جمال الغيطانى
ــ لو فيه حضن
يبقا انت حضننا الجامع ..
ولو فيه
فى الزمن دا نجم
يبقا انت نجمنا اللامع ..
ولو فيه حد
يستاهل نقوله : يا ابااااااه
يبقا انت ابونا
باقولها بعلو الصوت
ويشهد المبصر
ويشهد السامع ..
ــ يا نخلة طارحة ع الطريق
يا فجر نوّر من غير حريق
يا نظرة الزهد اللى ماشية فى الموالد
يا شيخ صديق
يا فرحتى بشنبى لمّا خضّر
يا دقة قلب جدى
واحنا عمّالين بنكبر
يا خبطة حبات الندى ع الارض
يا صعيد
لسه مليان براءة وطهر
بلاش تسيبنا
والنهار لسه مش طالع !!
ــ دا القمح
لسه مبلول ع الحصير
والميه
لسه معكرة فى البير
ولسه الغربان ع الحيطان
ولسه الضلمة كتير
ولسه الدود ع ينخر فى لوز القطن
ولسه الشابورة نايمة ع البرسيم
وعلى حلمنا العفى الفارع ..
ف استنا
ولمّنا تانى
فى حجرك الواسع ..
يا سرنا الباتع ..
ــ اخدتنا من خريف الجوع
وفرشت قلبك للكل طبلية
وسقيتنا حواديت دافية
وضلة للعابرين
ف يا معجون بحزن الوش فى العدودة
ويا معجون ببحة صوت عصفورتى الحزين
يا طلعة البدل الملوكى
يا ريحة الحصاد والطين
تقدر تقولى :
سايبنا لحمة طرية
ورايح فين ؟!
ويا بحر نعناعنا الواسع
انت زهقت من قشعرة جسمك
عشان ناس أكلها الزمن
حتة
حتة
ولا فضّلت تمشى ع السراط
عشان تتأكد
انه هايبقا ليك شارع ؟!
ــ ياللى كنت مكان ماتمشى
ترش ع الغلابة شهد
ياحافظ تعويذة الجدة
ضد السواد فى المهد
يا عاشق للطينة السمرة
يا شارب مصر زى الخمرة
يا عارفنى من ضلّى
استنا
ووقّف
وقولى :
انت ع تفرح بأحزانى
ولا مستكتر يكون لينا اب
اسمه جمال الغيطانى ؟!
ان كان لا
يبقا خطّى جنوبا
وبلاش تخطّى غربا
وامسك فى الحياة
وانزل فيها
هبشا وضربا
وعاند معاها
وعافر
داالحياة بتموّت اللى ليها سلّم
وبتدى عمر فوق العمر
للى فيها كان طامع !!
ــ طب مين هايرسم بعدك
الزهور م الحبر؟!
ومين هايعرف بعدك
السباخ م التبر ؟!
ومين هايسيب صوابعه
تموت فى يد السيف
وهوّ ع يقاتل بصبر ؟!
ومين هايحرس سكر العيد
من نمل الخراب
ويتلقّى بصدره الضرب ؟!
ومين هايدارى بيد الجراح
وبيد هايدافع ؟!
ــ لو فيه حضن
يبقا انت
حضننا الجامع ..
ولو فيه
فى الزمن دا نجم
يبقا انت نجمنا اللامع ..
ولو فيه
حد يستاهل نقوله : يا ابااااااه
يبقا انت ابونا
باقولها بعلو الصوت
ويشهد المبصر
ويشهد السامع ..
شعر : ماهرمهران
