<!--<!--<!--<!--

رحل            000000              وكنت اتمني مقابلته        

  نجوم ولكن ( 2 )

هاجمتني ( باربي ) النموذج الامريكي لشكل العروسه ف احلامي فاستيقظت منزعجا مستعين بالله من شياطين العرائس ارتديت ملابسي مسرعا ومازل شكلها البغيض لايفارق خيالي جمال بارد لايوجد به احساس ملابس متانقه وعيون زجاجيه لاتنم عن اي معني  فررت مسرعا الي ملازي الصيفي المسرح الصغير علي كورنيش سكندريتي الجميله حيث يستضيف كل عام فرقه مسرح القاهره للعرائس لعلي اجد مغيث يفسر لي حلمي هذا دلفت الي قاعه الجمهوروجدت الستاره مفتوحه علي مصراعيها ووجدت ديكور لمولد نعم اعرف هذا الديكور شممت فيه رائحه الاصاله المصريه

و سمعت صوت استغاثه (رجعوني عايز ارجع ) تلفت حولي وجدت عروسه اعرفها فهرولت اليها مناديا صحصح

صحصح : خليك ف حالك ياستاذ انتا تعرفني

انا    : طبعا انتا بطل انتا علامه انتا

صحصح : انتا كداب

انا : ليه كده بقي دانا عارفك وعايز اقدمك لقرائي

صحصح : مش بقولك كداب هو ف حد بيقرا ف الزمن ده  وقراءك دول مين ان شاء الله

انا : ايوه كده نتفاهم انا عايز اقدم جزء من تاريخ مسرح العرائس واستاذنا الجزء الاكبر من التاريخ ده

صحصح : ياستاذ احنا اصبحنا بلا ذاكره محدش مهتم

انا : كفايه ياسيدي اني انا وكتير زي مهتمين ليه التشاؤم ده

صحصح : من غير ماتكمل انتا عارف انا فين دلوقتي ف المخازن ياستاذ البطل اللي بتقول عليه مرمي ف المخازن  وجابوني غلط اسكندريه ولما اكتشفو ده قالو احسن اهو يشم شويه هواء

انا : ياعم صحصح غلطه وكل الناس بتغلط عادي ممكن نغير الموضوع

صحصح :- انا مش مطمنلك  نغير نعمل ( اب جريد ) يعني

انا : ايه ده ماشاءالله انتا بتتكلم لغه العصر

صحصح : يأخ الاستاذ علمنا كده مقولتش حضرتك تعرفني منين

انا :  مش انتا صحصح بتاع   صحصح لما ينجح اللي عملها استاذنا سنه 63/64- وصحصح المصحصح 87/ 88 -  ومقالب صحصح وتابعه دندش ف السبعينات  -  وصحصح وجميله

صحصح: اهلا اهلا شوفو ادي الناس الكمل وبمناسبه لغه العصر اللي كنت بتقولها انتا عارف ان الاستاذ كان هو وجيل الرواد  ف مسرح العرائس مواكبين للعصر وسابقينه كمان

انا : ياسلام ازاي الا يعني ايه جيل الرواد

صحصح : مش عارف جيل الرواد جيل الرواد دول 9 افراد تم تدريبهم  علي ايد فنانه الشعب الروماني الفنانه المخرجه ((دوريناتانا سيسكو ))ومصممه عرائس ومهندسه الديكور  ((يوأنا كونستاتنيسكو )) ودول كانو جايين مع فرقه عرائس رومانيه اسمها (تساندريكا ) وكانت بتقدم فن عرائس ماريونيت فالدوله قررت تستفيد بخبره الناس دي وعملو اعلان ف الجرايد وقتها واتقدم 720 طالب نجح منهم  تسعه اللي هما السيده/نعيمه مصطفي والاساتذه /صلاح السقا /فكري امين/ابراهيم سالم /حمدابوالنجا/صلاح عبد الحي / عنتر حافظ/ ابراهيم رجب وده احترف التاليف الموسيقي والالحان بقي ملحناتي يعني

انا : والاستاذ محمد شاكر صح  انا كتبت عنه قبل كده ف نفس المجله قبل كده ف سلسله  نجوم ولكن

(راجع مجله المسرح عدد يناير/ سبتمبر 2004 الجزء الاول من سلسله نجوم ولكن )

صحصح : ماتنرفزنيش ياجدع انتا 0 الاستاذ محمد شاكر من زمن الفن الجميل وله فضل كبير ويبقي كده 8 والتاسع الاستاذ الفريد ميخائيل وده اتجه للتلفزيون من اول نشائته واهتم بعرائس التلفزيون والجيل ده ادرب علي ايد كتير من متخصصين العرائس العالميين مثل الروسي فيكتور افاناصف واستيفان لنكشن وغيرهم كتير

انا : انتا لخبطني فيه رواد وزمن جميل واتعايشو مع بعض ازاي

صحصح : اقولك ياسيدي  لانهم كانو بيحبو فن العرائس وبيعشقوه وكانو بيبذ لو اكبر جهد ف التعلم وكانت الدوله بتعملهم بعثات داخليه وتجيب محاضرين ف كافه الفروع زي الدكتورعلي فهمي متخصص ف التمثيل الصامت والاستاذ سليمان جميل ف الموسيقي والالحان الشعبيه والاستاذ حسن فهمي فن تشكيلي  ولازم مع الجو اللي من النوع ده يبقي ليهم  امتداد فقررو انهم يعملوا سبقه من نوعها ف العالم  تسمع عن تجربه حمار شهاب الدين

انا : لا والله

صحصح : حمار

انا :  نعم ليه كده

صحصح : ماقصدش حمار شهاب الدين دي ياسيدي فكره الاستاذ/بكر الشرقاوي وحوار عمنا الكبير صلاح جاهين والمسرحيه دي شارك ف اخراجها الفنان المبدع ناجي شاكروالمبدع ابراهيم سالم ومعهم الفنان صلاح السقا

انا : اثنين  شاركو ف اخراج مسرحيه واحده

صحصح : ايوه واحد   من الرواد مع واحد من زمن الفن الجميل  مش بقولك كانو جيل سابق عصره وكانو كلهم بيحبو بعض

انا : طيب ممكن نتعرف علي الاستاذ اتولد امتي عاش فين الحاجات دي يعني

صحصح  : شوف انا بقول ايه وانتا بتقول ايه يابني

انا : معلش القارئ لازم يعرف

صحصح : الاستاذ ياسيدي مولود ف مركز اجا دقهليه ف مارس عام 1932وحصل علي ليسانس حقوق 1957  ماشتغلش كتير سنه يادوبك والتحق باول دوره لفن العرائس  علي ايد الخبير سيرجي اورازوف الاب الروحي لفناني العرائس ف العالم  ومش كده وبس ياسيدي تعرف ان الاستاذ سافر الي رومانيا وهناك حصل علي دبلوم الاخراج المسرحي تخصص عرائس

انا : ياه ليه يعني مصر مكنش فيها معاهد او كليات ف الوقت ده

صحصح :- لا طبعا كان عندنا وعلشان كده  لما رجع من رومانيا حصل علي ماجستير من معهد السنما قسم اخراج والكلام ده كان 1969 لانه وجيله كانو مؤمنين ان الموهبه محتاجه للدارسه وعشان كده الفتره دي شافت سفر كتير من الرواد زي الفنان ابراهيم سالم والفنانه كاريمان فهمي ومصطفي كامل دول سافرو الي تشيكوسلوفاكيا كل واحد ف تخصصه والفنان احمد المتيني الي رومانيا 

انا : يعني كان فيه بعثات خارجيه  

صحصح : يابني الاستاذ درس واتعلم  لغات كتيره كان بيجيد اللغه الفرنسيه وكمان الانجليزيه والرومانيه  اتعلمها فين دي كمان من السفر والبعثات  اللغات دي  سهله عليه التواصل مع الفرق المختلفه حصل ازاي  فكرك من الدراسه والاحتكاك انا  شفت عرايس من كل بلاد الدنيا

انا :- ياسلام وحضرتك برضه معاك لغات

صحصح: حضرتك ماقولتليش بتشتغل ايه بقي

انا : صحفي وعايز اعمل روبرتاج  عن الاستاذ  صلاح السقا

صحصح : انا قلت كده م الاول استيوبد دونجي  عن اذنك  

  تركني مسرعا  ركضت وراءه ياستاذ ياعم صحصح يا ااااااا....  وسمعت صوت المولد يقترب مني وتركت الموكب يمر وبه البيارق الجميله والجميع يغني(قبة سيدنا الولي دول نوّروها ما أحلى البيادر والناس   بيزروها قبة سيدنا الولي)     وبائع الحمص ينادي

بائع : حمص حمص كل ماينقص ع النار يرقص

انا :يسترك هات حبه بقرش

البائع : ضاحكا كويس واضح انك حافظ

انا : ياريت اقعد مع حضرتك شويه دانا من عشاق العرائس وبعتبر الاستاذ هو

البائع :  اخينا احنا ولاد بلد واللي ماتعرفوش ان الاستاذ صاحب قهوه الفن و السندباد البلدي

انا : حلوه قهوه الفن دي قريبه ممكن نقعد عليها  

الارجوز : تمشي كده علي طول علي طول لحد ماتلاقي عماره

انا :  لحد مالاقي عماره وتلفت حولي لاجد الارجوز والبائع يضحكان تنبهت   ممكن اعرف بتضحكو علي ايه

الارجوز والبائع  :- يابني قهوه الفن والسندباد البلدي دي مسرحيات اخرجها الاستاذ لفنان جميل عمل بمفرده فريق هو وصاحب اعظم جهود فرديه ف مجال فن العرائس  الفنان الراحل (محمود شكوكو )وكانت من فصل واحد و ديكور المبدع حلمي التوني واتطورت التجربه دي وكانت 1960 لمسرحيتيتن كل واحده من ثلاث فصول وهي (مسرحيه الكونت دي مونت شكوكو ومسرحيه شكوكوف كوكب البطيخ ) ودي اخرجها الفنان    صلاح السقا والاستاذ/عنتر حافظ

انا : دي السنه اللي طلعتو فيها لاول مره للجمهور ف مسرحيه (الليله الكبيره)

الارجوز:-  انتا عارف ياستاذ ان المسرحيه دي اتعرضت لمده ثلاث شهور يابني انا اتفرج علي ملوك ورؤساء ودكان 1960 برضه

انا :-   (الليله الكبيره ) مانا عارفها   مش دي قام بتاليفها  استاذ الاساتيذ صلاح جاهين

الارجوز : - حلو حلوه استاذالاساتيذ دي تصدق ضحكتني

بائع الحمص :- يابني اتعرضت 3شهور كامله ف المعرض الصناعي الزراعي

انا :- والف موسيقاها الفنان المبدع سيد مكاوي وعمل عرايسها الاستاذ /ناجي شاكر ووزع موسيقها الفنان علي اسماعيل والديكور من صنع الفنان مصطفي كامل  صح

الارجوز :- لا مذاكر ياوله  سيبني عليه الواد طققني

بائع الحمص :- اسكت يارجوز احسن اقوله

الارجوز:-  ليه الفضايح دي

انا :- قولي قولي والنبي ياعم

بائع الحمص :- اللي متفشخر ده قدامك وبيقولك ان ملوك ورؤساء اتفرجو عليه   كان ميت ف جلده يوم ميتنساش  بنعرض ولا بينا ولا علينا لقينا ف وسط المتفرجين الرئيس جمال عبد الناصر وضيفه الملك محمد الخامس

الارجوز :- ونظرا لتاريخي القديم قلت خلاص يارجوزتي روحتي ف ابو بلاش ف الكزاموزو

انا :- نعم بتهرجو بجد

الارجوز :- حصل والله حصل ولكن عدت بخير وكنت وش السعد ليهم كلهم طلب سيادته

انا :- طبعا يقفل المسرحيه

الارجوز :- بتقول   ايه ياغبي انتا دي فتره من ازهي فترات مصر ف الفن والثقافه طلب من الدكتور  ولا خلاص انا خلاص  طهقت منه

بائع الحمص : - استني يارجوز افهمه انا طلب من الدكتور ثروت عكاشه بناء المبني الحالي لمسرح العرائس بحديقه الازبكيه وكلفته الدوله اكتر من مائه الف جنيه مصري

انا :- ياحلاوه وايه كمان وطبعا الاستاذ  اخرج مسرحيات كتير

الارجوز: انتي يابني ممكن تمشي من هنا ولا اقولك انا ماشي

بائع الحمص :- براحه يارجوز ايوه طبعا خد عندك ( الديك العجيب 95/60 حكايه سقا 66/67 اوكازيون 67/68 بعد التحيه والسلام 75/76 عوده الشاطر حسن 77/78 وخرج ولم يعد 83/84 وده غير عوده الشاطر حسن وعقله الصباع والاطفال يدخلون البرلمان  وحسن الصياد ومسرحيه النص نص ودي عن عمل ادبي للمعجزه دكتور يوسف ادريس 1972 ومجموعه صحصح  ياه كتيير كتير حمص حمص وحلاوه  وحب العزيز ياله الربعه بقرش  اشتري حمص 

         صوت :- تاكل ملبن اوعي لجيبك ده العيب عيبك قرب جرب

وتركني وانا مذهول من هذاالكم من الغزاره ف الانتاج ده غير اللي اكيد نساه بحكم سنه ياه واستغرقت ف التفكير

انا :- ايه  ده كله ممكن اساءل عن الجوايز اه ماهو اكيد حد كده يبقي اخد جوايز صح

صوت :- وسطن ايدك نشن يحميك يابني

انا :- ياعم انا بسال علي الجوايز الجوايز

لاعب البخت :- الجوايز ملبن ملبن

انا : لا الجوايز اللي حصل عليها الاستاذ

لاعب البخت :- تقصد الاستاذ صلاح السقا  لامؤخذه

انا :- طبعا

لاعب البخت :-لامؤخذ ا اخويا الحدوته بتاعتنا ماينفعش نقول ان واحد واخد الجايزه لاننا في المرسح بتاع العرايس بنشتغلو  كلنا علي قلب رجل واحد ومش ححرمك من اللي انتا عايزه وحنقولك الاستاذ لمؤخذه اخد دروع كتير قوي من مصر والدول العربيه الشقيقه وده ف بدايه طريقه

وكمان لمؤخذه اخد الجائزه العالميه الثانيه ف مهرجان  بوخارست الدولي  عام 1960وده نقدر نقول لمؤخذه ان الاستاذاستلم الجائزه عن عمل الليله الكبيره  ومهرجان ستدريكا الروماني برضو (الليله الكبيره ) 1962 ومهرجان برلين عام 1973 عن عمل صحصح ودندش والنمسا كرمت استاذنا عام1980ودرع مميز ف مهرجان جرش بالاردن 1985

والدرع الذهبي لدوله الشارقه عام 1986 والميدليه الذهيبه لمهرجان دول البحر المتوسط بايطاليا 1986 اما التتويج الاكبر من بلدنا بنت الاصول مصر ف عيد الطفوله 1997والمهرجان القومي للمسرح كرمه السنه اللي فاتت 2008

مع مجموعه من الفنانين ومبدعي مصر منهم الراحل بهجت قمر والفنان القدير عادل امام والدكتوره هدي وصفي ولمؤخذه تعرف ني معايا مفتاح مدينه

انا - حتشتغلني بقي

لاعب البخت :  مستشكرين منك الرزق علي الله معيا مفتاح مدينه نايل بتونس ولامؤخذه المرسح بتاعناعنده ثلاث مفاتيح سنه 2000 لليله الكبيره  ودي لاستاذنا و2001 لمسرحيه اللعبه ودي للجميل هاني البنا والرحله العجيبه للاستاذ محمد كشك

انا :- ياعم انا مالي انا بكلم علي الاستاذ

صلاح  السقا :- ايوه ياسيدي ماله الاستاذ

انا :- ابدا مش معقوله بعد المشوار ده والجوايز دي والخبره دي ماخدش مناصب ف الدوله

صلاح السقا :- لا طبعا حملت اعباء كتيره لمناصب عديده

( انتبهت فوجدت صوت بشري يحدثني والاستاذ اللي ف خيالي اصبح قدامي )

استاذنا اهلا بيك ازي حضرتك مش معقوله امنيه  حياتي اني اقابل  حضرتك

صلاح السقا :- اكمل كلامي انا ياسيدي شرفت بتولي مناصب كتيره منها رئاسه البيت الفني من 1988/1990 ورئاسه المركز القومي  للمسرح من 1990/1992  ده غير اني كنت مدير لمسرح العرائس ودي من 1960/1962ده غير اني شاركت بالتدريس لماده العرائس ف كتير من المعاهد الفنيه العليا ومعايا عضويه للمجلس الاعلي للثقافه وكمان عضو الهيئه العالميه لفنون ومسرح العرائس

انا :- ياهوبتتكلم حضرتك ببساطه دانتا مفروض يعملولك تمثال ف كل بلد

صلاح السقا :- ده حلم الفاضيين

انا :-ياه وانتا لسه بتحلم ياستاذ دانتا حققت احلام اجيال وبمناسبه الاحلام انا حلمت واليعوذ بالله بالعروسه باربي بتهاجمني

صلاح السقا :- ماهو علشان كده لازم تعرف حلمي حلمي ان يبقي ف كل محافظه علي الاقل مسرح للعرائس تعرف ان من ساعه منشاء مسرح العرائس نقول من 1959 ولغايه دلوقتي مافيش محافظه فيها مسرح للعرائس

تعرف ان ميزانيه المسرح اقل من ميزانيه اي مسرح اخر ف الدوله تعرف ان ايرادات المسرح عندنا تقريبا بتنافس مسرحيات كبيره مصروف عليها كتير  تعرف ان  بحلم ومش حبطل حلم ان يبقي فيه معهد او كليه متخصصه ف فن العرائس ويكون مقرها مسرح العرائس تعرف اني بحلم

وتصاعد ف سماءالمسرح  اصوات

اسعي اسعي اسعي خدلك صوره سته ف تسعه

منشدين دينيين يقول واحد منهم :
ليلتكم أنس وجلجلة .. جلجلة .. جلجلة ..
أنشد ولعلع يا ولة .. يا ولة .. يا ولة
شفت في منام صاحب المقام .. ده اوبه .. أوبه .. اوبه
ويمامة حايمة عليه تسبح ربها ..
يا نور النبي .. يا نور النبي .. يا نور النبي
ميّلت فوق ايده وجيت احبها
صحوني من النوم .. خدت بعضي وتني جدت
وبعودة .. وبعودة

وافقت من غفوتي التي اتضح انني غفوتها علي احد كراسي الجمهور ف المسرح الصغير لاجد الجمهور قد بدء ف التوافد ليشاهد احدي عروض مسرح العرائس والاطفال مبتسمين سعداء وانفتح الستار عن مجموعه من عرائس الليله الكبيره

والاطفال يشاهدون العرائس وتسالت هل يعلمون ان هناك

         نجوم ولكن (2 )
                                                                         عاطف ابوشهبه

مخرج  ومؤسس فرقه الطيف والخيال لفن العرائس وخيال الظل

                                                                   الاسكندريه 19/9/2009