ليت الورق يقرى وش اللي كتب فيـه

و ليت القلم يدري وش اللي جرى به

إن كان ما تمسي فـصدري مشاريه

ولا أتضايق لـو تضيـق الرحابـه

واصوتي اللي عجزت الناس توحيه

غريب يوم أصوات غيـري تشابـه

البيت بيتـك و المـواري مواريـه

لكن كبرت و لا كبـر معـك بابـه

و الناي لو نقض جروحك بـأغانيه

جـروح غيـرك نقضتهـا ربابـه

ما هو يتيم إن كنت أنا اللي مغنيـه

ولا هو فقير إن كان جرحي زهابـه

و الغايب اللي يغري الشعر طاريـه

ما قـل قـدره لـو يطَـول غيابـه

كم لي و أنا أحث القصايـد تخليـه

حتى تلاشت رغبتـي فـي الكتابـه

و الشعر لو يفقد حروفه و أساميـه

مدري وش اللـي بعدهـا ينبغابـه

إحترت بين أعتب عليه و أراضيـه

أخاف لا يجـرح رضـاه بـعتابـه

أحيان أقول إبيه وأحيان ما أبيه

إلاّ أبيـه و لـو يبـي لـي عذابـه

يـاللي تجونه دامني ما أقدر آجيـه

وصوا ذهابه لا يشـح بــ إيابـه

و قولو له إني من كثر ماني أغليه

أشرب سرابه و أرتوي من سرابـه

و على كثر ما أنسى إذا قلت ناسيـه

دار الزمان و جاب عشقه و جابـه

حنّيت لأيامه وضحكـت لياليـه

قبله و بعـده كـل وقتـي رتابـه

إن لمت قلبـي عاقبتنـي محانيـه

وإن قلت أبرضا عز نفسـي رقابـه

البارحه كنت أكسر الروح و أنهيـه

كان الورق أرض و عيوني سحابـه

زرعت ماأحبه ولاعـاد لـي فيـه

و جنيت أحبـه لـو يطـول غيابـه