تعـــــــــــــليـــــــم مـــــجــــــــــــــاني
شـــعر
ماهــــر مهـــران
دار الناشر للنشر والتوزيع
اسم العمل : تعليم مجاني
النوع : شعر
المؤلف : ماهر مهران
الطبعة الأولي : 2009
تصميم الغلاف: هشام عبد الله
الناشر : الناشر للنشر والتوزيع مصر
تليفون : 0122534810/0122365387/0187903458
إخراج داخلي : سمير درويش
الطباعة : المصطفي للطباعة
رقم الإيداع :5535\2009
الترقيم الدولي 978 – 977 – 6304 – 16 - 1
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
إهداء
إلي خلود
وايمن
وشادي
ــــــــــــــــــــــــــــــــــــــــــــــــــــــــــــــــــــــــــــــــــــــــــــ
غِربــــان طليــــقه
إتلم
وبطّل نخوره
وتقليب
وسيب الغِربان
ترفرف في الخرايب حُره طليقه 00
دا " إبراهيم "
عشان مِسك فاسه
وكسّر الاصنام
وكشف لهم الحقيقة 00
إتشال
واتحط العتاولة
وما هديوش غير لّما رموه
في قلب قلب الحريقه !!
ـــــــــــــــــــــــــــــــــــــــــــــــــــــــــــــــــــــــــــــــــــــــــ
تعليم مجاني
مش ها يشغَّلوني في البورصة
ولا هاكون مذيعة ربط 00
ولا إن وقفت علي راسي
مش هايدخلوني في الشرطة
ما أنا أصلي ف نظرهم
ما أساويش ظرطه
ف طبيعي
مش هاكون ظابط في الجيش
ولا هاحلم أدخل السفارات
ما أنا أصلي
بيئة
وتعليم مجاني
وأنا
مش خريج مدارس لغات !!
ــــــــــــــــــــــــــــــــــ
خيط العنكبوت
ضعيف أنا زي ضعف العشش
والبيوت ..
ع أديكم زيّها دفا
وقت السّقَيع ..
ع تدَّيكم زيّى طراوه
لما الدنيا تبقا صهد
وموت 00
ضعيف أنا
لكن ممكن قوي
أنجَّي المركبه من الغرق
زي ما نجّا
رسولنا الكريم
خيط العنكبوت 00
ـــــــــــــــــــــــــــ
ذلك
إنْ كان ذلك كذلك
يبقا كزالك في ذلك
ما هو يا خلق ذلك
هوَّ إللي وصَّلنا لـ كذلك
لكن ها نقول إيه
إذا كان الحلق مُرّ
و (ف) الرقبه كزالك
وكذالك (ع) تطعن القلب
وتخش الكبد كزالك
وكذلك طنّش زي ذلك
وسابني أنزف
واضيع
واصرخ بعلو صوتي :
روحي (ف) رقبتك يا ذلك
لكن ذلك ضحك
وقالي :
الكل هايموت كذلك !!
ـــــــــــــــــــــــــــــــــــ
الأوغــــــــاد
(ع) يشحتوا علينا
واحنا (ع) نكوي جروحنا بالرّماد 00
(ع) يشحتوا علينا
واحنا (ع) نبل الرّيق بالبول
و (ع) نتعود ملامح عزرائيل
تحت في الأنقاض 00
(ع) يشحتوا علينا
وعشان ما يشحتوا كويس
(ع) يسيبونا نعفَّن
حتّه
حتّه
حتّه
حتّه
وبعدين
يعملوا مقبره جماعية
عشان فوق قلبنا
يرقص الأوغاد
ـــــــــــــــــــــــــــــ
كـــلام بـاشـــــاوات
زي ما فيه إفرست
فيه كما الغور
وزي ما فيه إسوده
فيه كمان زرزور
دنيا
ومبنيه (ع) الأضداد
(ف) ليه إخوانا الغلابه
عايزين يقلَّعوا الأغنيا الحرير
ويلبسوهم
زيُّهم كستور ؟ !!!
ــــــــــــــــــــــــــــ
الرسم ( ع ) الرماد
وماله يا سيدي :
قطّع شجر البرتقان
واعمله نبوُّت
خد جريد النّخل
واعمله احتفال للموت
كسر رحايتنا
واعمل سكاكين تدبح بيها الملايكه
خد خشب السنط
وارفع كل البنادق
ازرع الخوف في قلب الكون
طيّر القمري من علي شجر اللمون
افتري واطغي واظلم
وسيبني أنا ( ع ) الرماد أرسم
وابقا شوف مين إللي
ها ينتصر فينا 00
ــــــــــــــــــــــــــــــ
سكن للأغراب
ـ قطعوا الشَّجر
طيروا العصافير
إللي ع تغنَّي فيه ..
قصوُّه
وخنقوه
ولمّا زهقوا منه باعوه
بالوا علنًا علي دماغ
إللي جابوا أبوه
وقالوا :
من النهارده
مفيش رصيف
تمشي عليه الملايكه
مفيش حضن للفقرا
ولا فيه سكن للأغراب !!
ـــــــــــــــــــــــــــ
أعياد الطفوله
ضلي ع يرفع
وبقيت ع أزداد نحوله 00
لا كباية لبن في الصبح
ولا ساعة الحمّيَ
ع ألقي قزارة كاكوله 00
ع أقرّب كل يوم (م) القبر
وإنتَ تزداد بدانه
وتزلط في الهابي بيرزداي
وتزلط في الكريسماس
وتزلط
وانت ع تحتفل
بأعياد الطفوله ؟ !
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
هزيمـــــــــه
ـ ما شيين في رمله
والرّمال متحركه
زي القرف
والجوع
والفقر
والبهدله
ما شيين في رمله
وكل ما نخطّي خطوه
عشان نعلا
نلاقي الرمله بتاخدنا للموت
وحساب الملايكه
ومرارة المهزله !!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
عبد الودود
عبد الودود لمَّا صرخ (م) السَّقعه
خرمو له اللحاف !!
لمَّا
سَنَد بـ ضهره حيط البيت
غلُّوله قزازة الزَّيت !!
لمَّا
ورمت رجليه
من الجري ورا كِسْرِه
داينوه بالجزمه !!
لمَّا
ماتت صوابعه في عضم الفاس
سحبوا من وَلَدُه
أخر كُرَّاس
ومسَّكوه أزمه !!
لمَّا حلم إنه ها يمتلك
في عزَّ نومه قيراط
خلُّوا عينيه دم
من كُتر العياط !!
لمَّا
قعد ع الترعه
وقال المُيّه باعتها الحكومه لليهود
علَّقوه في عصاية العود 00
لمَّا
حاول يعدل ضهره 00
إتكسر
لمَّا
حاول يبص لـ فوق 00
إتعصر
ولمَّا صلَّي عشان تنزل المطره
(ف) يبلبطوا العيال في الطين 00
ويفرحولهم دقيقتين 00
وترقص العصافير
في حتة أرض رمليه 00
نزَّلوا المطره
في الكويت
وفي الإمارات
و (ف) قطر
وفي
الـ
سعو
ديه !!!!
ـــــــــــــــــــــــــــــــــــــــــ
ورث
سبت لنا إيه يا أبا ؟
قَيراط
ودكر النَّخل !!
الدكر
شفط السَّماد
والحديد
والعباد
وخلَّي نهارنا كُحل !!
رد أبويا وقالي :
الشيله شيلتك وشيلها
أنا ما ليش دخل !!
ــــــــــــــــــــــــ
حُـــرَّيــــــه
ناموسه دايره (ف) برطمان
والبرطمان مغلوق 000
لو تحاول تطلع براسها لفوق
هاتكسر راسها الحقوق 00
لو تحاول ترفص برجليها
ها يعصرها قرف
في بطن البرطمان ملزوق 00
لو تحاول تاخد نفس
وتسرح في أحوالها
هاتلاقي بالها
من كُتر الهموم محروق 00
ناموسه
قالولها : إنتي حُرَّه
وحطُّوها (ف) برطمان
بس البرطمان مغلوق !!!!
ــــــــــــــــــــــــ
ع نتغّرب
ـ ع نتغّرب عشان نشتاق
للقعاد تحت النخيل
ـ ع نتغّرب عشان نحس بالحرمان
من دفا صدر عاش ضامر
ـ ع نتغّرب
عشان نعرف قيمة الصبح
وحلاوة الزرزور
ساعة يخبّط ع البوّابات
ـ ع نتغّرب
عشان نفتح مناخيرنا قوي
لروايح اللمون في الخريف
(ف) نعبي صدورنا بالهوا النضيف
ـ ع نتغّرب
عشان نشتاق لعرق الحصاد
وريحة العباد
وحلاوة الحواديت
وحنيه طالعه من حيطان البيت
إللي هرتمها الزمن
ـ ع نتغّرب
عشان نرسم جميزه (ع) الدراع
ونعشق أكتر ريحة النعناع
وريحة السّمن
حتي لو بقي مرده
أو حتي برد 00
ـ ع نتغّرب
عشان كل واحد فينا
يكتب في وصيته :
أرجوكم
تدفنوني
في
تراب
البلد !!
ــــــــــــــــــــــــــــــــــ
هــــزار
ـ مغرم يا واد قوي بالهزار
واللعب 00
تصنع طيارات ورق
وتخش بيها الحرب 00
ـ طيب يا حلو
أديه جالك آوان الموت
والاختيار الصعب
ورَّيني بقا هاتعمل إيه
هاتسيب البدن تنهشة الغربان
ولاها تتحدي
وتخلَّي هزارك جد ؟!
ـــــــــــــــــــــــــــــ
خدعه
يإللي انتَ ماسك الورده
وبمناخيرك الخشب 00
نازل فيها حكحيك
مناخيرك ملاها الغبار
والورده يا خساره
طلعت بلاستيك !!
ــــــــــــــــــــــــــــــــــــــــ
مطـــــره
ـ تنزل المطره
(ف) تفرح ناس
وتاخد عربياتها إللي تشوف وشك فيها
وتنزل للشارع الفاضي
عشان تحس
إنُه شارع تمليك
ف تطير من الفرحه
وتطرطش طين عليك
وإنت كمشان في أخر الرّصيف
و (ع) تحلم بحيطه
أو بعشه
من نار السقيع تداريك 00
ــــــــــــــــــــــــــــــــــ
ع نبكي
ـ ع نبكي عشان واحنا في اللغه
إتصبنا بأنيميا
لكن حاده 00
ـ ع نبكي عشان أول ما شبينا للدنيا
وسبسبنا شعرنا
وبدأنا نغنَّي للبنات
وهما طالعين من المدرسة
إتصبنا بالإحباط
والاكتئاب
والهدّه 00
ـ ع نبكي عشان أوَّل ما ها نخش الأربعين
ونبدأ نغني للوشوش الحزينه
ها يتسحّب علينا
الفشل الكلوي
وهايرعي جسمنا واحده
واحده 00
واحده
واحده !!
ــــــــــــــــــــــــــــــــ
كبــــريـــاء
يا جزيرة واقفه في وش النيل
ع تتباهي علي عشتي
وقُلَّتي
وكنكه شاي مصدَّيه
وكبّاية مفيهاش غير شفطه 00
تعالي
واسندي ضهرك ب ضهري
وسيبك من النظر علي فوق
وافتكري
إن بدايتك يا حلوه
كانت عباره عن حصوه
ــــــــــــــــــــــــــــــــ
عود مسك
الشعب ده
عود مسك
أصيل
وتمنه فيه
وعشان تصدَّق إنُّه مسك
أرجوك
قوم إعمل زي إللي ما تتسمَّي
ويالله
ولَّع فيه !!
ــــــــــــــــــــــــــــ
عشان أنا الكبير
ـ لفَّيت حزام الجوع
عشان أنا الكبير
سلمت رجليا للريح
عشان أنا الكبير
حفرت لي في قلب الجبل حفره
وقلت بير
عشان أنا الكبير
بلعت لساني
واستحلبت الحجر
وفضلت أدادي في حلمي الأخير
عشان أنا الكبير
شربت البول
ورضيت أكون دلدول
ونمت تحت المطر
عملت عضمي جير
عشان أن الكبير
إتكست روحي بصدا المواسير
عشان أن الكبير
فنجرتي من جيبي
ونمتي
وقلتي :
حارب لي يا حبيبي
وأخرتها
تقتلي ولدي في حضني
وتلبَّسي بناتي السواد
وتستبدلي الغربان بدال الطير
طب إزاي ؟
وكيف
ها دافع بكره عنَّك
لما تصرخي
وانتي نايمه تحت الـ غير ؟ !
ـــــــــــــــــــــــــــــــــــــ
تحت خط الفقر
ـ ماشي أنا من زمن
تحت خط الـ فقر 00
لا بـ أدَّب
ولا بـ أخبَّط
ولا بـ أنقر بفاسي نقر 00
ما رايحشي (ع) الزرعه
أنا رايح التُّرعه
والترعه دي عامَّي
وأنا شعري إلزامي
والطبل عايز نقر
لو كنت ماشي مطاطي
زييَّ
تحت خط الفقر
وجزمتك زييَّ
بوت
وبلاستك
تدوس عليها تتكتك
وتجيب وسخ في الكعب
وتجيب وسخ في الكوع
مخنوق أنا (م) الجوع
وصرخة المصران 00
يرحمك يا زمان
ما عدش في الإمكان
أرجع تاني إنسان
ما أنا بصراحه كده
رزقي خطفه الصَّقر
واديني
عايش بـ أزحف
تحت خط الفقر
وماشي أتدحلب
عايش كما الطحلب
عيالي في قلبي
إخواتي في حِجْري
وحِجْري مَهري
ودايب 000
عايش علي الرايب
حتي ولو رابشي
أزحف
ولاَّ أجري
ولا أغور أمشي
ولا أتعقر عقر 00
تحت خط الفقر ؟ !
ما أنا من محاوله لـ محاوله
بقيت بـ لا حول
ولا قوه
ولا صبر 00
وبقيت من يأسي
بـ أحفر بصوابعي
لأبني الوحيد في القبر
وأنا نايم
ومبروش
تحت خط الفقر !!
ـــــــــــــــــــــــــــــــــــــــ
خفـــاش كبيـــــر
ـ لو كنت زيه
ع تطلع ـ كل يوم ـ لوش الحياه
وانت مش فطران 00
لو كنت زيُّه
ع تتغدى ـ كل يوم ـ من فيض الشجر
علي روس الغيطان 00
لو كنت زيُّه
ع تتعشا كل يوم بعشا أمك
ويتحرق دمك
وانت ع تشوفها
محبوسه جوه البيت
ومستنيَّه الجلابيَّه الوحيده تجف
لو كنت زيُّه
كل يوم تشوف أبوك ع يخف
وتشوف ولدك الوحيد ينشف
وتشوف الحزن في عيون البنات
خفاش كبير
مش كنت ـ بزمتك ـ ها ترمي نفسك
من أعلي حته في التحرير ؟ !
ــــــــــــــــــــــــــــــــــــ
شــــهادة ميـــــلاد
مستوطنة (ع) تقول للمخيَّم :
أخدت أرضك
وشردَّتك 00
وبنيت صروح
يفرش عليها الإله
وينام !!!
رد المخيَّم
وقال :
ما تفرحيش قوي
وحاولي تفتكري
إن إللي مالوش شهادة ميلاد
يبقا إبن حرام !!!
ـــــــــــــــــــــــــــــــــــــ
عـريــــس غـــــزه
جسمي حسّ بقشعره
قلبي فيه غزه
إيه إللي حصل يا أمه ؟
ع يقولوا يا ولدي :
دمَّروا غزه !!
وإنت قاعد لي هنا
إيدك علي خدك
ومش داري بالحاصل
تبكي مع متن
تضحك مع فاصل
وتطلق الدنيا بحالها
وتحضن لي فيلم منتهى اللذه ؟!
ـ هاعمل أيه يا امه
في رقبتي عيال كتار
والدنيا رزله قوي
وحمولها تقل جبال
وكل ما أخد نفس
تحاوطني ديّانه
تقوليش مغول وتتار
وإن لقيت العشا
مش بلا قي فطار
وبوابتي من كتر تخبيطهم
إتكسر قفلها
وطارت الـ رزّه
ف إيه إللي عايزاني اعمله تاني
يا اما ااااااااه
عشان غزه ؟!
ـ ارمي طرح الحريم
وامسك النبوت
افتح صدرك وقول :
أهلا يا لومان
مرحبه يا موت
خدنا يا ولدي من الضَّعف
من الهزَّه
من الدروخه
من اللزه
خدنا ـ وحياة نبيك
لعيشه نحس فيها بالمزه
ـ معاكي عيال غيري
كتفهم بقي (ف) كتفي
ولسانهم طول عليَّا
وكل ما أقول حاجه 0
يقولو لي : غور إجري
ف خلَّيهم يشوفوا روحهم
ويعرفوا : مين إللي كان أسد
ومين إللي كان عنزه
ومين إللي عشانهم جاع
واتعرّا
شرب المر
إتكوي وإتضر
ومين إللي سال دمه
وإتصفَّى قوي
وخرّ
ومين إللي مات عشان تحيي
ومين إللي يستاهل يكون ولدك
ومين إللي يستاهل يكون عريس غزّه ؟!
ـ يا مُرررررررري
ويا سواد البخت
غزل العنكبوت خيطه
وابتدى السواد
والصمت 00
ياريتني ما خلفت
وياريتك ما نطقت
داكده ضاعوا
وضاعت كما غزه !!
ــــــــــــــــــــــــــــــــــــ
تاني ها تربَّي دقنَّك ؟ !
ـ يوووووووه
ـ تاني هاتربي دقنك
وتلبسي الجلابيه البيضا
تطلطلي السجه
وتطوُّحي الجنزير
تحرَّمي علينا الصابون
تتهمي قلبي
ـ لو يغنَّي للفراشه ـ
بالجنون 00
وتقولي : كاااافر
من شعر راسه
ولغاية الضَّافر
كافر
كافر
كافر
كافر
وتدهسيني (ف) رحايتك
وتقولي : ملعون أبوووووه ؟!
ـ يووووووه
وتغلَّي البخور 00
تسقينا عذاب القبر
وتعلمينا إزاي نلف
وإزاي ندور
وإزاي تتوحد وشوشنا ويا الأقنعه
وإزاي تكون البويه أساس
وإزاي نمثَّل في الحياه
كذا دور
وإزاي قوة البني آدم
تبقا حروف
وإزاي هيبة الأمم
تكون في الزور
وفي الكلام 00
هاترجعي تاني
تحشينا جوه الكهوف
وتمرجحي الأُمرَا فوق ريش النَّعام
جوّه القصور الرخام
والحيطان الدَّهب
وتوزّعي علينا حبة خطب
وسيوف خشب
وحسره
وحقد
وغضب
وتقولي : دا طريق الشمس
وتسيبينا في برك الهزايم
كلاب أكلت خطاويها
نار الجَرب
وكل ما تخطّي خطوه
نتوووووووه
ـ يوووووووه
لبستي وش اللَّطافه
عايزه تخلَّيها خلافه
والناس من جهلها تهتف
والناس من جهلها بتهيص
طب قوليلي بربك
ها نِحلّ أنهو الأول
عقدتك إنتي
ولاّ عقدة التوريث ؟
ولاّ قيود الموت
ورهبة القضبان
ولاّ الهزايم ؟
ولاّ نغَّمض عينينه شويه
ونحاول نشوف النور
نحاول يا حبيبتي نتور
ف نلقاكي تاني
مربيّه دقنك
لا بسه الجلابيه البيضا
مطلطله السبحه
وساحبانا لـورا
لليل بارد من بتاع طوبه
ليل عشان يطلع له صبح
محتاج له ألف إعجوبه !!!!
ــــــــــــــــــــــــــــــــــ
عايز براح
أنا قُمح الأرض
وانتي يا حبيبتي طاحونتي
(ف) لملميني
من تلج الرُّخام
من مخازن الوزير الألعوبان
وأرميني (ف) قدوسك
قرقشيني
واطحنيني
ونعَّميني قوي
يمكن يترخي عصبي
ويدوّخني عطرك
واحضنك
واعرف أبوسِك
(ف) تحسَّي بـ لدونتي
ما أنا قمح الأرض
وانتي يا حبيبتي طاحونتي !!
وأنا العجين
والملبن الطااااااالع
من مرارة الطين
والبلح المقمَّع
وشهد التين
وفرحة الزرزور بالنور في الفجر
وأنا الطُّهر
وأنا إللي قلبي فرن قايد
لكنّي هااااااادي
ومستكين !!!!
(ف) هاتي المواجير
إللي حنَّت للخميره
وإنزلي في النهر 00
إبدأي تاني العجين
يمكن قطرة عرق
تنزل علي ضهَّرك المرمر
(ف) تحسي
ـ ولو مرّه ـ
إنُّه لسه فيكي نقطة دم
كمّا البني آدمين
إللي (ع) يحسوُّا بينا
إحنا إللي شلنا الجبال (ع) الكتف
وياما إتبلينا !!
وياما الحلفا شقت سقوف الفرن
وياما في الرمله إترمينا
وحنيّنا لتراب الجرن
وإنتي تقعدي
تتمألسي علينا (ع) الطاوله 00
نبكي
وانتي تضحكي
يا للي عايشاها علاوله
نقول : نفسنا في العيش
تقولي : زرعناها فراوله !!!!
وناسيه
إن إحنا قمح الأرض
والقمح عايز براح
وُميَّه من الرياح
وإيدين سمرا عفيه
وعايز بنات تصيَّف
وبنات تنّقي فريك
وبنات تشقَّق الرغفان
وبنات تسمَّي
وبنات تسلَّم
وبنات من خدَّها تقيد الفرن
وطيور ترقص في قلب الجرن
وحلب يخلُّوا الدنيا
تحبّ بعض 00
أنا قمح الأرض
وإنتي حبيبتي طاحونتي !!
لكن ها يفرق إيه
لو كان قلبك معايا
أو كان قلبك سايبني
ما إنتي من زمن سايباني
لا سألتي
ولا حسيتك معايا
لـ حد ما جزمتي بقيت مَسير
صوابعي لزقت في الهراويه
شكوتي بقيت عياط
حصيرتي رجعت شوك
عملت الغيمه بطانيه
إتكرمشت أحلامي فيَّ
وزهقت الأرض يا حبيبتي من سخونتي
ومكسوف أقولك :
إني عصعصت خالص خالص
وخسرت لدونتي
(ف) قرقشيني
واطحنيني
ونعمَّيني قوي قوي 00
اعملي منَّي (باتيه)
أكلَّي اللص الوجيه
بَسْ
أمانه تقوليلي
يا حبيبتي :
مش طعمي مرّر
يا حكومتي ؟ !!!!!
ـــــــــــــــــــــــــــــــــــ
أحمد السقا
ـ القربه علي ضهري
عملت شبكه طُرق
وحمارتي تحتيه
فرجحت لي رجليه
وبقبقت لي الورك
خلَّتني ماشي أنق
أنا إللي عايش زق
لا معاي
ولا ليَّ
غيرعشه
وجميزه
وعكاز قديم
والسَّطل 00
وقلب مليان صبر
وأيد قشفها (ع) يجرح شفايفي
وأنا (ع) أبوسها
معدوله 00
مقلوبه 00
وأحمد ربنا (ع) السَّتر 00
وعلي لقمه مغمَّسه دُقَّه
أنا أحمد السقا
أبو مناخير كد الكوز
وسمره زي الأرض
أبو جزمه بلاستيك
وفيها مليون قطع
أبو ريحه تشبه عطن الزّيار
أبو جدع ضارب في البيار
أبو وش كرمش
وصديري فنش
وعين فيها العمي نام
واتربَّع
وكلبَّش
ومع إني بنضاره قعر كبايه
إلاَّ إني
(ع) أشوف الكون ملَّبش
والدُّنيا حامل في الحرام
وبطنها منفوخه قوي
و (ع) تمشي تلق لقه
زي قربتي أنا
أحمد السقا !!
ـ فوطَّتي علي كتفي
و (ف) إيدي حُقَّه
وطول عمري (ع) استنا الرزق بالطَّقه !
طقه
طقه
أنا إللي
(ع) أخد المزقه
و (ع) أداوي العصب
(ع) أفرد ضهر الرجال
وأنا في عز الموت
أحلي أحلام العيال
وأنا
من يوم الدين
علي عابدين
مهنتي سقّا 00
لا إترقيت
ولا حسَّيت بحُرقه
وأديني (ع) أفتح عبَّي للحياه
أبيّت القمره في باطي
أشم ريحة الشمس شم
أعبّي البحر بالفنجان
ورغم إن وشي صفَّر
وصدري زيق من الرهقان
إلا إني يوماتي
(ع) أدور علي الغيطان
(ع) البوابات العاليه
والواطيه 00
كل الأسبله شاهده
إنّي الوحيد
إللي لسه (ع) أشم الطريق من ريحتها
وإنّي ياما رويتها
هدُّوها
وأنا بنيتها
هي إللي سحنتها
تشبه لحته من ليل الشّتا واقعه
وفجرها من زمن هاااااارب
وأخرتها يطلَّع لي العيال لسانهم
ويقولوا عليَّ : المسقع
ويقولوا : أحمد الباااااارد
إللي أبرد من مزيَّن
ابتسم
ويتبسم قلبي الحنيّن
ونتعكَّز علي بعض
ندوب كما الفراشات في الغيطان
وسط ناس متغطيه بالجمر
و (ع) تفرش البركان
وسط العرق
والجوع
والصهد والحرمان
وسط العيال
إللي بدّلوا طعم القصب بالشيح
والميه بالعيش
والحرقه بالجوع
والقبر بالبيت إللي قطَّعنا من لحمنا
ولسه ما اكتملش بُنَاه
أنا أحمد السقا
الشاهد علي المعاناه
إللي شقي في العيشه
وفي العيشه ديه شقيت
أخرتها تموت شجرتي واقفه
لا يصفّر ورقها
ولا حتي تميَّل 00
أنا إللي عشت الحياه
روحي ها تطلع علي عيل
حتي لو كان قرد
أو كلب
أو قُطَّه
تخلّي البوابه مفتوحه
وترش ميه في الرهبه
تضرب الحزام في النص
وتقول :
أنا امتداد لـ أحمد السقا
وأخرتها
اطلع منها كده
يا خساره متوضَّي
وسطْلي واكله الملح !!!
ــــــــــــــــــــــــــــــــــــ
الشــــــاعر
ـ ماهر مهران
ـ مواليد قاو العتمانية بمركز البداري محافظة أسيوط
ـ صدرله
1ـ هفهفات النخيل ابداعات 99
2ـ عزيزة اشراقات
3ـ أغاني أشجار السنط مكتبة الأسرة 2003
4ـ الخدامة مكتبة الأسرة 2005
5ـ أوجاع متوحشة أكتب 2008
6- تعليم مجاني دار الناشر 2009
ـ فاز بالجائزة الأولي لشعر العامية المصرية التي نظمتها أخبار الأدب عام 1998م
ايميل [email protected]
