((((( محكية )))))
كان الهوى بمرق على الشباك
محمل سلال العطر هدايا للعشاق
صرلو زمان ما مرق
يمكن نسي يمكن أخذ غفوة
يمكن سرقتو عالطريق
غيمة صغيرة
تيعلما كيف تصير
جرة مطر
يمكن من الشمس هربان
متخبي حد العين
بفيات سنديانة
أو تحت شجرة تين
يمكن مشغول كتير اليوم
ينزع عامهل تياب الشجر
ويلبسا تياب النوم
يمكن سرقتو العاصفة
ليسوق معها الغيم
الحامل معه جرار المي
ويمكن يكون بردان
حامل سلال الثلج
ليرضع الشلال
يمكن عالأمل بقيان
تا يجي نيسان
ويرجع يحمل سلال الورد
ويشتغل مرسال
ـــــــــــــــــــــــــــــــــ
بقلمي ـ محمد الخضر ـ سوريا