انا يا بحر مريت لشوفتك شفقان
انا جيتك ابنسى وساعه الهم يباريني
على شواطيك غفيت واعاتب موجك الغضبان
اسولف له عن الامي وعناي وغربة سنيني
علامك يا بحر علامك تصرخ بكتمان
انا جيتك ابشكي لك وابي منك تواسيني
انا مثلك بحر لكن وسط نفسي انا غرقان
تعبت ابحر مع نفسي واسالها انا ويني
انا محتار في وصفي ومع نفسي انا حيران
انا لا قادر افهمها وهي تجهل مضاميني
انا مليت من حزني وتعبت ابحث عن السلوان
ولا ضنيت به شي عن احزاني يسليني
احس ان الحزن عالم بحوره وصحوه ووديان
تخيل يا بحر حجمه اذا حجمه سكن فيني
تصور لو شقا الدنيا تجمع في كيان انسان
تصدق ما بقى بالكون اسى مابات في عيني
ترا كل الحزن لو غاب وراح لاخر الاوطان
يغيب ويرتحل لحظات ويرجع يستقر فيني
انا اخر فصول الحزن وانا لدروبه العنوان
وانا اخر عزوفاته واصواته تغنيني
انا والليل والغربه تعانقنا مثل عشاق
ليلي كل اهاتي وللغربه عناويني
تعبت اسقي ثرى قبري وازرع بالوهم بستان
تعبت ولا نبت زرعي وتعبت وجفت يساتيني
حظي العاثر رماني بسكة الحرمان
ولا مره على الفرحه يرسيني
الا يا بحر جاوبني تالي اخر هذه الاحزان
اخر رحلة اوجاعي وعناي وغربة سنيني
سفير الاحزان / سالم الفرحان
