ليلاتي..ليلاتي بيعدي قصاد البيت
وانا بشوقي بستني اشوفه يفوت
واقول يمكن بنظره يبص عليا لفوق
واشوف رمشه وانا واقفاله ف الشباك..
خاطفلي القلب متحير ي قلبي معاه
جفاني النوم وايه اعمل انا وياه
واقول انساه ولا عارفه بيوم انساه
تعبني هواه وانا بستني ف الشباك..
واناجي الليل وانا لوحدي بااعد نجوم
واقول مواويل واغنيها بصوت مكتوم
صداها يرج اركاني يقول محروم
ونفسي بنظره من عينه على الشباك..
ي هاجر رمشي م تمسي على الغلبانه
يوماتي بتمشي وتسيبني ابات حيرانه
واناجي يارب يسمعني يشوف انسانه
يوماتي واقفه بتستني من الشباك..
واقول اندهله ولساني ساكت صوته
واشجع روحي تندهله لحظة مروره او فوته
واول م المح لطيفه بعيد جايني
اغندر روحي واتمايل من الشباك..
وازين روحي بالكحله وبالطرحه
ورعشه تهز اركاني من الفرحه
لو ايده تلمس لإيديا وانا سارحه
م انا سارحه وانا واقفاله ف الشباك..
ويشقشق فجري ولسايا ف خيال طيفه
سرحانه ووافقه وبتمني اني اشوفه
بحلم بالجنه وانا ايدي لامسه كفوفه
وازاي راح احقق احلامي من الشباك..
م انا لازم انزل واقابله وابطل خوف
واحكيله على حبي لقلبه وغرام بيطوف
من لحظة رمشي ماراح قابله ولحبي يشوف
وحبه اللي خطفني وخدني من الشباك..