بقلم اسلام محمد

انا اسلام محمد عندي 26 سنة انا عايش في مصر لوحدي وأهلى عايشين في دبي لظروف العمل وانا دلوقتي خاطب او بالاحرى كنت خاطب ... لكن خطبتي ماتت في حادث سير كنا رجعين بالعربية بليل واحنا في الطريق عدينا على محل من بتاع الحاجات القديمة فكانت خطبتي من النوع الي بتحب الحاجات القديمة دي وركنت العربية ودخلنا المحل اعدت تلف فيه شوية لغاية ما شافت ساعة شبه المفتاح وكان شكلها غريب شويه كانت شبه اثرية عجبتها اوي هي الساعة لكن مكانتش عجباني لأني مبحبش الحاجات القديمة بس هي اصرت انها تجبها وطبعاً انا مرضتش اكسفها وفعلا جبتهلها.

طلعنا من المحل وركبنا العربية واحنا مشين بالعربية شوفت ميكروباص ماشي بسرعة ادامي فجأة خبطنا فيه وعملنا حادثة ... أنا عرفت اطلع من العربيه بعد ما اتقلبت واتصلت بالأسعاف والحمدلله وصلت بسرعة روحنا على المستشفى وللأسف خطبتي كانت اصابتها قوية شويه دخلت غرفة العمليات لأن الدكتور قال انها محتاجة عملية طارئة.

قعدت في المستشفى إلى حوالى الساعة 3.30 الفجر تقريباً لاقيت الدكتور طالع وبيقولي البقية في حياتك انا بعد ما قالى الجمله دي انهرت واغمى عليا وبعدين سمعت الدكتور بيقول للمرضة سجلي عندك حالة الوفاة الساعة 3.30 وبعد مرور 3 شهور قدرت اتأقلم مع الامر بس كنت أما اشوف الساعه اللى جبناها بفتكرها بيها.

كنت بحلم كل يوم أني بجري في ممر طويل اخره باب بيطلع من تحته نور ضعيف ويكون في ايدي الساعة اللي شبه المفتاح وبفتح بيها الباب وبلاقي جوه راجل عجوز قاعد على كرسي وبيبصلي ولاقيته رفع ايده ومشاور كأنه بيقول بص وراك ... وأنا بلف علشان أشوفه بيشاور على ايه لاقيت خطيبتي واقفه بفستان الفرح وشكلها جميل انا كنت فرحان جدا وقتها وجيت اقرب منها لاقيت وشها بيتحول وبدأت تصرخ بصوت عالي جداً واسمع صوت من بعيد بيقول حالة الوفاة الساعة 3.30 بعدها بقوم مفزوع من النوم وأبص للساعة ألاقيها 3.30.

بقوم بصعوبه لحد ما اروح الحمام وأغسل وشي علشان افوق من الخضه بعد ما غسلت وشي بصيت في المراية الاقي وشي لونه ازرق ومليان خدوش وهدومي كلها دم وفجأة ظهرت ورايا جثة شبه خطبتي حاولت اهرب لكن معرفتش لأنها خبطت راسي في المراية والمراية اتكسرت ولاقيت حاجة زي ايد بتشدني من جوة المراية لكن قعدت اقاومها والحمدلله نجحت وفلت منها لكن فى نفس اللحظة وقعت على الارض واغمى عليا.

فوقت لاقيت الساعة 11 صباحاً ولاقيت نفسي لسه واقع فى ارض الحمام وجسمي مليان دم ببص على أيدي لاقيت مكتوب عليها بالدم « يا من تحتفظ بتلك الساعة عليك أن تتحمل لعنتها » ... في هذه اللحظة اكتشفت ان الساعة دي هي سبب كل اللي بيحصلي.

قررت اني اروح المحل اللي اشترينا منه الساعه و روحت فعلا وقابلت صاحب المحل وحكيتله على اللي حصل معايا وسألته عن الساعة دي ... صاحب المحل: قالي يا ابني انا هقولك حكاية الساعه دي.

زمان جالي راجل عجوز المحل وعرض عليا الساعة للبيع بصراحه الساعة عجبتني اوي واشترتها لنفسي مش للمحل ولكن دي كانت اكتر حاجة ندمت عليها في حياتي لاني لمدة عشر سنين كنت بحلم بنفس اللي انت حلمت بيه وبيحصلي نفس اللى حصل معاك كنت بعيش أسوء أيام حياتي، قررت أني أدورعن الراجل العجوز اللي اشتريت منه الساعة لغاية ما عرفت أوصله وأعرف بيته وفعلا روحت ولكن قابلني راجل تاني وسألته عن الراجل العجوز ده وقولتله لازم اقابله أرجوك وحكيتله اللى حصلي من وقت ما اشتريت الساعه ... لاقيت الراجل وانا بحكيله لاقيته بيبصلي بنظره كلها شؤم وتكشير وكأنه كان عايز يقتلني بس كل اللى قاله ليا روح لحالك يا ابني احسن لك.

قولتله انا عايز اعرف الراجل ده راح فين أنا سألت عنه والناس قالولي أنه ساكن هنا، رد عليا وقالي يا ابني الراجل ده مات من عشر سنين ... قولتله نعم إزاي دا أنا لسا مقابله من شهر قالي شهر ايه يا ابني بقولك ميت من عشر سنين !! قولتله طيب هوا الراجل ده كان بيبان عليه حاجات غريبة يعني بمعنى أصح كانت تصروفاته غريبة بيعمل حاجات غريبه ... قالي الراجل ده كل ليله كنا بنسمع عنده اصوات غريبة واصوات دقات ساعات ولكن كنا نعرف انو بيشتغل في صنع الساعات ... في يوم لاقينا بيته بيتحرق ولكن مكانتش الحريقه طبيعيه طلبنا المطافي وجت وطفت الحريق وكل واحد دخل بيته.

تاني يوم دخلنا عنده البيت وكانت النار اكلت كل حاجه وشوفنا جثته متفحمه ولكن الغريب أنه كان ماسك في إيده ساعة شبه المفتاح مسكت الساعة وفجأة لاقيتها بتدق لاقيت عقرب الساعه بيشاور على مكان معين في البيت مشينا في الاتجاه دا نشوف هيودينا فين لاقينا باب مقفول اعتقدنا ان مفتاح الباب دا هي الساعة دي و فعلاً فتحنا الباب ودخلنا لقينا كتب وساعات كتير مرميه في كل مكان واكتشفنا ان الكتب دي كانت كتب استحضار جن واللي استغربنا له ايه علاقه الكتب بالساعات لكن موصلناش لحاجه وكل واحد رجع بيته ولكن أنا أخدت الساعه لأن شكلها عجبني ... قولت اما اخدها واحطها فى المحله عندي بس الغريبة اني بعد ماحطتها في المحل بكام يوم المحل اتحرق.

واحد من اللي شافو المحل بيتحرق قال ان الساعة فجأة اتحولت لكتلة من النار وهى اللي حرقت المحل واستمر معايا موضوع الاحلام والحاجات الغريبة اللي بتحصل معايا طول عشر سنين.

خلص الراجل حكايته وقالي يا ابني لو عايز تخلص من اللعنة دي حاول تروح بيت الراجل وانا هديلك العنوان وفعلا أخدت منه العنوان و روحت بيتي وقعدت أفكر في كل الكلام والحكاية اللي حكاهالي الراجل وروحت فى النوم وكالعادة حصلي نفس اللي بيحصل كل يوم.

فكرت اروح لشيخ يساعدني في اللي انا فيه دا وفعلا روحت للشيخ وحكيتله كل حاجه وشاف الساعة وقالي انت جبتها من فين قولتله كنت اشترتها من محل بيبع الحاجات القديمه ... قالي الساعة دي ملعونة او كان متحضر عليها جن قولتله أنا عارف علشان كده عايزك تساعدني في فك اللعنة دي بس الراجل اللي باع ليا الساعة قالي انى لازم اروح بيت الراجل اللي صنع الساعة دي وهو كان مديني عنوانه قالي الشيخ عدي عليا بعد اسبوع اكون حضرت الحاجات اللي حستخدمها لما نروح البيت ده.

وفعلاً بعد اسبوع اخدت الشيخ و روحنا بيت الراجل و دخلنا البيت والشيخ قعد يقرأ قرأن وانا كنت خايف جدا وقلبي مقبوض و فجأة لقيت حاجات بتطلع من السقف والجدران والارضية ملامحها مكانتش باينة بس اعتقد اني ديه جثث وفجأة لقيت حاجة مسكتني وكانت بتشدني جامد بتحاول تأخدني معاها وقعدت اقاوم اقاوم لكن قوتي راحت واغمى عليا ومعرفش ايه اللى حصلي بعد كده.

فوقت لاقيت نفسي في مستشفى والشيخ جانبي وقالي حمدالله ع السلامه خلاص اللعنه انتهت وانت بقيت كويس دلوقتي وسبني ومشي. خرجت من المستشفى وروحت البيت لقيت التليفون بيرن كان ابويا اللي بيتصل عليا وقالي البقية في حياتك اخوك اتوفى انا اتصدمت من كلام ابويا لأنها كانت تانى صدمه في حياتي بعد وفاة خطيبتي ... قولتله اتوفى ازاى يا بابا قالي احنا لاقينا ميت وجسمه كله متخربش وكله دم ووشه ازرق وكان مرسوم فوقه على الحيطة ساعة شبه المفتاح ومكتوب جنبها انها اللعنة !! ...

بعد الحادث ده ابويا وامي قرروا يرجعوا يعيشوا في مصر ومشيت الحياة بعدها عادي جدا إلا في مره من المرات لاقيت عقارب الساعة بتلف عكس دورنها ولقيت نفسي في العربية جنب خطبتي تاني ... تمت