حلمت مرة حلم جنان بالة مخصوصة للازمان
حقب كتيرة وتاريخية ترجع وتتقدم بيا
ايشى فرعونية ورومانية وحديثة برضه اسلامية
واحتار دليلى وعقلى احتار لو عاد زمانى اقدر اختار
ملوك ورؤساء متعاقبين وامم عديدة شمال ويمين
وعجبنى عصر من الازمان وقلت اه لو فيه ياسلام
زمان معطر بالرياحين كله محبة بشكل جميل
والناس بتمشى كده فى امان بهدوء وطيبة اهل زمان
وغفير نظامى فى كل مكان والكل عايش كده فى سلام
كشعب واحد متحدين مسلم مسيحى متحابين
وفى الصحافة والإعلام اداب لمهنة فى كل مكان
اهرام واخبار مصرية صحف مجلات جمهورية
شيوخ صحافة مهتمين التابعى مع مصطفى امين
وفى الثقافة اعلام بارزين عقاد وحقى وطه حسين
اما الاذاعة والتلفزيون كان فيها برضه نجوم ونجوم
مسلسلات ويا افلام دراما راقية بشكل جنان
فريد وفوزى وعبد الوهاب حليم محرم ومنير مراد
علوم ثقافة كتير وفنون والعشق كله لام كلثوم
ابنودى طالع ويا جاهين وليلة كبيرة وعوف الاصيل
اما المواسم والاعياد عادات جميلة وزينة بالذات
ورمضان جانا بعد غيابه تزيد وتكتر نفحاته
وكان ساعتها الجار للجار فى عيلة واحدة بدون اشرار
كبير بيعطف على الصغير وصغير بيحترم الكبير
والكل يحترم الستات بدون سفالة وتحرشات
والبركة كانت كده فى جنيه اما الدولار ده ياعينى عليه
وامينة برضه وسى السيد بيربوا اجيال تتعود
والكل قاعد فى الحارة يسمع مسلسل لسمارة
ورمضان ده بيلم العيلة وليلة من الف ليلة
والقاهرة ده بشكل جميل والنيل بسحره يفيض ويسير
وفى نفسى قلت وتمنيت يكون فى عصر زيه ياريت
وصحيت فى عصر كأنه كابوس ولا فيه محبة ولا حتى فلوس
مع تحيات الفقير الى الله
ياسر شرف- كبير محررين مترجمين
بقطاع الاخبار- الاذاعة والتلفزيون
