إبداعات بتانة
01-02-2018 عدد المشاهدات: 107
ربَّك عالمْ
إنِّي ــ ياسيدي ــ طيِّب
ومسالم
وقلبي أبيض من نُوَّارة فول
ع الشَّمس في الضُّحى طالة..
لا في يوم دُست على نملة
ولا كنت ف مرَّة عبد لأيُّها عملة
ولارميت ــ بقصد أو سهوًا ــ شوك في الطريق
ولا كنت كبريت للفتن
أو للحريق
ولا كسرت بخاطر وليِّة
شايلة هموم الكون على كتافها
ولا عيني اشتهت عنب غيري
ولا نصبت فخ للطيبة تحت السلالم
أنا ــ يا سيدي والمصحف ــ بسيط جدًا
وراضي بحالي
ومسالم
بس خيالي وسع الخيال
وصبري صبر الجمال
وطيبتي طيبة فلاح ماطلعش من غيطه
وحقاني
وحالم
ونفسي تبطِّل سعرتك
وتسيبك من هترتك
وتتوقَّف عن حرق دمِّي
والنهش في دماغي
لأن دا بيزوِّد صداعي
ويخليني معاليك
بأشوف نفسي مسعور زيِّك
وأنا ــ والله ــ مش عايز كده !!
