دلفت الي مسرح السلام الصغير بمدينه الاسكندريه بعد ان شدني اعلان صغير جدا بجانب البوابه عن مسرحيه عرائس من انتاج مسرح القاهره للعرائس بحثا عن تحقيق اجريه مع احد نجوم هذا العمل واتضح انني جئت مبكرا قليلا لاجد عروسه ملقاه علي كراسي المتفرجين وما ان هممت بالانصراف حتي وجدت من يناديني ياستاذ ...ياستاذ
تلفت حولي فلم اجد سوي العروسه تجاهلت الصوت وللمره الثانيه حاولت الخروج وجدتها تتحرك تجاهي وتشدني نحو خشبه المسرح فقررت الذهاب معها
سالتها : نعم
أجابت :- حضرتك جاي تقابل حد معين ؟
• :- ايوه المخرج .ممكن
** :- اه الاستاذ محمد شاكر انا ممكن اكلمك عنه
• :- طيب ممكن اتعرف بحضرتك
**:-- انا سمسم الشقي
• :- تعرف الاستاذ محمد شاكر
** :- طبعا انا من اولاده
• :- أزاي معلش يعني حضرتك شويه سفنج علي قصاقيص قماش ..
** :- وخشب مش عايز تقول كده ؟ ولكن اللي ماتعرفوش ان الاستاذ عمل مني مجموعه السماسم وده ف الفتره من 74وحتي 84
• :- طيب ياعم سمسم ممكن نتعرف م الاول ؟ يعني نتعرف علي الاستاذ مواليد كام اتخرج منين الحاجات دي يعني
**:- والله ياخي انا مش بحب الصحافه ولا الصحفيين علشان الاسئله التقليديه دي
• :- بالراحه ياعم سمسم شويه دي حاجات لازم القاريء يعرفها
** :- ماشي ياسيدي الاستاذ مواليد منيا القمح شرقيه بدء مشواره الفني قبل ما جي انا واتعين ممثل 1960في مسرح العرائس وهو مخرج من عام 1974ووصل لدرجه مدير عام 1992يعني من جيل الزمن الجميل
• :- ومالك بتقولها بمرار ه كده
** :- اصلك مش عارف حضرتك الجيل ده اتعلم علي ايد مين ده اتعلم علي ايد رومان زي ( دورينا سيكو . وأوجيني بيوفيتش واستفان لنكش ) وكمان الروسي (فيكتور افاناصف ) ده غير البعثات الداخليه
• :- استني استني يعني ايه بعثات داخليه ؟ ممكن افهم
**:- مانا قلت ماحبش الصحفيين علشان كده أسئله غريبه والله بعثات داخليه ياستاذ يعني كانت الدوله مهتمه برفع كفائه جميع العاملين بمسرح العرائس ومهتمه بالفن عموما وكان بيجي ف مسرح العرائس بالقاهره دكاتره كبار يدرسون لجميع العاملين شتي المجالات منهم أ0د : علي فهمي استاذ التمثيل الصامت ود: ابراهيم حماده وكان بيدرس تاريخ مسرح وأ.د : سليمان جميل ( موسيقي والحان شعبيه وأ:- حسن فهمي (فن تشكيلي )
• : - طيب ياستاذ سمسم مكنش بيحصل يعني ان الدوله تسفر ناس ينقلو خبراتنا للعالم ويجيبو خبرات ناس تانيه ؟
• لحظات صمت
استاذ سمسم سمسم . سمسم ياعجيب ولم اسمع رد بل سمعت صوت اثنين بيتخانقو ووجدت احدهم مندفع فناديته
ياستاذ ياستاذ سم
*** :- لا انا تمتم
• :- يعني مش سمسم ؟
*** :- لا ياستاذ احنا دلوقتي عام 1974
• :- ايه ده بقي يعني ايه الكلام ده
*** : _ لأ حضرتك مش واخد بالك ماهو الاستاذ
• :- سمسم
*** : - سمسم مين ده . ده طلع للحياه من خلال عمل مسرحي طبعا وسماه الاستاذ محمد شاكر باسم ( سمسم وتمتم ) اللي هو انا . فقررت الدوله تسفر الاستاذ
• :- سمسم
***:- انت غبي يابني . الاستاذ محمد شاكر طبعا ومجموعه كبيره من فنانين مسرح العرائس اخذو لفه لمده 120 يوم راحو (بلغاريا/ تشكسلوفاكيا /رومانيا /المجر / المانيا الشرقيه / ده غير لفات تانيه كتير بس دي كانت 1964
• :- لفه سميها جوله سميها اكادميه انا دماغي ......
***:- طيب خد دي كمان تعرف ان مسرح العرائس شارك ف اكثر من 100 مهرجان دولي خد مثلا مهرجان بوخارست الثاني الثاني 1965 والثالث 1965 ومهرجان نانس بفرنسا 1971 ومهرجان الشباب الدولي ف المانيا الشرقيه 1973 ومهرجان كريوفا ف رومانيا 1977 ومهرجان مستلباخ في النمسا 1982 ومهرجان براغ 1999 وده حصلنا فيه علي جايزه التميز كاحسن فرقه بتقدم فلكلور
• :- دي جايزه حصل الاستاذ محمد شاكر عليها ؟
*** :- فعلا له حق سمسم يسيبك ويمشي وانا كنت بتخانق معاه واقوله عيب قال
• :- طيب نتفاهم ياستاذ تمتم عم تمتم
**** :- ياستاذ ف مسرح العرائس مقدرش اقول ان فلان اخد جايزه
• :- ليه ممنوع مثلا
**** :- مش ممنوع ولا حاجه ولكن زي فريق الكوره بيلعب او فرقه موسيقيه بيعزفو لحن جميل مش ممكن اقدر اقول اني اخذت جائزه لان الجائزه حققها معايا جميع العاملينمن اول اللي خط تصميم العروسه مرورا بالصانع وصولا الي المميكانيست اللي علي الخشبه وفنان محرك العروسه وصولا الي المخرج
• :- مين حضرتك معلش انا دماغي ساحت وقاعد اقابل ناس كتيره ومش فاهم حضرت عروسه برضه ؟
****:- انا محمد شاكر
• :- معقوله أزيك ياستاذ دأنا بدور علي حضرتك من بدري
**** :- معلش انا كنت مشغول شويه بس متابعك أتفضل اسأل
• :- أنا كنت باسئل عن الجوايز اللي حضرتك حققتها بنفسك
****:- ماشي ياسيدي حصلت علي جائزه اخراج عام 1976 وده كان ف مهرجان كونستلبخ في رومانيا وعملت عرض خاص بالمهرجان وكان معايا الاستاذ/أحمد فؤاد . وفي عام 1977
حصلت علي جائزه اخراج من مهرجان كريوفا ف رومانيا برضه
• :- ممكن حضرتك تكلمني عن اعمالك
**** :- أنا حكلمك عن مجموعه السماسم ودهي اعز حاجه عندي لاني كنت عايز اوصل من خلالها شيء محدد للطفل والاسره والمجتمع . فمثلا ف سمسم وتمتم كنت بعالج الطفل من خلال تعاملاته مع اصحابه في المدرسه والشارع والاسره . وفي شقاوه سمسم كنت بعالج الطفل الشقي المتمرد وبقول ان الطفل بداخله طاقه كبيره يجب ان تستثمر من قبل الاسره وتوجه ف الاتجاه الصحيح عن طريق الحافز وليس الضرب . وفي سمسم العجيب 78 كنت بعالج مايجب عليه الطفل ان يكون من شقاوه مطلوبه وهدوء مطلوب وكيفيه خلق التوازن . وممكن كمان اقولك علي تجربه جميله عملتها من خلال عرض اسمه اخترنا لك وده كان 87 كنت محاوله لنقد المجتمع باستخدام فن العرائس
• : - شيء جميل ياستاذ
****:- نسيت اقولك حاجه مهمه اني استثمرت ف العمل ده الاستراحه مابين الفصلين وقدمت مونتاج مجموعه من اغاني عشنا معاها وحبينها عاشت ف وجدنا وتاريخنا زي : ع الدوار لمحمد قنديل ولثلاثي المرح اغنيه ابنه الفرح ودي كتبها الاستاذ / عبد السلام امين مخصوص للعمل ده وجمعت كل اغاني الافراح من الصعيدي والفلاحي والاسكندراني لنصل لاف النهايه لنصر 6اكتوبر .
• :- جديده شويه عليه حكايه استغلال الاستراحه . ممكن اعرف التكنيك اللي استخدمته ف اعمالك .
**** :- انا باستخدم كل الانواع اتعلمنا عليها كلها بس بشكل شخصي باعشق فن الماريونيت لاني باشوف انها تعطي امكانيات اكبرللمصمم والفنان الاعب والممثل اللي بيقوم بالدور والمخرج
• :- احلامك لفن العرائس
****:- اتمني الابقاء علي الثروات البشريه الموجوده من جيل الروادزي الاستاذ/ صلاح السقا /لطفي السيد/ فكري امين / مدام فوزيه عبد اللطيف / مريم عبد اللطيف . لان كل واحد من دول عنده خبره صدقني مش موجوده ف العالم كله . بكلمك من خلال سفرياتي واحتكاكي بجميع العاملين في فن العرائس ف العالم . وموجود بمسرح العرائس بالقاهره خبره نادره مش موجوده ف العالم كله
• :- انا ملاحظ ان كبار وصغيرين بدؤ يدخلو المسرح
****:- ماهي دي مشكله مسرح العرائس
• : - ازاي
****:- ماينفعش نقدم عرائس للاطفال فقط لاننا ف بلدنا الكبار بيجو مع الصغيريين فلازم نراعي ده وبنبقي حريصين وبنراعي ده ف الاعمال المقدمه اننا نمتع الكبار والصغار
• :- المشاكل التي تواجه مسرح العرائس
****:- الحمد لله ان مسرح العرائس معظم مديرينه من ابنائه وشغلنا مع الاطفل وللاطفال بيعلمنا الصبر علي مواجهه أي عنصر خارجي يحاول يهدم امات المشكله الازليه الميزنيات ياصديقي للاسف بينظرو لمسرح العرائس بما انه بيقدم فن للصغار فلازم تبقي ميزانيته صغيره . تكنه مش كده ؟ عن اذنك علشان العرض حيبداء
وبدئت الاضاءه ف الخفوت والموسيقي يزداد شدوها ووجدت الخشبه تعج بالحركه لتبعث ف العرائس الحياه وجدت نجوم يصفق لهم الاطفال متمثله ف العرائس التي يحبونها ولكن يصعب عليهم معرفه النجم الذي يقوم ببعث الحياه فيه وتحريكها
لذلك وجدت نجوم و.......لكن
نجوم ولكن نشرت ف مجله المسرح عدد سبتمبر يناير (2004 )
الاسكندريه ف اغسطس 2004
عاطف ابوشهبه