طريقة عمل فانوس خرز :

احنا هنعمل الفانوس على مرحلتين : 1- الجسم     2- القاعدة 

* الجسم :

1- هنعمل غرزة سداسية ونقفلها جامد ونخلي العقدة جوه الخرزة عشان الشكل النهائي.

2- بعدها هنعمل سداسي على واحد "يعني كل غرزة من الغرزة السداسية الاولي هيبقى عليها غرزة سداسية تاني"

كدا احنا خلصنا من تحت هنبتدي نطلع بالجسم لفوق

3- هنعمل غرزة رباعية على واحد ودا طبعا عشان نبتدي بجوانب الفانوس 

4- وهنا هنبتدي ندي شكل للفانوس وهنعمل خماسي على واحد ودا هيخلي ليه شكل خارج وداخل 

5- ركزوا كويس هنا الدور دا سداسي على اتنين بس هنعمله على الغرزة الفاضية اللي مفيش تحتها خرزة واقفة "الخرزتين اللي مفيش تحتهم واحدة واقفة"

"ومن اول الدور دا ممكن تبتدي تغيري لون الخرز بحيث تخلي الجزء اللي داخل لون والخارج لون زي اللي انا عاملاه "

6- وبعد كدا هتفضلي تزودي الادوار بنفس الطريقة لحد الطول اللي انتي عايزاه انا عملت ف الفانوس دا 9 ادوار 

7- "هنا هنرجع تاني نشتغل عادي على الخرزتين اللي تحتهم واحدة واقفة"  بعد كدا هبتدي اضيق الغرزة عشان اعمل الرقية اللي فوق وهعمل غرزة سداسي على اتنين وبعدها ف نفس الدور خماسي على اتنين وهتفضلي ماشية واحدة وواحدة لحد ماالدور يخلص 

7- الدور اللي بعده هعمل سباعي على تلاتة .

8- دا هنا بداية الرقبة وهعمله سداسي على اتنين 

9- وبعدين هضيق تاني وهعمل خماسي على اتنين 

10- وبعد كدا هنا هعمل رباعي على واحد 

11- الدور دا ركزوا فيه كويس هنا هعمل غرزة واحدة بس سداسي على تلاتة و3 غرز هعملهم خماسي على اتنين 

12- وبعدها تطلعي ب ايد الفانوس 

وكدا الحمدلله خلصنا الجزء الكبير من الفانوس 

* قاعدة الفانوس :

هنا بقى هنقلب الفانوس ونيجي عند الغرزة السداسية الاصلية بتاعة الجسم كله وندخل فيه الخيط 

1 - وهنبتدي نعمل غرزة رباعي على واحد 

2- بعدين نعمل عرزة خماسي على واحد 

3- الدور الثالث ف القاعدة هنعمله رباعي على واحد 

4- الدور الرابع خماسي على واحد 

5- الدور الخامس والاخير سداسي على اتنين 

وكدا الحمدلله خلصنا الفانوس 

وكل سنة وانتم طيبين :)