الحمد لله كان يوم جميل جدا النهارده.. حاسة إني أنجزت وربنا كان مبارك في الوقت الحمد لله.

طب يللا قولي لي أنجزتي إزاي عشان نكرر هذه الدروس المستفادة مرة أخري؟ (باكلم نفسي)

حددت الحاجات اللي عاوزة أعملها بوضوح، وفتفتت كل حاجة لمهام أصغر عشانتكون واضحة أكتر وعشان أحس بالإنجاز كل ما آكل فتفوتة .. قصدي كل ما أخلص فتفوتة :)))

الحاجة التانية إني كنت مركزة أنا باعمل إيه دلوأتي، وعايزة أخلص اللي في إيدي ده امتي تقريبا، يعني مثلا.. عاوزة أخلص ده قبل الغدا.. عاوزة أخلص ده قبل الساعة كذا.. وماكنتش باتشتت

كمان كنت بارغي كتير، وكنت باركز علي إني أنجز الهدف من التواصل مع الآخرين وبعدين أنسحب لأن ورايا حاجات كتيرلازم أخلصها

حاجة تانية مهمة أوي بأي، وهي إني كنت بابني علي اللي عملته.. بمعني إيه؟ يعني لو عاوزة معلومات عن موضوع معين أو عاوزة أدور علي أنشطة للأطفال.. كنت بافكر أولا قبل ما أبحث علي الإنترنت، أدور علي المعلومات اللي أنا مسيفاها عندي علي الكمبيوتر أو أرجع لخبراتي السابقة سواء كانت هذه الخبرات مكتوبة أو في عقلي. وفعلا ده وفر علي وقت البحث علي الإنترنت، والحمد لله أنجزت اللي عاوزاه في وقت أقل.

وحاجة باردو مهمة أوي.. إني ماكنتش باحسوك، يعني مثلا كنت بادور علي أنشطة عشان أحطها في ورشة من الورش اللي باحضرها. وبالفعل حطيت نشاطين.. وبعدين بأي قفشت نفسي وأنا لسة عمالة أدور علي أنشطة زيادة. طب ليه؟ رغم ان اللي حطيتهم ان شاء الله كويسين يعني. فقفلت ونقلت علي المهمة اللي بعدها.

ومبسوطة جداااااااااا إني قعدت كتبت اللي أنا كتبته ده.. إن شاء الله هاييجي منه، اللي كتبته ده كان نتيجة قرار أخدته وأنا قاعدة في الورشة اللي فاتت في عش أفضل، قلت: أنا لازم أخصص وقت للكتابة يوميا إن شاء الله. فلما جت الساعة 10 إلا ربع، افتكرت القرار ده، وافتكرت هدفي إني أكتب سيرتي الذاتية، وإني فعلا محتاجة أشتغل عليه من دلوأتي. فرحت قفلت بأي كل حاجة باعملها, عشان ألحق أكتب وأخلص قبل الساعة 10. إشمعني الساعة 10 يعني؟ أصل ده وقت التليفزيون بتاعي. وبما أنها 10 وخمسة دلوأتي، فأنا هاقول لكم: سلام. وانا باكتب حسيت ان الكلام ده ممكن يفيدكم فقلت أنشره.. يا رب تكونوا استفدتم :)