أخيرا / لمسات عشوائية

ـ 1 ـ
الطريق حب السفر
وف ليله غاب
ولا عدش جاه
والسحاب باس القمر من كام سنه
بعديها تاه
والتراب عشق المطر
لا فضل هنا ... ولا راح معاه
والنسيم حضن الشجر ليلة هنا
بعدين نساه
وانت وانا .... ؟.
ـ 2 ـ
أحلى الشجر طرحى
يا ساقيه بتدورى
على غلتى وقمحى
على شمستى ونورى
ولما طابت فكهتى
وجه خلاص دورى
وحيجمعولى فرحتى
قلعونى بجدورى .
ـ 3 ـ
با صرخ يا عالم م الألم
ده مش سكوت
وحفضل اصرخ فى الفضا لحد اما موت
ومين حيسمعنى
ومين حيفهمنى
اذا كان كلامى ما لهش صوت .
ـ 4 ـ
ناس بتحدف روحها تحضن ف اللهيب
صوت جيتار أوتاره صالحت بعضها
شمس سهرت من وراهم
موج بيغرق ع الشطوط
فى شفايفك .
....................................................

موقعى الشخصى على الانترنت رابط

http://www.hossamelokdah.blogspot.com/