العريس الفلسطيني
مونودراما
تاليف كامل الباشا
The Palestinian groom
by
Kamel elbasha
Monodrama
Palestine : Jerusalem
Phone :0097226260549
Mail : [email protected]
ارجو مراسلتي لاخذ الاذن للنشر او الانتاج .
* العريس الفلسطيني *
مونودراما في فصل واحد .
المكان : مرحاض في مخيم جنين .
الزمان : نيسان 2002 .
المشهد الاول
ــــــ
( من خلف الستار نرى ظلال صالح " ابو سلكه " جالسا وقد احتضن نفسه بحيث توحي جلسته بمظهر انسان مرعوب ، يتحرك ، يبدا بدندنة لحن اغنية " بلاد العرب اوطاني " ، يقف ، يتوجه نحو باب المرحاض ويحاول فتحه ، يبدو من حركته ان هناك ما يسد الباب من الخارج ، يتجول داخل المرحاض بينما يعلو صوته تدريجيا الى ان يتحول الى صراخ استفزازي ، ثم ينقطع الصوت فجاه ، يتلوى في مكانه من المغص ، يتوجه مسرعا بخطوات مرتبكه ، ينزل سرواله ويجلس فوق المرحاض ويبدا بالتبرز ، يعاود ترديد اللحن السابق ويتخلله اصوات خروج الريح وصوت الشد الناتج عن حالة امساك يعاني منها .
يبحث عما يتجمر به ، يجد اوراق صحف مقطعه خصيصا لهذا الغرض ، يتردد قبل استعمالها ، يهمهم قرائتها ، على ضوء الشمعه :
· نسف المولد الكهربائي في جنين وانقطاع الكهرباء عن 70 الف نسمه ...
· مقتل ضابط برتبة ميجر .
· محاصرة عدة جنود داخل منزل يعود لعائلة الجربوع .
ـ اكلنا هوا .
· القاده الاسرائيليون يعترفون بشراسة المقاومه .
· انقطاع المياه عن المنطقه والمستشفيات .
ـ زي لبنان ، شعب واحد .
· 150 صاروخا على مخيم جنين في يوم واحد .
ـ يعني 150 مليون دولار امريكي ، يا بلاش !
· جنود : موفاز قادنا الى المذبحه .
ـ ( متوجها للجنود ) ضحك عليكو يا مهابيل .
· الجرافات العملاقه تدخل المخيم .
( صوت بلدوزر ضخم يحطم البيوت ويجرفها في طريقه يترافق مع تحرك الستار ليظهر صالح من خلفه جالسا على المرحاض وظهره للجمهور ، يتجمر بالاوراق ، يرميها ارضا ، يقف ، يرفع سرواله ، يستدير ، يفاجا بالجمهور امامه ، يصرخ مرتعبا ، يرفع يديه للاعلى ، يقف على الحائط ويديه للاعلى ، صمت ، يرتجف بحيث يبدو غير قادر على الوقوف ، صمت وسكون ، يبدا الدندنه من جديد بصوت مرتجف ، يسترق النظرات ، عندما يطمئن يستدير ويداه ما زالتا مرفوعتان ، يقترب من الجمهور ، يتفرس ملامحه :
ـ بينّي بعرفهم الجماعه هدول ؟ شكلهم زيي ! والله كأني بعرفهم ، هادا بعرفو امنيح ، بيشبه المخرج ، او يمكن حدا بيشبهه ، ايه ، بيتفرجوا عليّ ، حلو ، صرنا فرجه ، ابو سلكه ! طنش ما كلو امطنش .
( ينظر الى القطع الذي احدثه مرور البلدوزر ، يبدا بضحك يتحول الى هستيريا يختلط فيها الضحك بالبكاء يرقص ضاحكا في المكان والممر ، اطلاق نار ، يعود للمرحاض ويختبىء خلفه مرتعبا ، صمت ، يعود للفتحه ويتابع الضحك الى ان يستلقي على ظهره ، صمت ، يتوجه للجمهور ) :
ــــــــــ
المشهد الثاني
ـــــــــ
جود افننك سير ، ون دلار ، بلستاين اونلي ون دلار ، بونسوار مسيو ، شيكل يروشلايم شيكل احاد ، بونا سيرا ، اونادراخما ، بلستينا ، تن فوتو ون دلار ، بس بشيكل احلى عشر صور بشيكل .
( يتخيل وجود راديو ، يستمع اليه ، وششششششش ، يتوجه للحنفيه ، يقلب المحطات )
ـ شخ شخ شخخخخخخخخخخخخخخخخ
ـ وسهلا بكم في جولة سريعه شخخخخخخخخخخخ
ـ طالعلك يا عدوي طالع من كل بيت وحاره شخخخخخخخخخخخخ
ـ ما زالت قوات جيش الدفاع شخخخخخخخخخخخخ
ـ وبرنامج بخخخخخختك اليوم شخخخخخخخخخخخخ
ـ اشد على اياديكم وابوس شخخخخخخخخخخ
ـ هذا وما تزال المعارك مستمره حتى هذه اللح شخخخخخخخخ
( يغلق المذياع " الحنفيه " )
ـ ويا عريس كثر ملبس ، يا عريس كثر ملبس . بديش اموت .
عريس ، في بلادنا بيسموا الشهيد عريس ، بس انا عريس عريس مش .....
جيت لابس البدله وجاهز ، جيت اخد العروس انطبللنا شوي وانزمرلنا شوي ونحمل العروس ونقبع قبل ما الدنيا تولع اكثر ما هي مولعه :
ويا عريس كثر ملبس
يا عريس كثر ملبس
وان بدك فدائيه بنلبس
ان بدك فدائيه بنلبس
الله عليه واسم الله عليه
راسو اعلى من رجليه
حطو الجره وهاتو الزير
زي عريسنا ما بيصير
متخبي مثل الصراصير
ومفكر قررنا المصير
فار مخبى جوا الدار
ومفكر حالو عنتار .
( يكرر الجمله الاخيره عدة مرات ، يتخيل امه )
ـــــــــ
المشهد الثالث
ــــــــــــ
ـ دخيلك يما بلاش بنت خالتي ، انا لا بعرفها ولا ابتعرفني ، طول حياتي ما شفتها غير مره واحده وخطف ، يعني يا دوب لمحتها لمح .
ـ والله والبيت اللي بناه الله اذا ما اتجوزت بنت خالتك واليوم قبل بكره لادور وراك في الشوارع راسي منكوش ، وثوبي ممزوع وحافيه .
ـ حافيه !؟ انا ابو سلكه على سن ورمح تمشي امي في الشوارع حافيه ، ولا يهمك يما ، الكندره علي .
ـ اليوم قبل بكره ، البدله جاهزه والمهر موجود ، ابتحمل حالك وطيران عالمخيم ، ابتكتب عليها وبتجيبها معاك وبترجع .
ـ بس يما خلينا نستنى شوي عبين ما تهدى الانتفاضه ، الجيش محوط المدن ومبين مش ناوي على خير .
ـ خايف يا روح امك ، هو انتا احسن من بقية العالم ، اللي بيصير عالناس بيصير عليك ، انا وعدت اختي بهوية القدس ، وكلمتي ما بتصير تنتين ، اليوم يعني اليوم .
قرار ، وقرارات امي زي قرارات مجلس الامن ما بينقضها غير الشديد القوي ... ها ؟ ، امريكا واسرائيل ! يلا بيعين الله .
يا ظالم لك يوم
مثل دق الثوم
مهو انا بستاهل لو رديت على امي قبل عشر سنين كان هلق عندي عشر اولاد نصهم شهدا .
طالعلك يا عدوي طالع من كل بيت وحاره وشارع .
ــــــــــ
المشهد الرابع
ـــــــــــ
نشف ريقي الله ينشف ريق اليهو..... ولاّ بلاش ... بسواش تيجيني طايشه اتطيرلي طاسة راسي ... او تطلع علي دبابه تهرسني هرس .... او تفرمني مدحله ..... او يفتفتني صاروخ .... او يوقع علي السقف ..... او اتفعص بين الحيطان .... او انخنق تحت الردم ......
نحن لها يا مها ، مين مها ؟ .....
يا ويلي ويلي عيونها
عيون المها يا عيونها
ولو دبلتلي جفونها
تهزللي الحنايا
وعل مايه عل مايه ع العين ، عل عين .
وعطشان يا صبايا دلوني ع السبيل ....
أي والله العظيم اشي بيزهق ، لئيمتا بدي اضل محشور في المرحاض ، الماء والخضراء والوجه الحسن ، اشي بيطلع الروح ، بيطلع شو ؟
وحملت حالي ووينك يا مخيم جنين ، هي لو انها خالتي سكنت مدينة جنين كان اهون بلا ، بس جوزها بلا :
ـ هو انا بدي اقضي حياتي من هجره لهجره ، ما بطلع من المخيم الا على بلدنا عين المنسي .
ـ يا جوز خالتي بس نرجّعها ابترجعلها وين ما تكون ساكن .
ـ ابدا ، ما بطلع الا ععين المنسي او عالقبر .
همه وين راحو ؟ خالتي ! جوز خالتي ! بنت خالتي ! اتغلبش حالك ، من ساعة ما سلخ الصاروخ الدار ما اسمعتلهم حس ، ومن ساعتها وانا محشور في بيت ال ....
ـــــــــــــ
المشهد الخامس
ــــــــــــ
التواليت ، تواليت متواضع فيه جميع المواصفات المطلوبه ، بتحبوا تعملوا تور معاي داخل التواليت ، اتفضلوا اتفضلوا ... ما تقلقوا ، صحيح انا ما معي رخصة دليل سياحي ، بس بعرف اسوّح ، خبره عمليه 15 سنه ، نص السواح اللي زارو القدس محسوبكم امسوّحهم ، ( بالفصحى المكسره ) بدات حياتي بائعا متجولا لكرتات الصور تن فوتو ون شيكل ، وانهيتها دليلا سوّاحيا ، وكانت اخر جولاتي في التواليت ، هون مثل ما حضراتكم شايفين ، الابريق وبنسميه ابريق المطهره وموجود جواته شوية مي يعني ماء ، مااااء والمي مقطوعه يا افندي ، في العاده بيستعمل لل... بس في حالتنا اللي بننعم فيها بديمقراطية الاحتلال بنقدر بس نشرب منه ، وهون مثل ما حضراتكم ملاحظين قطع من ورق الجرايد القديمه المقطعه ، والها عدة استعمالات ، ابنقدر ان.....مخط فيها ، او ... ان....مزع فيها او ... ان...شخبط عليها او...ان .. ان .. انمسح فيها او نقراها للتسليه : بووول بول بوويل ـ اسمه مناسب للمكان ـ السلام ضر.. ضر .. ضر .. ضر .. ضروره حتميه لمنطقة الشرق الاوسط . مسلي ، صح ؟ وهون اذا بتلاحظوا اوراق جرايد برضو بس تالفه ، وهاي قشاطه للمسح والتقشيط ، بس بقدرة قادر ممكن تتحول لسلاح خطير اثناء الحصار او منع التجول ، لانه ممكن حدا يستعملها في الطوش ، صح ؟ واذا حدث وشاف طرفها احد الجنود بواسطة الاجهزه المتطوره اللي معو ، ساعتها ممكن يعتبرها فوهة مدفع او رشاش او ما شابه ويطلق النار عن جنب وطرف وانتوا ونصيبكو ساعتها ، وبالمناسبه هاي هديه من امي لخالتي ، يعني قشاطه قدسيه ابتحمل هوية القدس الزرقا ، زيي بالزبط . بس طبعا هادا ما بيعني انو الها معامله خاصه ، عند اخواننا المحتلين ما في أي تمييز ، مثلها مثل أي قشاطه جنينيه او نابلسيه او خليليه ، واعذروني اذا كنت بطول بالشرح بس هاي كلها معلومات هامه وضروريه وخصوصا اذا كان الواحد بيشتغل دليل سياحي .... وهاي شبه حيطان لانها موقته زي كل شي بالمخيم وهادا شبه باب ، وشبه شباك وانا شبه بني ادم ، شبه بابوج ، وهادا شبه .... لأ ، هادا مش شبه ، هادا ميه بالميه تواليت عصري وصناعه اوروبيه ومدعوم من الدول المانحه واسمو الادبي ... بيت الراحه ، وهاي شمعه ، اخر ما توصلت اله حضارة القرن الواحد وعشرين من اساليب الاضائه ، متوفره وبكميات في جميع محلات البقاله داخل المخيمات وفي المحلات القريبه منها ، اطلبوها من عوض عوض الله بيعوض الله ، ولمعلوماتكم هاي صناعه اسرائيليه غير مشموله بالمقاطعه ، لانه ما في الها بديل وطني ، او في الها بس التجار امطنشين لانه مربحها اكثر ، او لانه المواطنين بين قوسين " المستهلكين " بيفضلوها عن الصناعه الوطنيه لانها برضو بين قوسين " احسن " . ولمعلوماتكم هاي ممكن تكون اخر شمعه ، كيف عرفت ؟ بسيطه ، بنحمل العلبه هيك وبنرجها ، اذا طلعت صوت بتكون فيها واذا ما طلعت ... سامعين صوت ؟ معناته ؟ ... معناته هاي اخر شمعه واذا ذابت راح اعيش في العتمه وانا بكره العتمه ، اه بكرهها وبخاف منها كمان .
ـــــــــــــ
المشهد السادس
ـــــــــــــ
ـ يما ! خلي ضو الغرفه مضوي ، بخاف ييجيني ابو اجر مسلوخه اللي حكيتيلي عنو .
ـ ومين بدو يدفع الفاتوره ؟
ـ انتي ادفعي وانا لما اكبر بتقوليلي قديش وبدفعلك اياهم .
ـ اخرس ونام ، انت ما بتقدر النعمه اللي انت عايش فيها ، خالتك وبنتها في المخيم لليوم ما وصلتهم الكهربا .
ـ طب جيبيلنا شمع زي خالتي .
ـ خالتك ابتشتري شمع لانه ما عندها كهربا .
ـ بس خالتي ما بتطفي الشمع لما تنام بنتها .
ـ لانها مبذره وما ابتعرف قيمة القرش ، جوزها المسكين بيتعب وبيشقى وهيه دايره اتبعطر يمين وشمال .
ـ يعني لو ابوي عايش كان ابتضويلي شمعه زيها ؟
ـ اسكت ونام بكفيني الهم اللي انا فيه ، نام تنام عليك حيطه .
لألألأ ، ارجوكم ما حدا يقول عنها قاسيه ، انا بحب امي كثير وما بحب حدا يظلمها ، بيكفيها الوحده والمعاناه اللي عاشتهم عشان اتربيني ، بيكفي انها ما قبلت تتجوز عشان ... عشان ... عشاني . عشاني ؟ مين قالها انها لازم ما تتجوز ، اكيد كانت خايفه من كلام الناس ، هي لو انها سالتني ، طول عمري نفسي يكون عندي اب ، حتى لو مش حقيقي ، المهم اب اقوله يابا زي بقيت اولاد الحاره ، او بابا او حتى دادي ، حتى لو ضربني ، مش مهم ، ما كل الابيات بيضربو اولادهم عشان مصلحتهم ، وحتى لو كان قاسي مش ممكن يكون اقسى من الحرمان . عالقليله كنت بقدر اغايظ عماد مثل ما كان يغايظني لما ابوه يشتريله هديه او يعطيه شيكل زياده عن مصروفه ، وكان اكيد راح يمنعني اسرق دهبات جارتنا ام عماد ، مزبوط سامي طغاني وضحك علي بس مهو انا كنت محروم ، كان عمري 15 سنه وسامي عمره 17 :
ــــــــــــ
المشهد السابع
ـــــــــــ
ـ صالح ! ابو سلكه ! بتحب اتروح عالفشخه ؟
ـ ما معي مصاري .
ـ يا زلمه بندبر حالنا ، انت بس اعزمني عند صاحبك عماد واترك الباقي عليّ .
ـ عماد زيي ما معو .
ـ بس امو معها ، امشنشله تشنشل .
ـ شو قصدك ؟
ـ انت بس تعال معي واترك الباقي عليّ ، تعال يا زلمه تعال .
وفي دار عماد عمل حالو بدو يدخل عالحمام وانا لهيت عماد لحد ما دخل عغرفة النوم سحب الدهبات وباعهم ، وبعد اكم من يوم شرالنا بدلات انا وعماد ، قال عحسابه قال ، ومن المحل دغري عالفشخه ، وصار يبعزق المصاري يمين وشمال ، الشرطه انتبهوا علينا وسالوني من وينلنا المصاري رحت كارر القصه من اولها لاخرها .
ــــــــــ
الثامن
ـــــــ
جبان ، طول عمري جبان ، حتى عمري ما طلعت مظاهره ، لأ ، طلعت مره واحده ، عشان عيون المها ، بعرفش اذا كان اسمها مها ولاّ مش مها ، بس عيونها كانوا زي عيون المها :
ويا ويلي ويلي عيونها ، عيون المها يا عيونها ... شو يعني مها ؟
حبيت اتعرف عليها ، صرت الاحقها ، والبنت من عيله عريقه بالمظاهرات ، عيلة مناضلين ، ايامها كنت بالجامعه ، سألت ... سألت واحد من الطلاب المدردحين قال لازم اثبتلها اني مناضل زيها .
ويا ويلي ويلي عيونها ، عيون المها يا ...
نحن لها يا مها ! ووينك يا ام عيون المها !
بالروح بالدم نفديكي يا فلسطين ، ثوره ثوره حتى النصر ، لااله الا الله والشهيد حبيب الله ، فليسقط وعد بلفور .
الناس تهتف وانا اهتف ووين ما راحت وراها ، اتطلع عليها وكل ما تدير وجهها علي احمى بزياده ، هي تتطلع وانا احمى لحديت ما صرت اول الصف ، والله لا يحطكم محلي ، بدا تطبيش الحجار وكأني داوود بزمانو ، ور ور ور ور هي تتطلع وانا اطبش ، هي تتطلع وانا اطبش مره عالجيش ومره عالشباب المهم تشوفني بطبش لحديت ما بلش الطخ ...
ولكم على مين بتطخطخوا !! هو ضل حدا بالمخيم اتطخطخوا عليه ، اللي شرد واللي انحبس واللي انفعص واللي تفتفت ، والله شكلوا هالمخيم ما ضل فيه حدا غيري ، ليكون مفكريني ابو جندل ! يا خوفي يكونوا جندلوه ، ولكم ابو سلكه انا ابو سلكه ومعاي هويه زرقا ، انا والقشاطه معانا هويه زرقا .
ــــــــــــ
التاسع
ــــــــ
مش برضو حضراتكم جايين عشان تنقذوا الانسان ؟ الانسان المتجسّد فيّ ، مش انا الفرد الذات ، مش انا المتكوم داخل المرحاض ... الأنا المسحوق المقهور المدعوس المفعوص المهروس المتدفق ال.....
انتوا اكيد ناويين اتضحوا بحياتكم عشان تنقذوا حياتي ، وانا لما اطلع من هون راح احكي عنكم للصحافه ، ومش بعيد اعمللكم تأبين ونصب تذكاري ، واكيد الشعرا راح يكتبوا عنكم قصايد مولعه ومش بعيد يكتبوا عنكم روايات ويعملوا افلام ومسلسلات ودعايات : كن من المناضلين واحصل على تأبين .
معاكم حق ، واحد زيي ما بيستاهل ، لو كنت ابو جندل كان معقوله ، اما ابو سلكه !؟ الجبان المعفن المحشور في ال...
الفرق بيناتنا كبير وما بنتشابه غير في شغله وحده ، هو ضحيه وانا ... هو حي وانا ميت ، مين راح يتذكرني بعد ما تخلص هالميمعه ؟ اما هو ... الدنيا كلها راح تتذكره وتحكي عن بطولاتو وشجاعته ، حتى اعداؤه راح يتذكروه ويضربولو سلام .
ــــــــــــ
العاشر
ـــــــــ
لما طلعت من السجن بعد اول حبسه كان عمري 17 سنه ، ولا حدا اجا يسلم علي ، حتى عماد صار لما يشوفني بالشارع يدير وجهه ، وانا صرت كل ما اشوف سامي ادير وجهي .
ـ ولا ابو سلكه ليش بتدير وجهك يا عرص ؟
ـ اسمع يا سامي بيكفي اللي صار ، انتا من طريق وانا من طريق .
ـ ولك يا جواد السجن للقبضايات .
ـ ومين قالك اني قبضاي ؟
ـ ولك مبسوط عالشغله اللي ابتشتغلها ، حط عقلك براسك واشتغل معي بتاكل جوز وسكر يا معرّص .
ـ شغلتك صعبه وبدها قلب قوي وانا ...
ـ جبان ، طول عمرك جبان وراح اتضل جبان ، روح ولا روح انقشر من وجهي ، تفي على هيك زلام ! قال بدنا نحرر القدس قال ، ولك القدس بدها قبضايات مش خمعات زيك ، اتفي .
ــــــــــــ
الحادي عشر
ــــــــ
الو ، ايوه شاؤول ، اعطيني ارييل ، اريك اريك ، ايوه اريك ، معاك ابو سلكه ،
ولكم بيكفي طخ انتا وياه ، مضلش غيري بالمخيم ، وفروا رصاصكم لحدا بيستاهل الشهاده ، بدال ما اتطخطخوا عالفاضي والمليان وتصرفوا ملايين عالسلاح طعموا الجوعانين اللي عندكو ، ابنو بيوت " للحسريه ديور" اللي ما عندهم بيوت ، افتحوا شغل للعاطلين عن العمل ، اهتموا بحالكم وحلوا عن قفانا عاد ، زهقناكم ، زهقنا جنونكم وخوفكم واوشفيتسكم ، زهقنا الرعب اللي بتفرضوه عحالكم وعلينا ، استغلو الفرصه اللي صحتلكم وعيشوا زي البني ادمين ، بيكفى دم وتعذيب وتشريد وكل ما تعملوا مذبحه بتصروا اتسموها حرب ، بيكفي كذب عالناس وعلى حالكم ، شو يعني لازم يموتوا ست ملايين فلسطيني عشان اتحسوا بالذنب وتعترفوا انكوا عملتوا مذبحه ، طب واذا ماتوا ميتين او ميه او خمسين او حتى عشره ، او حتى واحد معفن زيي ؟ هادي مش اسمها مذبحه ؟ انا مش بني ادم زيي زيكم ، ما الي ام ؟ ما الي خطيبه ؟ ما الي اهل ؟ طب اذا انا متت ، مين بدو يخلف ولادي ؟ مين بدو يربيهم ويعلمهم الخير وحب الحياه ؟ اه حب الحياه . شو يعني ؟ شو يعني ؟ يا بتاخدوا كل شي يا عليّ وعلى اعدائي يا رب ؟!!!
يا رب انا بديش اموت ، لساتني باول حياتي ، لا عارف اتجوز ولا عارف اخلف ولا عارف امشي دغري ولا حتى عارف انحرف ، كلمه بتجيبني وكلمه بتوديني ، ومش عارف اعمل ولا اشي ، كل الناس عارفه شو بدها ما عداي ، حتى الهومو
ـ لا حبيبي ، انا اذا بتصير دوله فلسطينيه بدي اعيش في اسرائيل .
ـ طب ممكن افهم ليش ؟
ـ الحريه ، هدول شعب حر وما حدا بيتدخل بالثاني .
ـ احنا كمان شعب حر بس في عنّا احتلال .
ـ وانا شو فارقه عقفاي احتلال ولاّ غيره المهم اقدر اعمل اللي بدي اياه .
ـ مهيك عايش معانا وبتعمل اللي بدك اياه !
ـ اه ، بس بالسر ، اما في اسرائيل هناك غير شكل ، هناك كلو عالمكشوف والسياسيين شيتونهن بيقدروا .
ـ وشيتونا ؟
ـ كلهم زي قرن الموز بينعدلوش .
ـ عيب عليك في عنا كتير سياسيين امناح وخدومين .
ـ هدول بيكونوا لسا باول الطريق ، اصبر عليهم ، بس يستووا بينعوجوا ، اسألني كيف عرفت .
ـ كيف ؟
ـ واحد منهم وعدني انا وجماعتي اذا انتخبناه راح يساعدنا ويمرر مشروع النقابه شيتنا ، وبعد ما هلكنا حالنا وجمعناله اكبر عدد من الاصوات ما وفا بوعدوا وزي ما انت عارف وعد الحر دين .
ـ شو هالحكي ؟ أي مفكر حالك باميركا ؟
ـ هيك قلتها لحالك ، انا بحب اعيش في اسرائيل لانها زي اميركا .
انا بديش اعيش في اميركا ، سامعين ! بدي اعيش في بلدي هون ، في فلسطين مش في اسرائيل
ـــــــــــــ
الثاني عشر
ـــــــــــــ
( يحادث نفسه ) :
ـ بس انت جبان .
ـ انا جبان ؟
ـ ايوه ، واعترفت قدام كل الناس .
ـ انا خايف ، ومن حقي اخاف ، ومن حقي اصرخ واقول الحقيقه هاي قدام كل الناس ، مش كل البشر بينفعوا للحرب ، في ناس كتار ما بينفعوا ، بس هدول كمان من حقهم يعيشوا ، قولولي بحياة دينكم : مين فيكم ما بيخاف لما يسمع صوت المدافع والرشاشات والصواريخ والطيارات الحربيه اباتشي وام 16 و 17 ودبابات مركفاه ومش عارف شو ، مين ما بيخاف على بيتو وولادو ومرتو وبستو وكلبو وحمارو وبقرتو ؟
ولك يا جبان ! ما دام عارف حالك امنيح ، وعارف انك لا في العير ولا في النفير ليش جيت عجنين ؟ مش لو ضليت قاعد في الدار كان هلق جاعص عالكنباي ، حامل الريموت وبتقلب بالمحطات ؟! من الجزيره للعربيه للحره ، وتشرب شاي وقهوه وتدخن سجاير وتلعن ابو الاحتلال ، وكل ما تخلص سندويشه تعمل غيرها ، كان عالقليله زاد وزني عشره كيلو .
ــــــــ
الثالث عشر
ــــــــــ
( يقلب المحطات ) شو هادا ؟ الله اكبر عليكم هاي ولا الحرب العالميه الاولى ؟ يخ شوفي شوفي كيف مرمي عالارض ! يا الله الدبابه طلعت عليه !.. ايش هادا مخزقين البيوت ، اسمع هادا ايش بيقول ... معلوم عش الدبابير مهم خزقوكم تخزيق ... يحرق عرضهم محلى مجنداتهم ، اف اكم مره غيروا القائد الميداني ! كلهم فاشلين ... شوف كيف ماسك ايدوا حاملها وبيركض بينه رايح عالمستشفى ... له له له حتى المستشفى خردقوه ... اللاجئين مسخوطين وين ما كان ... رجعنا لابو جندل خوف الله اخرتهم يجندلوه ... اسمع قال شراسة المقاومه معناتو ناويين عمدبحه ...هيو هيو الصاروخ ، يا لطيف الدارصارت كومة تراب ابصر شو صار بالناس اللي فيها ... سيجاره حدا يرميلي سيجاره يا جماعة الخير ، اعصابي بطلت قادره تتحمل ، شو ؟ ولا حدا معو سيجاره ؟ فش معاكو ولاّ بخل ؟ عن جد بدي سيجاره ، فش معي ، انا اصلا بدخنش بس نرفزت من هالمحطات ، الواحد صار مدمن اخبار ! بتحبوا نغير ؟ نشوف محطه ثانيه ، في ال بي سي " البسي " وفي اشلحي ، شو بتفضلوا ؟ ... هاي عرض ازياء .... رجب ! حوش صاحبك عني ، رجب ! صاحبك جننني ، رجب ! قلوا يكلمني .... عشفافو مرمغ شنباتو وكل شوي يقولي أي أي أي أي أي فيلم اكشن ... برضو دم .. هادا مسلسل كوميدي ... لأ بيصير بيصير فكركوا الناس المحاصرين تحت القصف بيضحكوش ، لا بيضحكوا بيموتوا من الضحك .
ـــــــــــ
الرابع عشر
ـــــــــ
ابو الشباب هزلي طولك الله يسعدك وهاتلي جاجه محشيه وجنبها شوية بطاطا وخضره وكاسة لبن وقنينة كولا ، لساتك قاعد ؟ طب اقولك خليها مقلوبه ، صينية كفته ، طب مجدره ، طب صحن شوربة عدس ، طب ساندويش فلافل ، ما حدا رادد علي !؟ بلاش ... ولا " حيال تفي ساندويش فلافل " ولك انا من القدس ، هويه زرقا " يروشلمي " يعني لا هو رادد ولا انتو رادين ، احسن واحد فيكو اللي اعطاني سيجاره ، طولو بالكو علي بس اطلع من هون ، والله ما ارحم واحد فيكو ، بينكو مستقلين فيي ، صحيح انا مش ابو جندل ، بس برضو انا ابو سلكه ، صدقوني غير اعمل فيكو زي ما عملت بسامي ... سامحني يا رب ، خوف الله انو اللي بيصير فيي من خطيتو ، وخطية غيرو ، انا اخطيت يا رب ومنك السماح ، بس هو كمان غلطان ، قضى على مستقبلي ، لو اني ما انحبست معاه لمّا سرقنا دهبات ام عماد كان كملت تعليمي ورحت عالجامعه زي عماد ، مزبوط انا كنت في الجامعه بس مش طالب ، فراش ، ولولا ابو عماد اتوسطلي عند العميد كان ضليت ابيع صور وادور مع السواح اخترعلهم قصص من عقلي عن القدس وبيوتها :
في هذا البيت اتغدى المسيح ، وهون شطف وجهو ، وهون غسل اجريه ... ووو نصب واحتيال وكلو من تحت راس سامي ، بس انا ما وفرتو ، سامحني يا رب ، انا لازم اعترف بذنوبي قبل ما يطلع السر الالهي :
ـــــــــــ
الخامس عشر
ــــــــــ
سامحني يا رب ، انا اللي طلعت اشاعه عن سعاد انها بتصاحب الشباب وانها من واحد لواحد بس لانها اخت سامي ، وانا اللي سرقت قفص الجاج من باب دكان ابو صلاح ولبست القصه لسامي ، وانا اللي قلت لابو كوثر اني شفت سامي داخل عدارو وبيتحركش في مرتو ، انا اللي حكيت لام سعيد انه ابنها بيمشي مع الحشاشين ، انا اللى... عبير سامحيني لاني قلت عنك مش حلوه وقطعت نصيبك من العرسان ، وهديك اللي كسّرت علبه مكياجها وعملت حالي ما معي خبر ، نسيت اسمها ، وابو علي لاني كنت اكل عندو واقله دفعت ، والسوبرماركت اللي كنت اسرق من عندو غراض واخبيهم في الجاكيت ، وبياع الفلافل اللي سرقت من عندو 13 حبة فلافل ، ولاّ15 مش متذكر بالزبط . وعملت وعملت وعملت ، وانا .. انا.. انا
اللي حبّست نص شباب الحاره بعد ما مسكوني في المظاهره .... ويا ويلي ويلي عيونها ، عيون المها يا عيونها ، خوف الله انه المها نوع طيور او حيوانات او ...
خلص ، انا بعترف اني غلطان بكل الغلطات اللي حكيتها واللي ما حكيتها ، اللي متذكرها واللي نسيتها ، وبطلب منك يا رب تسامحني وتعفي عني .
وبطلب منكم يا جماعة الخير بصفتكم شاهدين عالللي صار معاي انكم تنقلوا الحقيقه لكل العالم وتقولولهم ، اتقولولهم ، ولاّ اقلكم ما تقولوا ولا اشي ، ما صارلنا ميت سنه بنقول وما حدا فاهم .
وهلقيت بقدر اموت وانا ضميري مرتاح .
ــــــــــــ
السادس عشر
ــــــــ
بس شو اموت ببيت المي ، شو يعني ؟ حتى لو اسمو تواليت ، انا ما بدي اموت هون ، بدي اروح عند امي ، بدي ارجع عدارنا بالقدس ، جواة البلد القديمه ، طلعوني من هون ، ولا حيال ، ليش بتردش ولا ، انت مش بني ادم ، رد علي لما بحكي معاك ، لامتى بدك اتضل عامل دان من طين ودان من عجين ، بقولك بدي اروح عند امي .
ــــــــــ
السابع عشر
ـــــــــــ
امي بتستناني وطابخالي كوسا محشي :
ـ يسلموا ايديكي يما طبيخك بيشهي .
ـ كول ولو انو خساره فيك بس شو ما صار بتضلك ابني .
ـ ليش خساره يما ؟
ـ سودت وجهي يما .
ـ ليش ؟
ـ يكسرك ، مش عارف ليش !
ـ يما ما همه ضربوني وما قدرت اتحمل .
ـ اشمعنى غيرك بتحمل ؟
ـ يمّا ضربوني كف .
ـ كف ؟ يكسر جاهك ، من اول كف ومن اول يوم ؟ فضحتني الله يفضحك ، الحبسه الاولانيه عسرقه ، والتانيه لميت نص شباب الحاره ، الله يخزيك زي ما خزيتني .
ـ من فضلك ، انا مناضل ، قضيت سنتين بالسجن عشان عيون الوطن ، بس مرات الظروف ابتحكم .
ـ طب لبّط لبّط ، هو الوطن بيستنى اللي زيك ؟ والله والبيت اللي بناه الله لولا اهل الحاره عارفين انك خالص كازك لقالو عنك عميل .
ولا حيال ! بدي اروح عند امي ... فش فايده ، شفتوا ، مش قتلكم صارلنا ميت سنه بنقول وما حدا فاهم ، اكيد في مشكله باللغه تبعتنا ، يمكن لازم نلاقي لغه ثانيه ، لغه عالميه بيفهموها كل البشر ، بلكي حدا حس فينا وفهمنا ، لغه فوق كل اللغات ومفهومه لكل الاجناس ، لغه مش بحاجه لورق ولا حبر ولا مطابع ، لغه تفهمها العين وتحس فيها وتتعاطف معاها ، في ولاّ ما في ؟ في ولاّ ما في ...في وفي وفي ...
في وفي وفي ...
يا ويلي ويلي عيونها ، عيون المها يا عيونها ...
ـــــــــــ
الثامن عشر
ـــــــــــ
عيون ، العيون ، السر في العيون ، العين كميرا ابتنسخ الصوره وبتخزنها في المخ ، صوره ما حدا بيقدر يمحيها ، عيون عيون السر في العيون ، عيون في مخيم جنين " اع و ي عي أي و او يو واع عيو وان عيون ، ف و ي في م و خ مخ وي و م يم مخيم ج ج ج ج ن ن ن ن ي ي ي ي ن ن ن ن مخيم جنين .
( يعود لتقطيع الاحرف تتحول كلماته الى اشارات خرسان )
ــــــــــــــــــــــــــــــــــ
ــــــــــــــــــــــــــــــــــ
*****************************************
*****************************************
<<<<<>>>>>
انتهت بحمد الله في صباح الاحد الموافق 26 / 6 / 2005 .
كامل الباشا .
ساحة النقاش