الكاتب والسيناريست الكبير خالد السيد علي

(موقع قراء ومحبي الكاتب) *******(منصة المؤلف الإلكترونية)

 

بأمارة إيه..! أقولك يا بابا...؟!

 

 كلمات الكاتب/ خالد السيد علي

 

تغيب تغيب بالسنين

وتيجي مليان حنين

بعد ما يعدي كل عيد

أو يعدي يوم حزين

*****

وتقولي عامله إيه معاك الدنيا

تعالى ف حضني أحكيلي يا ابني

مهما غبنا عن بعضنا

أنا أبوك وأنت ابني

*****

لاااااااا يا عم الحاج

لاااااااا إن كنت حاج

قولي بأمارة إيه

أنا أقولك يا بابا..؟

*****

بأمارة إن عدى من عمري سنين

وما اتقابلناش غير كام مرة

بأمارة إن عدت عليا كتير أحزان

ومالاقتكش فيها ولا مرة

*****

بأمارة إيه وللا إيه وللا إيه

أقولك يا بابا...

بأمارة خوفك عليا وأنا بعين البراءة

واللا رعايتك ليا وأنا بأبدأ القراءة

بأمارة  حضنك ليا وأنا  عيان

وللا فرحتك بيا وأنا فرحان

بأمارة إيه واللا إيه واللا إيه

أقولك يا بابا...؟!

بأمارة لعبك معايا وأنا صغير

بأمارة  لهفتك عليا وأنا صغير

واللا لما بأخوف حد بيك

وأقول حأجيبك بابا يوريك

بأمارة إيه واللا إيه واللا إيه

أقولك يا بابا...؟!

بأمارة ذكريات الطفولة والمراهقة

والشباب اللي شوفتني فيها

واللا ذكريات قعدة الطبلية واللقمة

اللي بتشيلها من بقك ليا

بأمارة إيه واللا إيه واللا إيه

أقولك يا بابا...؟!

بأمارة أمي اللي شايله همي

من صغري

وحياتك عندي لحد دلوقتي

شايلاه من صغري

أنت رميت الأمانه ونسيتها

وحسابك عن ربي

وأمي شالتها وحافظت عليها

وحسابها عن ربي

*****

وعايزني أقولك يا بابا

بعد دا كله يا حاج بابا

هو يعني إيه بابا

طب عملت بيها مرة

طب نص مرة

ربع مرة

*****

خلينا ساكتين يا عم الحاج

العمر خلاص عدى وراح

وأنا وأقسم برب السماء

ما في قلبي حاجه وسماح

*****

خلاص يا عم الحاج خلصت السنين

أشوفك بعد أي عيد أو أي يوم حزين

يا عم الحاج..أديني أمارة أقولك يابابا

*****

22-8-2018م

 

 

المصدر: من إبداعاتي الشعرية ضمن ديواني الإلكتروني حال الدنيا

الأديب والسيناريست والشاعر الكبير خالد السيد علي

khaledelsyedaly
أعزائي وأحبائي محبي الكاتب والمفكر الكبير خالد السيد علي هذا هو الموقع الأول على بوابة كنانة أونلاين(منصة المؤلف الإلكترونية) ويسعدنا ان نتواصل معكم في عالم المعرفة.. كي نتعلم معاً ونزداد نور على نور..دعوة لاحباء الكاتب للمشاركات.. يقول كاتبنا في الابداع على الانسان أن يبدع في أي مجال حتى يكتشف نفسه..... »

ابحث

تسجيل الدخول

عدد زيارات الموقع

2,972