بعيدًا عن حلاوة أو سخافة إعلان يونيفرسال، بس بمنتهى الأمانة ليلى علوي وشيرين رضا أبسط دليل علي أن الأساس الحلو لا بيتأثر بالزمن ولا عوامل التعرية. – امتى هانستوعب فكرة أننا 100 مليون بني آدم ، وأن المسلسل أو الاعلان أو البرنامج اللي مش عاجب حضرتك ممكن يعجب 10 مليون واحد غيرك أو العكس. – لما تبقى حلقة كاملة مافيهاش مشهد وحش أو أي كلام .. تبقى حلقة النهارده من “حلاوة الدنيا”. – ورطة إنسانية.. محاولة مش بطالة لاستنساخ برنامج الصدمة. – عفاريت عدلي علام ، لسه بكتب هو رامي إمام إدي مهدئات لـ مي عمر قبل ما تصور ولا ايه؟، لقيت عزت أبو عوف بيقول دي لسه خارجة من المستشفى وأعصابها تعبانة. – بعد أحمد مالك “لا تطفئ الشمس”، مؤمن نور “عدلي علام ” تاني سائق أوبر في دراما رمضان، مش عارف كريم ناوية تتحرك إمتي الحقيقة. – لما الداخلية تعرف تكشف لغز قتل الطفل يوسف في ميدان الحصري، احتمال وقتها تعرف تكشف ألغاز الدراما السنة دي. – لمعي القط .. حنفي الأبهة نسخة ٢٠١٧. – أعصر على نفسك لمونة واتفرج علي حلقة من مسلسل “عرايس خشب” وصدقني عمرك ما هاتكررها تاني أبدا. – لأعلى سعر .. التجربة أثبتت إن سارة سلامة بدون هوت شورت ممثلة عادية جدًا. – أمينة خليل اكتشفت أن حبيبها خاطب واحدة تانية “لا تطفئ الشمس” وإنجي المقدم اكتشفت أن جوزها متجوز عليها “30يوم”. – الحاله ج.. تحس أنهم جمعوا الحلقات فجأة.. غلطات في المونتاج والألوان وحاجه مأساة. – محمد ثروت مشروع بيومي فؤاد جديد في رمضان الحالي. – أرض جو .. لو فريال يوسف كانت راجعة من رحلة عادية مش من طيارة مخطوفة، كان أهلها ممكن يستقبلوها بحرارة أكتر من كده ومش بعيد كانوا راحوا خدوها من المطار مش الـ living room. – أرض جو .. فجأة جالي إحساس إن غادة عبدالرازق بيحققوا معاها في جراج “أركان” مش في أمن الدولة. – رمضان كريم .. روبي طرحت سؤال وجودي في غاية الأهمية “هو لسه في حد بينقي الرز ؟”. – في الـ لا لا لاند .. محمد سلام .. ياخوانا ياخوانا. – لزمتها ايه الكوارع كنا كلنا كنتاكي.. ملخص حلقة اليوم من “هذا المساء”. – اللهم أني صايم .. إلي حد كبير ماجدة زكي بدأت تكسر الحاجز النفسي اللي عند ناس كتير تجاه مصطفى شعبان ومسلسلاته. – زي النهارده شوبير وأحمد الطيب ضربوا بعض ع الهوا في حضرة طيب القلب والذكر وائل الإبراشي. – مطبخ الست غالية.. الحاجة الوحيدة اللي ممكن تشوفها على القاهرة والناس في رمضان. – 30 يوم .. تخيل أن باسل خياط هو اللي عامل دور آسر ياسين تفتكر كان هايعمله ازاي؟ – لا تطفئ الشمس .. حتى الآن، مش لاقي تفسير منطقي لاعتماد محمد شاكر خضير على السوري جهاد سعد بلهجته المصرية المتواضعة غير أن فاروق الفيشاوي كان مشغول بتصوير قصر العشاق. – بعيدًا عن جن “كفر دلهاب” وعفاريت “عدلي علام”، غرابيب سود أكتر مسلسل رعب في دراما السنة دي. – بالمناسبة، حلو أنك تعمل مسلسل تعرف بيه تاريخ الجماعة، بس الأحلى أنك تعرف شباب وقيادات الجماعات الإرهابية والتكفيرية بيفكروا إزاي الآن. – غادة عبدالرازق أخوها إرهابي في “أرض جو” ، وعمرو سعد أخوه إرهابي برضه في “وضع أمني”.. سبحان الله علي توارد الخواطر. – هو عمرو يوسف مخدش باله أن البيت اللي عايش فيه مع كندة في إعلان نيوبولس، غير البيت اللي عزموا فيه مامته في إعلان فودافون. – الكلام الكتير مالوش لازمه لو مش هايغير حاجه.. ظافر عابدين “حلاوة الدنيا”. – هيواجهك وأنت بتطارد لعنات الشياطين شر البشر و دا مفيش أسوء منه.. “كفر دلهاب”. – آخر حاجة ممكن تتوقعها، هي أول حاجة ممكن تتحقق في الزمن ده.. “أرض جو” – لو مكوناش هنشغل القرآن في رمضان هنشغله امتى؟.. كريم عفيفي “رمضان كريم”. – تاخدي درينك يا بيلا؟ .. لا يا حبيبي أصل انا لسه مصلتش العشا.. زكي فطين عبدالوهاب ومها أبو عوف “لا تطفئ الشمس”. – ربنا يرحمك يا أمي ويرحم أمهاتنا جميعًا ويخلي أمهاتكم يارب.
