مطب" في مشوار كفاحه

هتأثر معاه جامد !!

تلاقيه ياعيني مثلاً بيلم قرش على قرش

وصابر وحارم نفسه من لذات الدنيا

حتى السجاير بيشتريها فرط ياولداه !!!

وياحيطة داريني وتوب علينا يارب !!

وبيشرب بيريل وصابر ،،

هوووووووووووووب

تلاقي جاله مرض صرف عليه اللي قدامه واللي وراه

ومش بعيد يبقى مديون كمان !!

او عيل من عياله ربنا كرمه وعايز يتأهل للعش ،،

او مراته قررت بعد طول انتظار انها تزور بيت ربنا وتحج

يمكن ربنا يغفرلها عمايلها في ابوالعيال الغلبان ،،

على الجانب التاني من الشارع !!

واحد راكب اوتومبيل 7 متر ! ولابس حرير

وفي بقه ( فلتر ) سجارة دهب !!

(( كان زمان يقولك "معلقة" ))

والحياة معاه بمبي .. والدنيا مفيهاش إلا ربيع

والجيب مفيهوش فكة !!

بس فيه شيكات وكروت وفيز ،،

ربنا يزيد ويبارك !

يقوم صاحبنا اللي ربنا كرمه ورزقه وسخرله

كل الاسباب اللي تخليه عايش في "نعيم"

يمكن لو حد من "معدومي" الدخل سمعه يطب ساكت ،،

يحصله ايه صاحبنا !!

يكعبل في مطب !

وشتان طبعا بين مطب الكحيتي ومطب البرنس !

*****

هشام طلعت مصطفى ،،،

ساب بنات الدنيا كلها وراح يجري ورا "واحدة" لبنانية

ايا كانت العلاقة اللي جمعته بيه !!

الكيف غلاب والقلب ومايريد ،،

ومطرح مايحط راسه يحط رجليه بقى !!!

كانت النتيجة ايه ؟

شرف في ابوزعبل ! ولطخ اسم العيلة في الوحل

وفقد سمعته ده اذا كان حاطط في دماغه انه يحافظ عليها !!

وكل ده بسبب (شهوة)

قد تكون ( ابتلاء واختبار ) من الله ،،

حد عارف ؟؟

مش يمكن الايام اللي قضاها في "سويسرا"

يكون جه على باله يفتح كتاب ربنا ويقرأ فيه ؟؟

مهو مستحيييييييييييييييييييييييييل

يكون كان بيقرأ كلام ربنا وحصله اللي حصل !!

مش ممكن وهو في "سويسرا"

يشوف منظر المساجين الغلابة ابوقرش وابورغيف

واللي لبس السلطانية واللي شال القضية !!

فـ يحمد ربنا ويشكر فضله بنية صافية !

وسبحان الله ؟

اهو الراجل بعد مالبس البدلة (الحمرا)

قلعها تاني بقدرة قادر !!

وبعد ماكان بيستعد ومكلم حبايبه يجهزوله الشنط

عشان هيقضي بقية حياته في "المنتجع" أقصد السجن طبعا !

لقى نفسه محكوم عليه بـ 15 سنة !!

ديتها نص المدة وصلى الله وبارك ،،

خبطة .. وخبطة تقيلة وشديدة !

وفي خضم الاحداث و("عجئتها" .. على رأي الجماعة السوريين)

هوووووووووووووب

مطب تاني !!

شاريين اراضي الدولة بـ سحاتيت

وبايعنها لخلق الله بملايين !!

ومش كده وبس ؟

ده محتكرين الشغلانة وكأن من حقهم هما بس

اللي يشتروا اراضي الدولة العريقة بتراب الفلوس !!

وسبحان الله يااخي !!؟

الناس الكبيرة دي ربنا يزيد ويبارك انا لابحسد ولا بنق

الحمدلله وكفى .. على اللي الواحد فيه ،،

الناس الكبيرة دي

هيا الوحيدة والفريدة في مصر بل وفي العالم الجمع

اللي آثبتت ان ( السحتوت والمليم )

عملات مصرية عريقة ويجب احترامها وتقديرها

والعمل بها !!

وانفاقها على شراء اراضي الدولة اللي هيا الطرف التاني

اللي بيقدر وبيمجد العملات المصرية التاريخية ،،

ويطلعوا منها تاني ! زي الحليب من الجاموسة !

اه الجاموسة الجاموسة ? ياعيني ع الجاموسة ?

( رحمة الله عليك ياشلبي )

خبطة تانية شديدة وتقيلة !!

(تقرير من القناة التالتة : )

ومع ذلك يقف ابناء طلعت مصطفى

في مواجهة تحديات الحياة وتقلباتها

ليثبتوا يوما بعد يوم انهم بناة المستقبل

( الراجل اللي بيكلم يوم الجمعة قبل الصلاة في التليفزيون :)

وهكذا ،

كان الصمود والصبر هو سلاح آل مصطفى

انهم حقاً نموذج حيّ للإرادة الحقيقة والعزيمة الحديدية !!

سبحان الله ،، لله في خلقه شئون وحكم !!

علامات وتنبيهات واختبارات !!

ثم برحمته وبعفوه ( ينجيك ) من ما ابتلاك به !

نتعظ بقى !! نفوووووووووووووووووق

نشوف اللي لينا واللي علينا !!

نرجّع حقوق الناس !!

نمشي بما يرضي الله ؟؟

نراعي ربنا في ديننا وفي اموالنا !!

والله كل اللي حصل لهذه الاسرة الكريمة

نعمة من الله !

في يوم وليلة ممكن تكون بين اربع جدران كأنك في بطن امك !

وفي يوم وليلة تلاقي نفسك حر طليق !

في ساعة تلاقي نفسك مديون وهتروح في ستين داهية !

وفي دقيقة ربك يكرمك ويحلها من عنده !!

سبحان الله . سبحان الله ،

مش ممكن اللي حصل يكون بداية لصفحة جديدة في تاريخ "بناة المستقبل"

مش ممكن اللي حصل يكون عبرة وعظة لرفقاء واحباب "بناة المستقبل"

مش ممكن اللي حصل يكون تنبيه من الله وفرصة لبداية جديدة !!

مش ممكن يكون ( بنّاي ) من "بناة المستقبل"

قرأ هذه الاية الكريمة :

قال تعالى: إَنَّ الَّذِينَ لاَ يَرْجُونَ لِقَاءنَا وَرَضُواْ بِالْحَياةِ الدُّنْيَا وَاطْمَأَنُّواْ بِهَا وَالَّذِينَ هُمْ عَنْ آيَاتِنَا غَافِلُونَ (7) أُوْلَـئِكَ مَأْوَاهُمُ النُّارُ بِمَا كَانُواْ يَكْسِبُونَ [يونس:8،7]

مش ممكن يكون فهم معنى الايه وبدأ ينصح ويرشد بقية ( البُناة ) !!

كل دي علامات على قدرة الخالق جل وعلا ،،،

فـ هل من متعظين متفكرين ؟؟

ملحوظة لـ محبي الإصطياد في الماء العكر :

"بناة المستقبل" اعضاء في الحزب الوطني الديمقراطي وفي مجلس الشورى !

بس الحمدلله المية رجعت تاني صافية وتم الانتهاء من اعمال الاصلاح

والاحلال والتجديد في "مواسير" المياه التي أدت الى (تعكر) الماء ،

والمعنى في بطن الشاعر ،،

ودمتم في حفظ الله ورعايته

صدقتوني لما قلت أن :

خبطتين في الراس ... تفْـرح !! وتبسط كمان !!؟

بقي علينا ان نطالب (جامعي ) الامثال الشعبية والمسئولين عن هذا التراث العريق

تغيير هذا المثل القديم ( خبطتين في الراس توجع )

الى المثل الجديد ( خبطتين في الراس تفْرح )،،

وذلك مواكبةً للمستجدات التي وجُدت على الساحة المصرية المعاصرة في الآونة الاخيرة

واستناداً إلى كوننا الشعب الوحيد في العالم ،

الذي "خرم" الربع جنيه ثم قمنا بسد "الخرم" مرة اخرى !

وقد نكون في الطريق لخرم الجنيه ثم سده مرة خرى !!

احنا جدعان اوي بالصلاة على النبي ولما نحب نعمل حاجة بنعملها !!

ولما نحب ( نعدل) حاجة . بنعدلها !!!

ولما نحب ( نحذف اصل ونظيف صورة ) بنعملها !!

ولازال المعنى ببطن الشاعر ،،

عذراً للأطالة ،،،

والسلام عليكم ورحمة الله وبركاته ،