#علمٌ_ينتفع_به

#ارث_احمد_زويل

1- ما اسمهاش جامعة زويل... اسمها مدينة زويل للعلوم والتكنولوجيا... دي مش جامعة تروح تقعد قصاد المدرج وتضرب سنجوتشات وحاجة ساقعة وتشهيص مع صحابك وفي الاخر تاخد الموتوسيكل بتاعك وتروّح... لا... دي فيها شباب من اللي انت قاعد طول النهار تتفرج علي ناس زيهم في الافلام الاجنبي... اللي بيطلعوا عباقرة دول... بس الفرق ان دول شباب بجد... ومصريين...

2- كل دكتور تقف تكلمه من حوالي عشرين دكتور قابلتهم.. تسأله نفس السؤال... ايه اللي رجعك مصر ؟؟؟ وتتفاجئ انه سايب امريكا وكندا وانجلترا وهنا وهناك وسايب فيلل وعربيات بتطير ودولارات تعجز حضرتك وحضرتي عن عدّها وفهم مبلغها... كان بياخدها في الشهر وسابها عشان يرجع هنا... فتلاقي الرد موحد وأكنهم متفقين ... "احنا رجعنا مصر عشان شايفين ان فيها امل حقيقي واحنا مش من الناس اللي بتضيع وقتها الا في مكان بيشتغل بجد.. مفيش مشاعر ..في عمل.. في خطط... في شغل"

3- المعامل اللي في مدينة زويل للعلوم والتكنولوجيا مش موجودة في مصر .. ومش موجودة في افريقيا... ومش موجودة في الوطن العربي... موجودة هناك بس...

4- التخصصات اللي جوة المدينة... كلها تخصصات عالمية... كلها تخصصات دقيقة... في ناس عايشة بقالها 15 سنة وجت المدينة تكمل فيها عشان بس تعرف ليه الجين اللي في حمض ال DNA عند شخص معين ممكن تحصل فيه طفرة وتخليه يتكسر ويسبب الاورام والامراض ... وازاي ممكن يعكسوا الالية دي ويخلوها طريقة يعالجوا بيها البشر... 

اللي ممكن يجيبلك جنان... ان في مصر ناس تفوقوا في المجال ده على كل علماء الدنيا... وموجودين هنا وسطنا بعقول تتخطى حدود المعرفة... واحنا قاعدين مستنيين توفيق عكاشة يسدد نفقة مراته عشان يخرج من الحبس...

5- في قسم من الاقسام فيه مجموعة علماء قاعدين بورقة وقلم... ايون... ورقة وقلم بس... طول النهار بيتكلموا في نظريات النشأة والتطور وحدود الزمن وقدرة العقل على تحريك الاشياء و السفر عبر الزمن وكلام من اللي بتشوفه في فيلم فانتيستيك فور ده... بس حضرتك ده هنا في مصر تم تحويل جزء منه من افكار الى نظريات تطبيقية "ناجحة" وركز على كلمة ناجحة... مش جهاز كفتة...

6- مركز النانو... اعجاز... خيال... مش لاقي كلام مناسب لوصفه وشرحه... اوضة.. متكلفة 120 مليون جنيه... بيعملوا فيها ايه؟؟؟ بعد الشرح والتبسيط وخلافه ممكن حضراتكم تعرفوا ان عندنا تكنولوجيا مش موجودة في الشرق الاوسط غير عند اسرائيل... وده بيضعنا على قدم المساواة معاهم... 

بيعمل ايه ؟؟؟ عشان ما توجعش قلبك... انت ممكن تبني "موتور" على جزء من الالف من المليون من ذرة الهواء اللي انت بتشوفها بعنيك... 

ايوة... اعمل زي ما انا عملت... تنّح... ده بيتعمل حاليا في مصر... واللي ناقصهم عشان كمان تتشل زي حالاتي ... الايدي البشرية المدربة... العلماء... اللي هما طلاب اليوم في مدينة زويل واللي بعد سنين هيبنوا المواتير دي...

7- المدينة شغالة بالتبرعات... فاهم يعني ايه تتبرع في مجال البحث العلمي؟؟ دي ثقافة محتاجين نفكر فيها كويس... محتاجين نفهم ان كل مليم حتدفعه هناك... هو للمستقبل... هو امل مصر في نقلة علمية بعد سنين جاية على ايد شباب بيخرج برة في مؤتمرات علمية يعلّم على كل اللي قاعدين رغم انه معندوش عٌشر الامكانيات ولا الموارد اللي عند الناس اللي برة مصر...

8- ازاي الناس متعرفش حاجة عن المدينة بالتفاصيل دي؟؟؟ ده دور الاعلام اللي مشغول بمربع الهطل الازلي... عكاشة - موسى - مرتضى - بكري... 

انما نقول على معجزة مصرية شغالة وقائمة... ازاي؟؟؟!!! 

نتكلم عن مستقبل مصر اللي بيتبني؟؟؟ عييييييييييييب؟؟؟!!!

كانت نصيحتي لمدير المدينة العلمية انهم محتاجين ادارة اعلامية شبابية على نفس المستوى الابداعي للعلماء الشباب الموجودين بالداخل ... لان المدينة دي مش مبني وكيان بسيط...

دي هتبقى مفرخة علماء لكوكب الارض كله بعد عشرين سنة... وهيطلع منها الف عالم ياخد نوبل... والف عالم يغير شكل مصر...

9- انا كل ما الدنيا تسوّد في وشي.. واقول ان البلد دي مفيهاش حاجة عدلة.. وازهق... ربنا سبحانه وتعالى يبعتني مشوار لمكان زي ده... افهم منه ان مصر جاية... والله العظيم جاية... رغم الظلم جاية... رغم الماضي جاية... رغم الضعف جاية...

وبلاش غلاسة وتسأل جاية فين..؟؟ هي جاية وبكرة نتقابل وتفتكر كلامي...

10- متفق مع النظام او مختلف... لازم تفهم ان اللي جي لولادك... ولازم تفهم ان مشاركتك بالمعرفة ونقل المعلومة ما هو الا امانة ... عرفوا الناس ان دي بلدهم وان ده مستقبلهم وادعموهم فأن الاشخاص زائلون وإن الوطن لباق...

١١- ممكن تتبرع عن طريق 1000/1000

جميع البنوك المصرية 

او موقع مدينة زويل الالكتروني

#رحم_الله_احمد_زويل